1 Kedinto 14
14
Apiya ahahapan ta so teneteneng a kano oyowyat apo do Seyzi
1Am ori o ikakdekdeng nyo pa mangarilaw so icyatatao nyo. Akman sang, ta ikakza nyo o teneteneng a kano oyowyat a itoro na jinyo no Seyzi. Am ney makdeng na am mangononong so ciriciring na ni Ama ta do to. 2Ta o meyzezyak so macitarek a ciring apo do Seyzi am beken a tao o peycirngan na sya, ta si Ama ta do to, do kabo no tao a makateneng jya amizngen. 3Am o mangononong so ciriciring na ni Ama ta do to am tao o nanawen na. Ta isidong na sira, ipait na sira, ipasaray na so onowned da no amyan so alalaw da. 4O manci no macitarek a ciring am kataotao na o masidong na. O mangononong so ciriciring na ni Ama ta do to a tao am masidong na o tao do kyokay. 5Inaoy si mamimin kamo a meyciring so macitarek a ciring. Am ko apyapyahen pa inyo a mangononong so ciriciring na ni Ama ta do to. Ta no myan so tao a mapeyvaliw so macitarek a ciring am ori o ipakasidong na so tao do kyokay. No si abo o mapeyvaliw sya am makdekdeng pa o kapangononong so ciriciring na ni Ama ta do to a kano meyciring so macitarek a ciring.
6Am ori an, manga kakteh an. No si mangay ko jinyo a kapangononong ko no ji nyo a tenngi a ciring am ikongo peypeypangayan na no akman sang. Si ahapen ko saon o ciring nyo a mangononong so ciriciring na ni Ama ta do to am ori o ipakasidong ko jinyo saon am. 7No si malas o patbokan da so anood am abo tao a makateneng do anwanood. 8No avyotan o ipaziman so tao a kaji na pengkadan am sino do itaysang o makateneng do kapeyliliman da. 9Akman sang o macitarek a ciring nyo an. Ta no abo tao a makateneng do peypeypangayan na am akma kamoy macisirsiring do pagpag. 10Yaro yamakakaday a ciring do karawan am abwata yasa dang a yajyatenngi no tao so peypeypangayan. 11No ji ko a tenngi o peypeypangayan no ciring a ipanci da jyaken no macisirsiring jyaken a tao am akma nameney apo do matarek a pongso a ji makateneng do ciring no kadwan jyamen. 12No nyo tey kakza o teneteneng a kano oyowyat apo do Seyzi am naknakmen nyo o kakza nyo no makasidong so nakenakem da ji Ama ta do to no akma nyoy kakteh do cinai.
13Am ori an. Ta o makza no kapeyciring so macitarek a ciring am ipeynozi na o kapakateneng na jya peyvaliwen. 14Ta no meynozi ko no macitarek a ciring am onowned ko o meynozi. Am abo do pangtoktwan ko. 15No akman sang am makongo so wanjin. No meynozi ko am meynozi o onowned ko a kano akman sang a aktokto ko a meynozi. Akman sang no meyyanwanood ko. 16No si isaray mo ji Ama ta do to no macitarek a ciring am manngwa, katenngan da o inozi mo no macipeynozi jimo? No si manoyong o kakman na sang am makongo sira macizanod jimo a manci no, “Amin,” do ji da tenngi. 17Tana apya o inozi mo ji Ama ta do to am ji na sidong o karwan no tao. 18Ko isaray ji Ama ta do to. Ta yabo yamakataha jyaken a masangib a makalavat so macitarek a ciring. 19Am no malwalovot a meynozi am apyapyahen ko pa o alima ka ciring a katenngan da amizngen no tao a makananao sira a kano meykazivozivo a ciring a ji da tenngi amizngen no tao.
20So ipeypakatkat nyo, manga kakteh so pangtoktwan an. Akman kamo so mina tazak a tao a ji nakenakem so raraten. 21Maniring do Seysyo am,
“Pacisirsirngan ko o aro a tao no macitarek a ciring.
