Bɔfo 3

A tsa akpaketsɛ ko

1Ligbi ko gbɔkuɛ ngmlɛ etɛ, sɔlemi yami be ɔ, Petro kɛ Yohane nyɛɛ kɛ yaa sɔlemi we ɔ. 2Nyumu ko ngɛ nɛ ji akpaketsɛ kɛ je e nyɛ muklii mi, nɛ a woɔ lɛ daa kɛ ba hii si ngɛ sɔlemi we sinya nɛ a tsɛɛ sinya saminyayoo ɔ nya, konɛ e ba ni ngɛ nihi nɛ yaa sɔlemi we ɔmɛ a dɛ. 3Benɛ e na Petro kɛ Yohane nɛ a yaa sɛ sɔlemi we ɔ, e ba mɛ nɔ́ ko. 4Se Petro kɛ Yohane hyɛ lɛ too, nɛ Petro de lɛ ke: “Hyɛ wa hɛ mi.” 5E dɔ e hɛngmɛ to a nɔ, e hɛ ngɛ nɔ kaa e ma na nɔ́ ko kɛ je a dɛ. 6Se Petro ke: “Sika hiɔ kɛ sika tsu ɔ, i be eko; se nɔ́ nɛ i ngɛ ɔ, kɔlɔ ɔ i kɛ ngɛ mɔ hae nɛ ɔ nɛ: Ngɛ Yesu Kristo, Nazare no ɔ, biɛ mi ɔ, tee si nɛ o nyɛɛ!” 7Nɛ e pɛtɛ e hiɛ ɔ nine mi nɛ e wo e nɔ da si; nɛ amlɔ ɔ nɔuu ɔ, e nane kɛ e kpɔji nya amɛ a mi wa lɛ; 8nɛ e hlu da si nɛ e bɔni nyɛɛmi, nɛ e kɛ mɛ nyɛɛ kɛ sɛ sɔlemi we ɔ kɛ hlumi kɛ Mawu yi jemi. 9Nɛ ma mluku ɔ tsuo na lɛ nɛ e ngɛ nyɛɛe nɛ e ngɛ Mawu yi jee. 10Benɛ a kpa si kaa lɛ ji nɔ nɛ hii si ngɛ sɔlemi we ɔ sinya saminyayoo ɔ nya nɛ e hii nɔ bae ɔ, a he mi po nɛ a nya kpɛ a he babauu ngɛ nɔ́ nɛ a pee ha lɛ ɔ he.

Petro fiɛmi ngɛ sɔlemi we ɔ

11Akɛnɛ akpaketsɛ nɛ a tsa a ngɛ Petro kɛ Yohane bɛbɛ mi he je ɔ, ma a kulaa bu kɛ ba bua a he nyɛ ngɛ a ngɔ ngɛ ablanaa nɛ a tsɛɛ Salomo nɔ́ ɔ nɔ, nɛ a he mi po. 12Se benɛ Petro na enɛ ɔ ɔ, e de ma a ke: “Nyɛ Israel nyumuhi, mɛ he je nyɛ hɛ mi ngɛ nyɛ yaa pee ngɛ enɛ ɔ he? Aloo mɛ he je nyɛ ngɛ wɔ hyɛe too kikɛ, kaa nɔ́ nɛ wɔ nitsɛmɛ wa he wami loo wa Mawu jami nya waa kɛ ha nɔ nɛ ɔ ngɛ nyɛɛe nɛ ɔ? 13Abraham kɛ Isak kɛ Yakob Mawu ɔ nɛ ji wa tsɛmɛ a Mawu ɔ wo e tsɔlɔ Yesu hɛ mi nyami; nɔ nɛ nyɛ je lɛ ngɔ ha nɛ nyɛ kua lɛ ngɛ Pontio Pilato hɛ mi, benɛ lɛɛ e pee e juɛmi kaa e maa ngmɛɛ e he ɔ. 14Se nyɛɛ lɛɛ nyɛ kua nɔ klɔuklɔu kɛ dalɔ ɔ, nɛ nyɛ kpa pɛɛ ke a ngmɛɛ nɔmlɔ awi yelɔ mohu he ngɔ ha nyɛ, 15nɛ Wami Matsɛ ɔ, nyɛ gbe lɛ. Se Mawu tle lɛ si kɛ je gbeje, kɔlɔ ɔ nɔuu he odaseyeli ji wɔ. 16Nɛ e biɛ ɔ nɔ hemi kɛ yemi nya nɛ a tsa nɔ nɛ ɔ nɛ nyɛ ngɛ hyɛe nɛ nyɛ le ɔ; nɛ e nɔ hemi kɛ yemi ɔ ha e pee kpitikplii ngɛ nyɛ hɛ mi nɛ ɔ nɛ.

17“Nɛ jeha nɛ ɔ, mamimɛ, i le kaa fimi nɛ nyɛ li he je nɛ nyɛ pee kaa nyɛ nikɔtɔma amɛ kɛ̃. 18Se nihi nɛ Mawu de ngɔ to momo ngɛ we gbali ɔmɛ tsuo a nya, kaa Kristo maa na amanehlu ɔ, e ha e ba mi ja. 19Lɔ ɔ he ɔ, nyɛ tsake nyɛ tsui nɛ nyɛɛ kpale nyɛ se, kone a gbe nyɛ he yayami ɔmɛ, 20benɛ pee nɛ he jɔmi be nɛ je Nyɔmtsɛ ɔ hɛ mi kɛ ba, konɛ e tsɔ Yesu Kristo nɔ nɛ e je ngɔ to nyɛ momo ɔ; 21nɔ nɛ sa kaa e ya hi hiɔwe kɛ ya su nihi kulaa a blɔnya tomi be nɛ Mawu tu he munyu ngɛ e gbali klɔuklɔu ɔmɛ a nya kɛ je blema a. 22Ejakaa Mose de tsɛmɛ ɔmɛ ke: ‘Nyɔmtsɛ nyɛ Mawu ɔ, ma tle gbalɔ ko nɛ ngɛ kaa imi si kɛ maa je nyɛ nyɛmimɛ ɔmɛ a kpɛti ngɔ ha nyɛ. Nyɛɛ bu lɛ tue ngɛ nihi kulaa nɛ e ma de ngɔ tsɔɔ nyɛ ɔ mi. 23Nɛ e maa ba mi kaa nɔ tsuaa nɔ nɛ be jamɛ a gbalɔ ɔ tue bue ɔ, a ma kpata e hɛ mi kulaa kɛ maa je ma a mi.’ 24Nɛ jeha nɛ ɔ gbali tsuo nɛ tu munyu kɛ je Samuel kɛ nihi nɛ nyɛɛ e se ɔ nɔ ɔ, wo kikɛmɛ a ligbi nɛ ɔmɛ hu tã ngɔ to. 25Nyɛ ji gbali ɔmɛ kɛ somi ɔ bimɛ, somi nɛ Mawu kɛ wa tsɛmɛ ɔmɛ so, benɛ e de Abraham ke: ‘O nina mi nɛ a maa gbaa zugba a nɔ wekuhi kulaa ngɛ’ ɔ. 26Nɛ Mawu tle e tsɔlɔ Yesu si ɔ, nyɛ kekle nyɛ ngɔ e tsɔ lɛ nɛ e ba gbaa nyɛ nɛ e kpale nyɛ ti nɔ tsuaa nɔ kɛ je e ni yayami ɔmɛ a he.”

Currently Selected:

Bɔfo 3: DAN77

Highlight

Copy