Bɔfo 2

Mumi Klɔuklɔu ɔ bami

1Benɛ Pentekoste ligbi (loo ligbi nɛ ji nyingmi enyɔ ɔ) su ɔ, mɛ tsuo a nya ba bua kɛ juɛmi kake ngɛ he kake. 2Nɛ si kake ɔ, pɛmi ko nɛ ngɛ kaa kɔɔhiɔ nɛ nya wa ko je hiɔwe ba, nɛ e ba hyi we he nɛ a hii si ngɛ ɔ tɔtɔɔtɔ. 3Nɛ ni kome nɛ a gba mi nɛ ngɛ kaa la lilɛhi pue; nɛ a ba ma a yi kpɛti kakaaka. 4Nɛ Mumi Klɔuklɔu ba hyi mɛ tsuo kulaa tɔtɔɔtɔ, nɛ a bɔni gbi slɔɔto slɔɔtohi tumi, kaa bɔ nɛ Mumi ɔ ngɔ wo a nya a.

5Se Yudafohi Mawu gbeye yeli kome ngɛ Yerusalem, nɛ je majemaje kulaa nɛ ngɛ zugba a nɔ ɔ nɔ. 6Se benɛ a nu kikɛmɛ a pɛmi nɛ ɔ ɔ, nihi babauu ba bua a he nya nɛ a he mi po ejakaa nɔ tsuaa nɔ nu kaa a ngɛ lɛ nitse e ma mi gbi tue. 7Nɛ mɛ tsuo a nya kpɛ a he nɛ a hɛ mi pee mɛ yaa, nɛ a de a he ke: “Oʼɛ, anɛ nihi nɛ ngɛ munyu nɛ ɔ tue tsuo nɛ ɔ, pi Galileabihi ʼi lo? 8Se kɛ pee kɛɛ nɛ wa ti nɔ tsuaa nɔ ngɛ lɛ nitse e ma mi he nɛ a fɔ lɛ ngɛ ɔ gbi nue nɛ ɔ? 9Partiabihi kɛ Mediabihi kɛ Elambihi, kɛ nihi nɛ ngɛ Mesopotamia kɛ Yudea kɛ Kapadokia, Ponto kɛ Asia, 10Frigia kɛ Pamfilia, Mizraim kɛ Libia ni ɔmɛ a mi ngɛ Kireene kasa nya, kɛ nibwɔhi nɛ je Roma, Yudafohi kɛ nihi nɛ plɛ Yudafohi, 11Kretabihi kɛ Arabiabihi: Wa ngɛ nue kaa a ngɛ Mawu ni ngua amɛ jajee ngɛ wa je gbihi a mi.” 12Nɛ mɛ tsuo a nya kpɛ a he nɛ a dɛ yaa, nɛ nɔ nɛ de nɔ nɛ ke: “Kɛ ji enɛ ɔ sisi kɛɛ?” 13Se ni kome hu ye fɛu ke: “A de dã.”

Petro munyu nɛ e tu

14Kɛkɛ nɛ Petro kɛ ni nyɔngma kɛ kake ɔ te si da si, nɛ e wo e nya nɔ nɛ e tu munyu tsɔɔ asafo ɔ ke: “Yuda nyumuhi kɛ nihi kulaa nɛ ngɛ Yerusalem, nyɛ na nɛ nyɛɛ le enɛ ɔ, nɛ nyɛɛ bu ye munyu ɔ tue: 15Tsa pi dã nɛ ni nɛ ɔmɛ de kaa bɔ nɛ nyɛ ngɛ susue ɔ, ejakaa mɔtu ngmlɛ nɛɛ kɛkɛ́ ji nɛ ɔ nɛ; 16se mohu enɛ ɔ ji nɔ́ nɛ gbalɔ Yoel de ɔ ke:

17(Mawu ke:)

‘Nɛ e maa ba mi ngɛ nyagbe ligbi ɔmɛ a nɔ,

Kaa ma nɛ ye mumi ɔ ngɔ pue he lo kulaa nɔ,

Nɛ nyɛ bimɛ nyumu ɔmɛ kɛ nyɛ bimɛ yi ɔmɛ maa gba,

Nɛ nyɛ nihewi ɔmɛ maa na ninamihi,

Nɛ nyɛ nikɔtɔma a mɛ maa nla nlamihi,

18Nɛ, ye tsɔli nyumuhi kɛ yi ɔmɛ hu a nɔ

Ma nɛ ye mumi ɔ ngɔ pue

Ngɛ jamɛ a ligbi ɔmɛ a nɔ, nɛ a maa gba.

