Kessa 31
31
Basili7eelanne Eliyaaba
1Goday Museko haysada yaagis; 2“Taani Yihuda sheeshape gidida Huura na7aa na7aa, Ure na7aa, Basili7eela dooras. 3Taani iya ta Ayyaanan kunthas; taani hiilla, akeekanne ooso ubbaa oothiya era iyaw immas. 4Hessika, hiillan oothana oosota halchidi worqafe, birapenne naase biratape dumma dummaba kessidi oothanaasa. 5Hessadaka, al7o shuchu massidi giigiseysa, mithi masseysanne hara ooso ubbaa oothana mela cincatethi immas. 6Qassi iya maaddana mela Daane sheeshi gidida Ahisamaaka na7aa Eliyaaba dooras. Taani nena kiittidaba ubbaa enti oothana mela kushe hiilla eriya harata ubbaas gita eratethi immas. 7Enti oothanabati, Geeshsha Dunkaaniya, Caaqo Taabotiya, iya bolla wothiya nagara atotetha kamaa, Dunkaaniya giddon go7etiya miishe ubbaa, 8xarpheezanne iya miisheta, walahi bayna worqafe oosetida xompe wothiya kocaanne iya miishe ubbaa, ixaane cuyisiya xarpheezaa, 9xuussa yarsho bessinne iya miishe ubbaa, meecha keriyanne iya tohuwa, 10Aaroninne iya nayti kahinetethan haggaazishe ma7iya kahinetetha ma7uwa, 11shuumatetha zaytiyanne Geeshsha Bessaas haniya sawiya ixaaniya, taani nena kiitidaysada enti oothana” yaagis.
Sambaata
12Goday Muse haysada yaagidi kiittis; 13“Isra7eele asaa, ‘Ta Sambaata naagite. Hessi taani, Goday, hintena taw geeshsha dere oothada dooridaysa bessiya malla gididi, yaana yeletetha ubbaas taapenne hintefe giddon de7o. 14He gallasay geeshshi gidiya gisho, iya bonchite. Sambaata bonchonaynne he gallasan ooso oothiya oonika ta asaa giddofe dhayo woyko hayqo. 15Hinte ooso oothanaw bessiya usupun gallasati de7oosona. Shin laapuntha gallasay Godaas dummatida, shempo gallas. Sambaata gallasan ooso oothiya oonika hayqo. 16Isra7eele yeletetha ubbay ha Sambaata gallasaa merina caaqo malla oothidi boncho. 17Taani usupun gallasan saluwanne sa7aa medhida gishonne laapuntha gallasan ooso aggada shempida gisho, ta giddoninne Isra7eeleta giddon hessi merinaw eqidi de7iya malla gidana’ yaaga” yaagis.
18Goday Muse Siina zuma bolla odiseysa ongida wode, I ba biradhen xaafida tammu kiitata oykida nam7u loche shuchata Muses immis.
Currently Selected:
Kessa 31: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
