Éxodo 16
16
Tata Dios israelitakunaman mikhunata qon
1Elimmanta tukuynin israelitakuna puririspa, Sin nisqa ch'innejman chayarqanku. Chayqa Elimwan#16.1 Elim: Puka Mama Qocha nisqa mama qocha kantunejpi yaku juturi karqa. Nm 33.9 nin Elim yaku juturipi chunka iskayniyoj yaku juturikuna kasqanta, jinataj qanchis chunka palma sach'a kasqanta. Sin nisqa ch'innejqa Sinaimanta inti llojsimuynejman jina kashan. Sinaí orqowan chawpipi kashan. Chay karqa Egiptomanta llojsimusqankumanta killa khuskanniyojña kashajtin. 2Chaypi israelitakunaqa Moisespaj, Aaronpaj ima thutorqanku. 3Nerqanku: Allin kanman karqa Egiptopi Tata Diospa makinpi wañunayku. Jaqaypeqa ashkha aychayoj mankaj ñawpaqenpi tiyarikoj kayku, t'antatapis sajsakunaykukama mikhoj kayku. Qankunarí kay jina ch'inman pusamuwayku, yarqhaymanta wañuchinawaykupaj, nispa.
4Chantá Tata Dios Moisesta nerqa: Noqa janajmanta mikhunata parachimusaj. Sapa p'unchay israelitakuna toldonkumanta llojsispa, uj p'unchay mikhunankupaj jinalla pallakonqanku. Ajinamanta yachasaj kamachisqayta kasonqankuchus, manachus, chayta. 5Sojta kaj p'unchaytatajrí, q'ayantin mikhunankupaj uj jinatawan pallakonqanku, nispa.
6Chantá Moiseswan, Aaronwan ima israelitakunata nerqanku: Kunan manaraj inti yaykushajtin, Egiptomanta qankunata Tata Diosmin orqhomususqanta yachankichej. 7Tutamanta Tata Diospa jatun kayninpa lliphipiyninta rikunkichej. Payqa paypaj rimasqaykichejta uyarisunkichej. Noqaykurí, pitaj kayku, noqaykupaj thutunaykichejpajri? nispa.
8Moisés nillarqataj: Tata Diosqa manaraj inti yaykuyta mikhunaykichejpaj aychata qosonqachej, tutamantataj ashkha t'antata qosonqachej. Chayta ruwanqa, imaraykuchus Diosqa paypa contranpi thutusqaykichejta uyarisunkichej. Noqaykurí, pitaj kayku? Qankunaqa mana noqaykoj contraykutachu thutorqankichej, manachayqa Tata Diospa contranta, nispa.
9Chantá Moisés Aaronta nerqa: Niy tukuy israelitakuna Tata Diosman qayllaykamunankuta, imaraykuchus Diosqa paypaj rimasqankuta uyarin, nispa.
10Aarón israelitakunawan parlashajtin, chaypacha tukuyninku ch'innejta qhawarerqanku. Chantá Tata Diospa jatun kayninpa lliphipiynin phuyupi rikhurisqanta rikorqanku.
11Chantá Tata Dios Moiseswan parlaspa, nerqa: 12Noqa uyarini israelitakuna noqapaj thutusqankuta. Chayrayku paykunata kay jinata ninki: Manaraj inti yaykuyta aychata mikhunkichej, tutamantataj t'antata sajsakunaykichejkama mikhunkichej. Ajinapi noqamin Tata Dios qankunaj Diosniykichej kasqayta yachankichej, nispa.
13Chantá chay tardepacha yuthu#16.13 Yuthu: Yuthukunaqa manaraj chiri tiempo qallarishajtin, Europa suyumanta África suyuman phawaspa rinku. África suyumantataj q'oñi tiempo qallariyta kutimunku. Yuthukuna Africaman rispa, Palestina nisqa cheqanejta, chantá Sinaí ch'innejta pasanku. Kay yuthukunaqa mana chhika patatachu phawanku. Chayrayku sichus wayra ñawpaqenkumanta wajtan chayqa, sayk'uspa, pampaman chukuykunku. Nm 11.31-34; Sal 78.26-31; 105.40. israelitakunaj tukuy jarankuman tiyaykuspa, junt'aykorqa, sut'iyaytataj chhulla jina jarankoj muyuyninpi rikhurerqa. 14Chhulla ch'akipojtintaj, tukuy pampapi rit'i jina yurajlla rikhurerqa. 15Chayta rikuspa, israelitakuna ujkuna ujkuna ninakorqanku: Imataj kayri? nispa, imaraykuchus mana yacharqankuchu imachus kasqanta. Chantá Moisés paykunata nerqa: Kay t'antatamin Tata Dios mikhunaykichejpaj qosunkichej. 16Tata Dios ajinata nisunkichej: Sapa ujniykichej mikhunaykichejpaj jinalla pallakuychej. Chantá wasipi mashkhachus kasqaykichejman jina, sapa ujpaj iskay kilota jina pallankichej, nispa.
17Israelitakunaqa Moisespa nisqanta ruwarqanku. Wakenqa ashkhata pallakorqanku, wakintaj pisillata. 18Chaywanpis pallasqankuta chimpojtinku, ashkhata pallakojpaj mana puchorqachu, nitaj pisillata pallakojpajpis piserqachu. Sapa ujninku mashkhatachus mikhunankupaj jinalla pallakorqanku.
19Chantá Moisés nillarqataj: Ama pipis q'ayantinpaj jallch'akunkichejchu, nispa.
20Chaywanpis wakenqa Moisesta mana kasorqankuchu, q'ayantin mikhunankupaj jallch'akorqanku. Jallch'akusqankutajrí khuruykuspa, asnaykorqa. Chaymanta Moisesqa paykunapaj phiñakorqa.
21Sapa paqarin sapa uj mashkhatachus mikhuyta yachasqankuman jinalla pallakoj kanku. Pampapi puchojtaj inti q'oñimojtinkama, unuyarparipoj. 22Sojta kaj p'unchaypitaj uj jinatawan pallakuyta aterqanku, sapa uj tawa kilota jina. Chayta rikuspa, israelitakunaj kurajninkukunaqa mashkhatachus pallakusqankuta Moisesman willarqanku. 23Moisestaj paykunata nerqa: Tata Dios ajinata kamachin: Q'ayaqa samarina p'unchay kashan, chay p'unchaytaj Tata Diospaj t'aqasqa. Chayrayku kunan chayachiychej imatachus chayachinaykichejta, t'impuchiychejtaj imatachus t'impuchinaykichejta. Chantá puchoj mikhunata q'ayapaj waqaychaychej, nispa.
24Moisespa nisqanman jina, israelitakuna puchusqan mikhunata q'ayantin mikhunankupaj waqaychakorqanku. Chayqa manaña khuruykorqachu, nitaj asnaykorqachu. 25Chaymanta Moisés nerqa: Kunanqa samarina p'unchay, Tata Diospaj t'aqasqa p'unchaymin. Kay p'unchaypi mana pampapi mikhunata tarinkichejchu. Chayrayku qayna jallch'akusqaykichej mikhunata mikhuychej. 26Sojta p'unchayta sapa paqarin mikhunata pallakullankichej. Qanchis kaj p'unchayrí samarina p'unchay, chay p'unchaypeqa mana imapis kanqachu, nispa.
27Jinapis wakin israelitakuna samarina p'unchaypi pallakoj llojserqanku, nitaj imatapis tarerqankuchu. 28Chayrayku Tata Dios Moisesta nerqa: Mayk'ajkamataj qankuna kamachisqayta, yachachisqayta ima mana kasuyta munankichejchuri? 29Yuyarikuychej noqa Tata Dios samarinapaj uj p'unchayta qoykichej. Chayrayku sojta kaj p'unchaypi mikhunataqa iskay p'unchaypaj qosqaykichej. Ajinaqa sapa ujniykichej toldoykichejpi qhepakunaykichej tiyan, samarina p'unchayta ama toldoykichejmanta llojsinaykichejpaj, nispa. 30Chantá israelitakunaqa qanchis kaj p'unchaypi samarikorqanku.
31Pallakusqankuta israelitakunaqa “maná”, nispa suticharqanku. Pallakoj kanku chayqa, culantro mujuman rijch'akoj karqa, yurajsitu, misk'itaj. Q'apaynintaj abeja misk'iyoj t'antapis kanman jina karqa.
32Chaymanta Moisés israelitakunata nerqa: Tata Dios ajinata kamachin: Maná nisqata iskay kilota waqaychaychej, wawaykichejkuna yachanankupaj Egiptomanta qankunata orqhomushaspa, ima t'antatachus mikhuchisqayta, nispa.
33Chantá Moisés Aaronta nerqa: Iskay kilo yaykoj mankaman chay “maná” nisqata churay. Chaytataj Tata Diospa ñawpaqenman churanki. Ajinamanta wawanchejkuna maná nisqa t'antata rejsinankupaj waqaychasqa kanqa, nispa.
34Chantá Aaronqa Diospa arcanpa ñawpaqenman maná nisqayoj mankata churarqa, Tata Dios Moisesman kamachisqanman jina.
35Chaymantapacha israelitakunaqa tawa chunka watata maná nisqa t'antata mikhorqanku. Mikhorqanku runa karqaña chaynejman chayanankukama. Chayqa Canaán suyoj mojonninña karqa.
36Israelitakunaqa maná nisqata gomer nisqa chimpunawan chimporqanku. Uj gomertaj iskay kilo jina karqa.
Currently Selected:
Éxodo 16: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