19Nɛ ma pee nyakpɛ nihi ngɛ hiɔwe

Kɛ okadihi hu ngɛ zugba a nɔ,

Muɔ kɛ la kɛ lakusu.

20Pu maa tsɔ diblii

Nɛ nyɔhiɔ ma plɛ muɔ

Loko Nyɔmtsɛ ɔ ligbi ngua nɛ ngɛ nyami ɔ maa ba

21Nɛ e maa ba mi kaa nɔ tsuaa nɔ nɛ ma kpa

ngmlaa kɛ tsɛ Nyɔmtsɛ ɔ biɛ ɔ, a ma he e yi wami.’

22“Tsaatsɛmɛ Israelbihi, nyɛɛ bu kikɛmɛ a munyu nɛ ɔ tue. Yesu Nazare no ɔ ji nyumu nɛ Mawu kɛ he wami ni tsumihi kɛ nyakpɛ nihi kɛ okadihi nɛ e gu e nɔ kɛ pee ngɛ nyɛ kpɛti ɔ ye e he odase ngɔ tsɔɔ nyɛ, kaa bɔ nɛ nyɛ nitsɛmɛ nyɛ le ɔ. 23Yesu nɛ ɔ nɛ a je lɛ ngɛ Mawu yi mi tomi kɛ e ni nɛ e le ngɔ to ɔ nya ngɔ ha a, nyɛ gu nihi nɛ li mlaa amɛ a nine nɔ nyɛ sɛu lɛ nɛ nyɛ gbe lɛ. 24Lɛ nɔuu si Mawu tle nɛ e pɛne gbenɔ piimi kpa amɛ, ejakaa gbenɔ be nyɛe e nya tsimi. 25Ejakaa David de ngɛ e he ke:

‘I naa Nyɔmtsɛ ɔ ngɛ ye hɛ mi daa,

Ejakaa e ngɛ ye hiɛ ɔ nɔ, kone ma ko dede.

26Lɔ ɔ he ɔ ye tsui nɔ ye mi,

Nɛ ye lilɛ ngɛ nyae,

Nɛ jeha nɛ ɔ ye he lo hu maa jɔɔ e he ngɛ hɛ kɛ nɔ fɔmi mi,

27Ejakaa o be ye klaa sie ngɛ gbeje,

Nɛ o be hae nɛ o nɔ klɔuklɔu ɔ nɛ puɛ.

28O ha i le wami blɔ ɔ,

Nɛ o ma ha ye tsui maa nɔ ye mi faa ngɛ o hɛ mi.’

29“Tsaatsɛmɛ kɛ mamimɛ, nyɛ ha ma tu munyu faii ngɔ tsɔɔ nyɛ ngɛ blemano David he, kaa e gbo nɛ a pu lɛ, nɛ e yɔkɔ ngɛ wa kpɛti kɛ ba si mwɔnɛ. 30Akɛnɛ gbalɔ ji lɛ nɛ e le kaa Mawu ka lɛ kita ke e mi mi bimɛ ɔmɛ eko maa hi e sɛ̃ ɔ nɔ he je ɔ, 31e na ngɔ to nɛ e tu Kristo si temi ɔ he munyu, kaa a be e klaa sie ngɛ gbeje nɛ e he lo hu be puee. 32Kikɛmɛ a Yesu nɛ ɔ Mawu tle lɛ si; lɔ ɔ he odase yeli ji wɔ kulaa. 33Jeha nɛ ɔ akɛnɛ a wo e nɔ kɛ ho Mawu hiɛ ɔ nine nɔ ya nɛ e na Mumi Klɔuklɔu ɔ he si womi ɔ kɛ je Tsɛ ɔ dɛ he je ɔ, e nɛ nɔ́ nɛ nyɛ ngɛ nae nɛ nyɛ ngɛ nue nɛ ɔ ngɔ pue si. 34Ejakaa David yɛ hiɔwe, cse lɛ nɔuu lɛ e ke:

‘Nyɔmtsɛ ɔ de ye nyɔmtsɛ ɔ ke:

Hii ye hiɛ ɔ nɔ,

35Kɛ yaa su be nɛ ma ngɔ o henyɛli ɔmɛ ngɔ pee

o nane si maangoo.’

36“Lɔ ɔ he ɔ, ha Israel we ɔ kulaa nɛ le tutuutu kaa Mawu ngɔ kikɛmɛ a Yesu nɛ nyɛ sɛu lɛ nɛ ɔ ngɔ pee Nyɔmtsɛ kɛ Kristo tsuo.”

37Benɛ a nu enɛ ɔ, e gbɔ a tsui mi, nɛ a de Petro kɛ bɔfo ɔmɛ nɛ piɛ ɔ ke: “Tsaatsɛmɛ kɛ mamimɛ, kɛ wa maa pee kɛɛ?” 38Petro de mɛ ke: Nyɛ tsake nyɛ tsui nɛ nyɛ ti nɔ tsuaa nɔ nɛ ha a baptisi lɛ ngɔ wo Yesu Kristo biɛ mi, konɛ a ngɔ nyɛ he yayami ɔmɛ ngɔ pa nyɛ, nɛ nyɛ ma na Mumi Klɔuklɔu nɔke nɔ ɔ. 39Ejakaa si womi ɔ nyɛ kɛ nyɛ bimɛ kɛ nihi tsuo nɛ ngɛ se lokoo, nihi abɔ nɛ Nyɔmtsɛ wa Mawu ɔ ma tsɛ kɛ maa ba a, a nɔ ʼi.”

40Nɛ e tu munyu kpahi fuu e kɛ ye odase nɛ e kɛ wo mɛ ga ke: “Nyɛ ha a he nyɛ yi wami kɛ je yi nɔ kpɛ̃kpɛ̃e nɛ ɔ mi.” 41Kɛkɛ nɛ nihi nɛhe e munyu ɔ ye ngɛ tsui mi jɔmi nya a, a baptisi mɛ, nɛ jamɛ a ligbi ɔ nɔuu ɔ, a ngɔ klaahi maa pee akpe etɛ ngɔ piɛ a he. 42Nɛ a hɛɛ bɔfo ɔmɛ a tsɔɔmi ɔ kɛ huɛ bɔmi ɔ kɛ abolo mi kumi ɔ kɛ sɔlemi kɛ pɛɛ kpami ɔmɛ a mi.

Ninɛmɛ nɛ he ye ɔmɛ a sihimi

43Nɛ gbeye nu nɔ tsuaa nɔ, nɛ a gu bɔfo ɔmɛ a nine nɔ kɛ pee nyakpɛ ni kɛ okadihi fuu. 44Nɛ nihi nɛ he ye ɔ kulaa ngɛ he kake, nɛ a pee a nihi tsuo kulaa kake. 45Nɛ a jua a zugba amɛ kɛ a he ni ɔmɛ, nɛ a dla ngɔ ha ni ɔmɛ tsuo bɔ nɛ he hia nɔ tsuaa nɔ. 46Nɛ daa ligbi ɔ, a kɛ juɛmi kake yaa sɔlemi we ɔ, nɛ a kuɔ abolo ngɛ wehi a mi, nɛ a kɛ bua jɔmi kɛ tsui klɔuu yeɔ ni, 47nɛ a jeɔ Mawu yi, nɛ a hɛ mi ba nyami ngɛ ma mluku ɔ kulaa hɛ mi. Nɛ Nyɔmtsɛ ɔ ngɔɔ nihi nɛ a he a yi wami ɔ ngɔ piɛɛ asafo ɔ he daa ligbi.

Currently Selected:

Bɔfo 2: DAN77

Highlight

Copy