Kessa 33
33
Isra7eele Asay Siina Zumaape Denduwa
1Hessafe guye, Goday Museko, “Neeninne ne Gibxefe kessida asay ha bessaafe dendidi, taani Abrahaames, Yisaaqas, Yayqoobasinne enta sheeshatas immana yaagada caaqida biitta biite. 2Taani hinte sinthan kiitanchuwa kiittana. Kanaaneta, Amooreta, Hiteta, Parzeta, Hiwetanne Yaabuseta taani gooddada kessana. 3Maathinne eessi goggiya he biitta biite. Shin hinte, wozani muumida asi gidiya gisho ta hintena ogen dhaysona mela hintera biike” yaagis.
4Asay he yashshiya odaa si7idi yeekidosona. He wodepe doomidi ubbay banta alleequwa aathibokona. 5Goday Museko, Isra7eele asaas haysada yaagada oda yaagis; “Hinte wozana muume asi. Taani hintera hari attoshin guutha wodeska biiko, hinte taape dhayana. Ha77i hinte, hinte alleeqota kessite; taani hinte bolla oothanaba bessaana yaaga” yaagis. 6He wode Isra7eeleti Koreeba zumaa aggidi bidaape guye, banta alleeqota aathibokona.
Gahetetha Dunkaane
7Isra7eele asay bishe siiratiya guta ubban Musey dunkaaniya gutaape haassidi tokees. He dunkaaney, “Godaara gahetiya Dunkaane” geetetidi xeegetis. Godaa oychanaw koyiya ubbay yaa bees. 8Musey dunkaaniyako biya wode asa ubbay ba dunkaaniya pengen pengen eqidi, Musey yaa gelana gakanaw iya be7oosona. 9Musey yaa gelidaape guye, shaara tuussay wodhidi Dunkaaniya pengen eqees. Goday shaara giddon gididi Musera odetees. 10Asay shaara tuussa Dunkaaniya pengiyan be7ida wode ubban, ba pengen pengen gulbatidi Godaas goyinnoosona. 11Asi ba laggera odeteysada Goday Musera som7on odetees. Hessafe guye, Musey gutaa simmees. Shin iya maaddiya na7atethay, Nawe na7aa Iyyasuy, Godaara gahetiya Dunkaaniyape shaaketenna.
Goday Ba Asaas Gelida Qaala
12Musey Godaako, “Neeni tana, ha asaa ta gida biitta kaaletha yaagadasa. Shin taara baana mela neeni kiittey ooneko, tana erisabaaka. Neeni, tana ereysanne tanan ufayteysa taw qoncisadasa. 13Hessi tuma gidiko, ta nena haggaazana melanne guja ufaysana mela ne ogiya tana tamaarsa. Ha asay ne dere gideysa be7a” yaagis.
14Goday zaaridi, “Taani, neera baana melanne new saro immana mela koyay?” yaagis.
15Musey zaaridi, “Neeni nuura boonnaba gidiko, haysafe nuna kessofa. 16Neeni nuura boonnaba gidiko, tananinne ne asan ne ufaytidaysa asa ubbay waatidi eranee? Biitta ubban de7iya hara asa ubbaafe taaninne ne asay dummatey ne nuura de7eysan gidenneyee?” yaagis.
17Goday Museko, “Taani nena eriya gishonne nenan ufaytida gisho, ne tana oychidaysa ubbaa oothana” yaagis.
18Musey Godaako, “Hayyana ne kumetha bonchuwa tana bessa?” yaagis.
19Goday zaaridi, “Taani ta maarotanne ta lo77otetha ubbaa ne sinthara aathana. Ta geeshsha sunthaa ne matan awaajana. Taani Godaa; ta dooridaysata maarananne entaw qadhetana. 20Shin oonika ta som7uwa be7idi paxa doonna gisho, neeni ta som7uwa be7aka” yaagis.
21Shin, “Neeni zaalla bolla eqanaw haysan ta matan bessi de7ees. 22Ta bonchoy aadhiya wode taani za77ida zaalla giddon nena wothana. Ta aadhana gakanaw ta kushiyan nena kammana. 23Hessafe guye, taani ta kushiya denthana; neeni ta zokuwa be7ana, shin ta som7uwa be7aka” yaagis.
Currently Selected:
Kessa 33: GFBLVF
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Ethiopia
