Éxodo 17
17
Chhankamanta yaku llojsin
(Nm 20.1-13)
1Chay qhepata tukuynin israelitakuna Sin nisqa ch'innejmanta purirerqanku. Tata Dios kamachisqanman jina sayaspa, sayaspa rerqanku. Chantá Refidinman chayaspa, jarakorqanku. Chaypitaj yaku ujyanankupaj mana karqachu. 2Chayrayku israelitakuna phiñarikuspa, Moisesta nerqanku: Ujyanaykupaj yakuta qowayku, nispa. Moisestajrí paykunata nerqa: Imaraykutaj noqamanta yakuta mañakushawankichejri? Imaraykutaj Tata Dios atiyniyoj kasqanmanta iskayrayashankichejri? nispa.
3Chaywanpis israelitakunaqa manchay yaku ch'akiywan kaspa, Moisespaj thutorqanku: Ima nispataj Egiptomanta orqhomuwarqaykuri? Wawaykuta, uywaykutawan yaku ch'akiymanta wañuchinawaykupajchu kayman pusamuwayku? nispa.
4Chantá Moisesqa Tata Diosmanta mañakorqa: Imanasajtaj kay runakunawanri? Tumpamantawan rumiwan ch'anqaspa, wañuchiwanqanku, nispa.
5Chantá Tata Diosqa Moisesta nerqa: Israelitakunamanta ñawpaykuy, pusaytaj paykunamanta wakin kurajkunata. Nilo mayuta wajtarqanki, chay varaykitapis apallankitaj. 6Noqatajrí Horeb orqopi, chhanka chaynejpi suyasqayki. Qantaj chaypi chhankata varaykiwan wajtanki, yakutaj ujyanankupaj chaymanta llojsimonqa, nispa. Moisestaj israelitakunaj kurajninkukuna qhawashajtinku, chayta ruwarqa.
7Chantá chaynejta “Meriba”#17.7 Meriba: Hebreo rimaypi niyta munan “quejakuy”, chayrí “qhetey”. sutiwan suticharqa, chaypi israelitakuna Moisespaj rimasqankurayku. Jinallataj chay cheqata sutichallarqataj “Masah”,#17.7 Masah: Hebreo rimaypi niyta munan “yachariy”, chayrí “alliymanta riy”. nispa. Ajinata suticharqa, imaraykuchus chaypi Tata Diosmanta iskayrayarqanku: Noqanchejwanchu Tata Dios kashan, manachu? nispa.
Amalecitakunawan maqanakunku
8Israelitakuna Refidinpi kashajtinku, amalecitakuna#17.8 Amalecitakuna: Paykuna Palestina nisqa cheqamanta uranejpi tiyakorqanku, Edom suyu chantá Néguev nisqa qayllanejpi. Amalecitakunaqa tukuy Cadés nisqa cheqanejta jap'erqanku. Nm 13.29; 1 S 15.7; Gn 14.7. paykunawan maqanakoj llojsiykamorqanku. 9Chantá Moisés Josueta nerqa:#17.9 Kay chijllaypi ñawpaj kutita Josué rikhurin. Josueqa Moisespa paña makin karqa. Ex 24.13; Nm 11.28; Dt 1.38. Qharikunamanta wakinta ajllaspa, amalecitakunawan maqanakoj riy. Noqataj q'aya orqo patapi kashasaj, Diospa qowasqan varata pataman oqharispa, nispa.
10Jinapi Josueqa Moisespa nisqanman jina, amalecitakunawan maqanakoj rerqa. Chaykama Moiseswan, Aaronwan, Jurwan ima orqo pataman wicharerqanku. 11Moisés makinta pataman oqharejtin, israelitakuna amalecitakunata atipasharqanku. Moisés makinta urayk'uchejtinrí, amalecitakunañataj israelitakunata atipasharqanku. 12Moisespa makin utiykusqanrayku, uj rumita churaspa chaypi Moisesta tiyacherqanku. Aaronwan, Jurwantaj sapa uj Moisespa makinta pataman jap'erqanku. Ajinamanta Moisesqa inti chinkaykunankama makinta oqharispallapuni karqa. 13Josuetaj amalecitakunata espadawan wañurachispa atipaykorqa.
14Chantá Tata Dios Moisesta nerqa: Kayta sapa kuti yuyarinapaj uj p'anqaman qhelqay. Josuemantaj kay jinata niy: Qhepanejman noqa kay pachamanta tukuy amalecitakunata chinkachinayta, nispa.#Dt 25.17-19; 1 S 15.2-9.
15Chantá Moisés chaypi Tata Diospaj uj altarta ruwarqa, suticharqataj: “Tata Diosmin ñawpajta rej”, nispa. 16Jinaspataj Moisés nerqa:
Amalecitakuna Tata Diospa contranta oqharikusqankurayku
Tata Diosqa wiñaypajmin paykunawan maqanakonqa, nispa.
Currently Selected:
Éxodo 17: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
