Kessa 32
32
Worqa Mara Misile
1Asay, Musey zumaa bollafe wodhanaw gam7idaysa be7ida wode Aaronako yidi, “Nuna kaalethishe naagana xoossata nuus ootha. Gibxe biittafe nuna kessida Musey waanidaako eroko” yaagidosona. 2Aaroni entako, “Hinte macheta, hinte adde naytanne hinte macca nayta haythan de7iya worqaa kessidi, taw haa ekidi yiite” yaagis. 3Asi ubbay banta haythafe worqaa kessidi, Aaronas ehidosona. 4I hessa entafe ekidi, taman sheeshidaape guye, qoxidi, worqa mara misile oothidi medhis.
Enti, “Isra7eeleto, nuna Gibxe biittafe kaalethidi kessida nu xoossati haysata” yaagidosona. 5Aaroni hessa be7ida wode, he maraa sinthan yarsho besse giigisidi, “Wonto Godaa bonchiya ba7aale gallas gidana” yaagidi erisis. 6Wontetha gallas guura asay dendidi, xuussa yarshonne issifetetha yarsho yarshidosona. Yaatidi, asay maanawunne uyanaw uttidosona. Mi uyi simmidi, duranawunne pokoba hananaw dendidosona.
7Goday Museko, “Neeni Gibxefe kessada, ehida ne asay nagara oothidi, bantana tunisida gisho ellesada duge wodha. 8Taani enta kiitida ogiyape enti ellesidi shiretidosona. Worqa sheeshidi mara misile oothidi, bantaw eeqa medhidi iya goyinnidosona. Iyaw yarshidi, ‘Nuna Gibxe biittafe kessida nu xoossay haysa’ yaagidosona. 9Goday Museko, ha asay ay mela wozana muumeko ta be7as. 10Ha77i ta hanqoy enta bolla eexin, taani enta dhaysanaw giigetida gisho, neeni tana diggofa. Yaatada, taani nena gita dere oothana” yaagis.
11Shin Musey ba Godaa, Xoossaa haysada yaagidi woossis; “Abeeti Godaw, neeni ne gita wolqaaninne ne mino kushiyan Gibxefe kessada ehida ne asaa bolla ne hanqoy ayis eexii?#Tay 14:13-19. 12Ne hessa oothiyaba gidiko, Gibxeti, ‘Goday entana dereta bolla wodhanawunne biittafe pittidi dhaysanaw kessis’ ayis gaanee? Ne yashshiya hanquwafe simma. Ne asaa dhaysanaw qopidaysa agga. 13Ne aylleta Abrahaame, Yisaaqanne Yayqooba hassaya. Neeni entaw, ‘Taani hinte sheesha salo xoolintoda darsana; taani hintew immana gida ha biitta ubbaa hinte sheeshatas immana; enti he biitta merinaw laattana’ gada ne huuphen ne caaqida caaquwa qopa” yaagis. 14Hessa gisho, Goday ba deriya bolla iitabaa ehanaw qopidaysa aggidi, enta maaris.
15Musey nam7u baggara xaafetida, tammu kiitati de7iya nam7u loche shuchata ba kushen oykidi, zumaape duge wodhis. 16He masetida shuchata giigisiday Xoossaa; shuchata bolla woocidi xaafidayka Xoossaa.
17Iyyasuy asaa kooshincha si7ida wode, Museko, “Asay siiratida bessan ola waasoy si7etees” yaagis.
18Musey zaaridi, “Haysi xoonida asa ceeqo woyko xoonetida asa yeeho gidonashin, yetha waaso” yaagis.
19Musey gutaako matida wode maranne dursaa be7idi daro hanqetis. He wode ba kushen oykidi yida, masetida shuchata zumaa xaphon holidi mentherethis. 20Enti medhida maraa ekidi, taman xuuggis. Hessafe guye, liiqana gakanaw gaaccidi haathara maadhidi, Isra7eele asay uyanaada oothis.
21Musey Aaronako, “Ha asay new ay oothin, enta haysa mela iita nagara banta bolla oothana mela oothadii?” yaagis.
22Aaroni zaaridi, “Ta godaw, tana hanqetofa. Ha asay iitaba oothanaw ay mela koyaako ne eraasa. 23Enti, ‘Nuna Gibxefe kessidi ehida, Musey waanidaako nu eroko. Hessa gisho, kaalethiya xoossata nuus ootha’ yaagidosona. 24Taani entako, ‘Hinte haythan de7iya worqaa kessidi, hammite’ yaagas. Enti taw immida worqaa taani taman yeggin, ha mara misiley keyis” yaagis.
25Aaroni asaa coo yeddi aggin, asay ba morketa sinthan kawuyidi, kadhetidaysa Musey be7is. 26Hessa gisho, Musey gutaa geliya pengiyan eqidi, “Godaa bagga gidiya asi oonika taako yo” yaagis. He wode Leeweti ubbay iyako shiiqidosona.
27I, entako, “Goday, Isra7eele Xoossay, hinte issoy issoy hinte mashshaa shoddidi, gutaas ha pengefe hini penge gakanaw bidi, hinte ishata, hinte laggetanne hinte shoorota wodhite” yaagis. 28Leeweti Musey kiitidaysada oothidi, he gallas heedzu mukulu gidiya asaa wodhidosona. 29Musey Leewetako, “Hachi hinte, hinte naytanne hinte ishata wodhanaw kiitetidi hintena Godaas dummayideta. Goday hintena anjis” yaagis.
30Wontetha gallas Musey asaako, “Hinte iita nagara oothideta; shin ha77i taani Godaako zuma bolla keyada, ooni eri hinte nagaras atotethi demmonna aggike” yaagis. 31Yaatin Musey Godaako simmidi bidi, “Ha asay iita nagaraa oothidosona; enti bantaw worqafe xoosse medhidosona. 32Shin hayyana, ha77i enta nagaraa atto yaaga. Hessi hanonnaba giiko, ne asaa ne xaafida mazgabiyape ta sunthaa qucha” yaagis.
33Goday zaaridi Museko, “Taani ta mazgabiyape quchana asaa sunthay, ta bolla nagara oothidaysata sunthaa. 34Ha77i bada, ha asaa taani new odida bessaa kaaletha. Ta kiitanchoyka nena kaalethanaysa akeeka, shin taani ha asaa enta nagara gisho seerana wodey yaanaysi attenna” yaagis.
35Aaroni worqafe mara misiliya medhanaada oothiday asaa gidiya gisho, Goday asaa bolla wolqaama gado yeddis.
Currently Selected:
Kessa 32: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