Mamnek ko so tao do matarek a pongso a macisirsiring jira. Am yada yaken ji ngamiznga.”#14:21 Isayya 28:11-12; Sen Ming Ci 28:49.
22So ikanoyong na no macitarek a ciring a yongkad no oyowyat na ni Ama ta do to. Am ori rana am ipaziman so ji nganoyong ji Yeso a tao. Am o mangononong so ciriciring na ni Ama ta do to am ipeypahagnat so nakenakem da no amraralay ni Ama ta do to a tao. 23No malwalovot kamo do kyokay a meynozi a kamimin nyo meyzezyak so matarek a ciring am no somdep sira o ji manaralay a tao am jyabo kaji da mancyan ninyo a zomyak a. 24Am no malovot kamo a mangononong so ciriciring na ni Ama ta do to a kasdep da no ji manaralay a tao am jyabo kaji da makanakman so raraten da, do pakamizngan da so ipanci nyo a ciriciring na ni Ama ta do to. 25O meyyomomon do onowned na a raraten am jyabo kaji na ngablisan jya a omraralay rana ni Ama ta do to, do kanoyong na do kapacikaop na jinyo ni Ama ta do to.
Pangozayan do kyokay a iwawalam
26Manga kakteh, akman so wanjin o pangozayan nyo. No malovot kamo a meynozi am amyan so meyyanwanood. Amyan so mangnanao. Amyan so mangononong so ciriciring na ni Ama ta do to. Amyan so macitarek so ciring. Amyan so mapeyvaliw sya. Naknakmen nyo o kapeypahagnat da so nakenakem no makakaday a vazay no sinjya. Ta ori o manoyong an. 27No myan so meyzezyak so macitarek a ciring am karwan na o tatlo a mapalipalit. Am amyan so mapeyvaliw so peypeypangayan na no nang. 28No si abo tao a mapeyvaliw so ciring na am ji rana meyzezyak o macitarek so ciring a tao an. Apyapya rana kato na ngyanan do onowned na a manci nya ji Ama ta do to. 29Am o mangononong so ciriciring na ni Ama ta do to am apya ka rarwa da am tatlo no manci nya. O mangamizing a tao am pakamizngen da o kanoyong na kalas na no ciring da. 30Am no si myan so amlisna tao a yanan no nimapo ji Ama ta do to a ciring am o nimanmanma a nimyan so ciring a tao am to rana neyked. 31Apya kapalipalit nyo a mangononong so ciriciring na ni Ama ta do to a kamimin nyo a karapan so onowned. 32O yanan no teneteneng a mangononong so ciriciring na ni Ama ta do to a tao am ingtwan na o kataotao na, ta ji to meyzezyakan. 33Ta o yaomoyat jira Tao do to am beken a yamapeyzavozavoz so vazay. Ta na twatontonen o vazay na.
O iwawalam do peycyakyokyokayan na am, 34ji meyzezyak o mavakes do kalwalovotan no tao a meynozi akman so domket do Seysyo. Ta kapangamizing da no mavakes. 35No myan so kakzeben da katenngan am to da pacicya o kahanghangan da do vahay da. Ta o meyzezyak do kalwalovotan no tao a mavakes am jyazway o akman sang. 36Ala yamyan so yaji ngahap so ko inanao jinyo ya. Manngwa, yanimapo jinyo o nanao na ni Ama ta do to? Manngwa, inyoo o yana nanawen?
37No myan so tao a yamanci no kapangononong na so ciriciring na ni Ama ta do to a kano manci no keyyan no oyowyat na jya no Seyzi am naknakmen na o yadomket do teygami ko ya. Ta yamonganay ori ji Ama ta do to. 38No myan so ji ngahap sya am ji nyo ngamiznga.
39Am ori manga kakteh an, kakzan nyo no mangononong so ciriciring na ni Ama ta do to an. Am ji nyo nengsengi o meyciring so macitarek a ciring an. 40Pangozayan nyo o kapeycyapyapinpinan no vazay an.
Currently Selected:
1 Kedinto 14: snt
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan
