1 Kedinto 15
15
Mirwa a mavyay si Kizisto apo do heseb na
1Manga kakteh, manakem nyo o ninanao ko jinyo no kakwa a Mapasaray a Ciriciring na ni Ama ta do to. Ori rana am nyahap nyo na yamanoyong a yanyo pangozayan. 2O Mapasaray a Ciriciring na ni Ama ta do to o nipakahap nyo so to meyyonong a ikavyay no pahad nyo. So pangozayan nyo jya an, ta no si ji nyo mangozay am abo o peypeypangayan na no kanoyong nyo ji Yeso Kizisto.
3Ninanao ko na jinyo o yaney makdeng na nimahap ko ji Yeso. Ori rana am nimawakwak si Yeso no raraten ta. So na idket do Seysyo no ciring eya. 4Nipakakasa da si Yeso. Ikatlo na araw am mirwa a mavyay. So na idket pa do Seysyo no akman sang a ciring. 5Nimapacita si Yeso ji Pite a kangay na rana mapacita do karwan da no nipamnekan na amlivolivon no ciriciring na. 6Meyratateng am mangay mapacita do nimacihza pa jya kakaliman na poo (500) a tao. Sira rana ori am amyan pa jira ang so yamavyay. Yamyan rana jira so nimawakwak. 7Meyratateng am mapacita pa ji Yake a kangay na pa mapacita do nipamnekan na amlivolivon no ciriciring na tao. 8Ney manowji na am mapacita jyaken. So yako ipacipanownowji a niomanoyong ji Yeso.
9Ta ney marahet ko na jira nipamnekan na ni Yeso a amlivolivon no ciriciring na. So ikanoyong ko a ji na abneka ni Yeso a lamlamsoy na, ta niraherahet ko o kyokay na ni Ama ta do to. 10Am o pangangarilawan na ni Ama ta do to o ko ikakman sya. Yamanoyong o pangangarilawan na ni Ama ta do to a nitoro na jyaken. Am ori o ko ikaharahara pa a yameyvazay a kano karwan namen a nipamnekan na ni Yeso. Am beken a kowyowyat ko a meyvazay, ta si Ama ta do to am ori o yamacipeyvazay jyaken. 11Am ori an, tana yaken a tana karwan namen a nipamnekan na ni Yeso am namen mamimin a yameylimwang nya. So nyo icyakman sang a yaomanoyong jya.
Ipirwa ta mavyay a yaomraralay ni Yeso Kizisto a tao
12No yamanoyong namen kapeylimwang ni Kizisto a nimirwa a mavyay am ikongo na iyan jinyo no tao a yamanci no kaji mirwan a mavyay no nimawakwak rana tao. 13No ji mirwa a mavyay o tao am ji nimirwa a mavyay saon si Kizisto am. 14No jya nimirwa a mavyay si Kizisto am jyabo angangayan no kapeylimwang namen nya. Jyabo peypeypangayan no kanoyong nyo ji Yeso a. 15No si akman sang am manoyong o kapangamaog namen ni Ama ta do to so malas a ciring. Ta no namen maniring am na nivyay ni Ama ta do to si Kizisto. No manoyong o kabo no tao a mirwa a mavyay am manoyong o kaji na nimapeyvangonan si Kizisto ni Ama ta do to. 16Ta no ji mirwa a mavyay o tao am jyabo kanimirwa na mavyay ni Kizisto a. 17No ji nimirwa a mavyay si Kizisto am abo o peypeypangayan no kanoyong nyo jya. So ikanoyong nyo amyan pa do peyraratenan nyo. 18No si manoyong o akman sang am to makasi sira o nimawakwak rana amraralay ni Yeso. 19No si ipeyhanhan ta si Kizisto a somidong jyaten sicyaikwaya a kaji ta makatenngan do kanoyong na mapeyvangon jyaten a ahapen do teyngato no makwa am to tamo makasi a tao do karawan.
20Am yajyakman sang an. Ta yamanoyong si Kizisto a yanimirwa a mavyay. Ori rana am yongkad no kanoyong da mirwa a mavyay no yarana nimawakwak a yamraralay nya a tao. 21Si Adam o yapwan no kawakwak no tao. Akman sang, ta si Yeso Kizisto o yapwan no keypirwa a mavyay no tao. 22Akman sang an. Ta o da ikawakwak no tao am sira pa macirapa so inawan ji Adam. O ipeyvangon da no amraralay ni Yeso a tao am macikownongan rana sira ji Kizisto. 23Am matwatonton o tao a mirwa a mavyay. Ney manma am si Kizisto. O tomonton am amraralay nya tao, no si marateng o araraw no yai na ni Kizisto, 24a kapakaranes na rana no pangavosan no karawan. No si marateng o araraw no nang am balinasen na ni Kizisto o oyowyat no jyacita a kalamsoyan na ni Satan a kavosoyan na ni Ama ta do to a katoro na rana ni Yeso no karawan ji Ama ta do to a italamozong na. 25Tana abo pa o akman sang a vazay am jyablis si Yeso Kizisto a Panirsirngen do yanam na pa ni Ama ta do to ambalinas so kavosoyan na. 26O ney manowji na balinasen ni Ama ta do to am kawakwakan no tao. So ikabo rana no mawakwak a tao. 27Ta maniring do Seysyo am, “Nipamnekan na ni Ama ta do to a meymatmatngeh no karawan.”#15:27 Anwanood 8:6. O karawan a na malavat do jya am ji macyangay dang si Ama ta do to. Ta iya o nitomoro nya ji Kizisto so oyowyat na a tomalamozong no karawan. 28Am no si marateng rana o araraw no ikakata na ni Kizisto am miminen na o karawan a italamozong. Am ji na meysopoi o oyowyat na ni Ama ta do to. So ikanoyong na rana mazway a meymatmatngeh no karawan ni Ama ta do to.
29No ji mirwa a mavyay o tao am ikongo peypeypangayan no icicirawat nyo a tomaktak do mavyay a tao a izagom nyo so nimawakwak a tao. 30Ikongo namen to nomoki sya no kalalavitan no inawan namen. 31Manga kakteh, ko mangday so araraw a yatoda jyangangay so inawan. Yamanoyong ori o ciring ko jinyo an. Ta yako tey saray nyo kapacikaop rana ji Yeso Kizisto a Panirsirngen ta. 32Akman so mina alalaw ko do Ivoso. Ta mina akma koy to maciliman do masozi a kokoman so tao do peyrehrehtan da jyaken no tao. No ji mirwa a mavyay o nimawakwak a tao am tana to tamo rana mamaring so kanen do araraw am ibnek so kaji ta limanan do kadadayan na so araraw.#15:32 Isayya 22:13.
33Ji kamo todakakey a kalittan. No macikagagan ka do somagpyan a tao am mangay kapasagpyan na jimo so icicirawat. 34Paolin nyo o nakenakem nyo do kapyapyan. Paseykeden nyo na o kapeyraraten nyo. Yatatasa jinyo a yana ji makateneng ji Ama ta do to. O ko peycirngan sya am kapakateneng nyo do kanigan nyo.
Kataotao ta na do teyngato no makwa
35No maniring o tao am, “Sino ipanci o kato mirwan a mavyay no tao. Akman so wanjin o kamamagenan da nira ang.” 36Oyod nyo a kasagpyan a tao. No jyawakwak o nipamowa mo a vettow no kayo am jyabo kalida na. 37Abo mapamowa so meyvoovoong rana mowamowa, ta o vettow na o pamowahen, akman so avyas no kadai. 38Na to mangozai ni Ama ta do to o nakenakem na do na mamaogan so vettow. Akman sang an. Ta to macilolo o mahap mo do nipamowa mo a vettow.
39Yakman sang o kataotao no nyamamaog na ni Ama ta do to, ta yameykataretarek. O tao am tao so kamamagenan. Omalalam am omalalam so kamamagenan. Meyyasasalap am meyyasasalap so kamamagenan. Among am among so kamamagenan. 40Yakman sang o masaod no hanit. Ta o kapyapya no masaod no hanit am yaji meyyangay a kano masaod no teyrahem so kapyapya. 41Araw am yamyan so na ipaniniray. O vehan am yamyan so na ipaniniray. Akman sang o mata no hanit a matarek so ipaniniray. So da ipeykataretarek no kazngazngang no mata no hanit.
42Akman so sang, ta meytarek o kataotao ta do teyngato a kado teyrahem. Ta no si mirwa ta mavyay am vayo rana o kataotao ta a ji rana wakwak. 43O nibobo rana tao am abo o oyowyat na. Am no mirwa ta mavyay am tey mazway ta na. 44O kataotao ta am ori o ibobo. Am o mirwa a mavyay a kataotao am vayo rana ori a mavyay do teyngato. No manoyong keyyan no kataotao ta do karawan am manoyong keyyan no kataotao ta do teyngato. 45Ta maniring do Seysyo am, “Si Adam am tao kamamaogan na.”#15:45 Tswang Se Ci 2:7. Am o ipanci a manowji a Adam am si Kizisto a manta nyaten so to meyyonong a ikavyay no pahad ta. 46Manmanma o kataotao ta do karawan a keyyan na rana no monganay do teyngato a kataotao ta. 47O ney manma na tao a si Adam am nyamaog na ni Ama ta do to no tana. O manowji a Adam am si Kizisto. Iya rana am nimapo do teyngato. 48O tao do teyrahem am akman sira si Adam so kataotao a nimapo do tana. O tao do teyngato am akman sira si Yeso so kataotao. 49So na iyan rana jyaten no kataotao ta do karawan. Am no makwa am amyan rana so kamamagen ta a kataotao ta do teyngato akman so kataotao na ni Yeso.
50Manga kakteh, o ko ipanci am o kataotao ta sicyaikwaya am ji macikaop do italamozong na ni Ama ta do to no makwa, ta mawakwak o kataotao ta do teyrahem eya.
51Amizngen nyo o mapeyzokab a nanao a jya nipatwaw pa no kakwa a nipanci na jyaken ni Ama ta do to. Beken a to ta mimin a mawakwak. Am mamimin ta mablis so kataotao. 52Am makeykai ori, akmey peyrektan no mata. No si mamizing no tao o ney manowji rana ipatao jyaten a zapa am makaranes rana o akman sang a vazay a kapeyoli da mavyay no mawakwak a tao a kaji da rana wakwakan. So icyakman ta sang a mablis so kataotao. 53Ta o kataotao ta na do karawan am mablis rana a kaji na rana wakwakan. 54No mateyka rana ori am ori o ipangononong na rana no ciring do Seysyo. Ta maniring am, “Na rana nibalinas o kawakwak no tao. So ikabo na rana no tao a mawakwak.”#15:54 Isayya 25:8.
55“So ikabo rana no kanyaheyan ta no kawakwak ta. So ikabo rana no mazabab so onowned a tao.”#15:55 Hesiya 13:14.
56O kanyaheyan da no kawakwak da no tao am ikanyahey da o kaoya na nira ni Ama ta do to do kapeyraraten da. O ipeyraraten da am ji da ngapa o iwawalam na ni Ama ta do to. 57Am ta isaray ji Ama ta do to. Ta si Yeso Kizisto a Panirsirngen ta o yarana nimapakavos so vazay na. So ta na jyanyahei a mawakwak, ta yana rana niovayan yaten do raraten ta.
58Am ori an, manga keypong an, makakdeng kamo so nakenakem ji Yeso Kizisto a Panirsirngen ta. Makowyat kamo a mapeyvazay so vazay na. Cyaha, ta nyo katenngan o kaji na liklikan so mapeyvazay so vazay na tao.
Currently Selected:
1 Kedinto 15: snt
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan
