Bɔfo 1

1Teofilo, ngɛ ye kekle womi ɔ mi ɔ, i ngma nihi kulaa nɛ Yesu ba pee nɛ e tsɔɔ kɛ je e ni tsumi sisije ɔ, 2kɛ ya su ligbi nɛ a ngɔ lɛ kɛ ho hiɔwe ya a. Loko a ngɔ lɛ kɛ ho hiɔwe ya a, e gu Mumi Klɔuklɔu ɔ nɔ kɛ wo e kaseli nɛ e hla amɛ kita. 3E amanehlu ɔ se ligbi nyingmi eywiɛ ɔ, e gu blɔhi fuu a nɔ je e he kpo tsɔɔ e kaseli ɔmɛ kaa hɛ kalɔ, nɛ a na lɛ, nɛ e kɛ mɛ tu Mawu matsɛ yemi ɔ he munyu. 4Nɛ bene e kɛ mɛ ba kpe ɔ, e wo mɛ hiɔngɔ ke: “Nyɛ ko je Yerusalem, se mohu nyɛɛ mle tsɛ ɔ si womi ɔ nɛ nyɛ nu ngɛ ye nya a; 5ejakaa Yohane ɔ, nyu e kɛ baptisi, se nyɛɛ lɛɛ e be kɛe nɛ a kɛ Mumi Klɔuklɔu maa baptisi nyɛ.”

A ngɔ Yesu kɛ ho hiɔwe ya

6Jeha nɛ ɔ nihi nɛ ba bua a he nya a bi lɛ ke: “Mawetsɛ, anɛ kikɛmɛ a be nɛ ɔ mi o ma tle o matsɛ yemi ɔ si ngɔ ha Israel ɔ lo?” 7Yesu de mɛ ke: “Pi nyɛ blɔ nya ji kaa nyɛ maa le be ɔmɛ nɛ Tsɛ ɔ to ngɛ lɛ nitse e he wami nya a; 8se ke Mumi Klɔuklɔu ɔ na ba nyɛ nɔ ɔ, nyɛ ma na he wami nɛ nyɛ ma plɛ ye he odaseyeli ngɛ Yerusalem kɛ Yudea kɛ Samaria tsuo kɛ yaa su zugba a nyagbe he.” 9Benɛ e de enɛ ɔ se ɔ, a ngɛ lɛ hyɛe nɔuu, nɛ a wo lɛ, nɛ bɔku ko ngɔ lɛ kɛ je a hɛ mi kɛ ho.

10Nɛ benɛ e yaa nɛ a ngɛ hiɔwe hyɛe too ɔ, oʼɛ, nyumuhi enyɔ nɛ wo tade hiɔ daa si ngɛ a kasa nya, 11nɛ a ke: “Nyɛ Galilea nyumuhi, mɛni he je nyɛ daa si ngɛ hiɔwe hyɛe kikɛ? Kikɛmɛ a Yesu nɛ ɔ nɛ a ngɔ lɛ kɛ je nyɛ ngɔ kɛ ho hiɔwe ya nɛ ɔ ɔ, ye maa ba ja nɔuu, kaa bɔ nɛ nyɛ na kaa e yaa hiɔwe nɛ ɔ.”

Yuda nanemimalɔ

12Kɛkɛ nɛ bɔfo ɔmɛ kpale a se kɛ je yoku nɛ a tsɛɛ Nyuoku nɛ kɛ Yerusalem kɛmi maa pee Hejɔɔmi Ligbi blɔ nyɛɛmi ɔ kɛ ba Yerusalem ekohu. 13Nɛ benɛ a su lejɛ ɔ, a ya hiɔwe tsu ko mi, he nɛ Petro kɛ Yohane kɛ Yakobo kɛ Andrea, Filipo kɛ Toma, Bartolomeo kɛ Mateo, Yakobo, Alfeo bi ɔ kɛ Simon, ma he doolɔ ɔ, kɛ Yakobo bi Yuda hii ɔ. 14Ni nɛ ɔmɛ tsuo kɛ yi ɔmɛ kɛ Yesu nyɛ Maria kɛ e nyɛmimɛ nyumu ɔmɛ, kɛ juɛmi kake hɛɛ sɔlemi kɛ pɛɛ kpami wawɛɛ.

15Jamɛ a be ɔmɛ a mi ɔ, Petro te si da kaseli ɔmɛ a kpɛti, nihi nɛ bua a he nya a, maa pee nihi lafa kɛ nyingmi enyɔ, nɛ e ke: 16“Tsaatsɛmɛ kɛ mamimɛ, e sa kaa jamɛ a ngmami nɛ Mumi Klɔuklɔu ɔ de to ngɛ David nya ngɛ Yuda nɛ tsɔɔ nihi nɛ ya nu Yesu ɔ blɔ ɔ he ɔ nɛ ba mi. 17Ejakaa a bu lɛ ngɔ si wa nɔ, nɛ e ngɛ e blɔ nya ngɛ kikɛmɛ a sɔmɔmi nɛ ɔ mi.

18“Se kikɛmɛ a nyumu nɛ ɔ ngɔ e yayami nɛ e pee mi hiɔwo ɔ kɛ he abɔɔ, nɛ e ya ma e yi si, nɛ e mi gba enyɔ nɛ e mi ni tsuo pã pue si. 19Nihi tsuo nɛ ngɛ Yerusalem ɔ na le enɛ ɔ, lɔ ɔ he ɔ a tsɛɛ jamɛ a abɔɔ ɔ ngɛ mɛ nitsɛmɛ a gbi mi ke Akeldama, e sisi ji “muɔ abɔɔ”.

20“Ejakaa a ngma ngɛ Lahi a womi ɔ mi ke:

‘Ha e sihi he ɔ nɛ plɛ we doku,

Nɛ nɔ ko nɔ ko ko hi mi,’

kɛ; jeha nɛ ɔ hu:

‘Nɛ e sɔmɔmi ni tsumi ɔ ha nɔ kpa nɛ ngɔ.’

21“Lɔ ɔ he ɔ, e sa kaa nyumuhi nɛ kɛ wɔ nyɛɛ be tsuaa be nɛ Nyɔmtsɛ Yesu yaa baa ngɛ wa kpɛti, 22kɛ je Yohane baptisimi ɔ nɔ kɛ ya su ligbi nɛ a ngɔ lɛ kɛ je wa ngɔ kɛ ho hiɔwe ya a, a kpɛti nɔ kake nɛ plɛ e si temi ɔ he odase yelɔ ngɔ piɛ wa he.” 23Nɛ a hla ni enyɔ, Yosef nɛ a tsɛɛ lɛ Barsaba nɛ a wo lɛ Yusto hulɔ ɔ, kɛ Maria ngɔ da si. 24Nɛ a sɔle ke: “Mo, Nyɔmtsɛ nɛ o le nimli kulaa a tsui mi, tsɔɔ ni enyɔ nɛ ɔmɛ a ti nɔ nɛ o hla, 25kone e ngɔ kikɛmɛ a sɔmɔmi kɛ bɔfo ni tsumi nɛ Yuda je mi ngɔ lɛ nitse e blɔ ɔ.” 26Nɛ pa fɔ́ a nɔ sɔ, nɛ sɔ ɔ ya nɔ Maria nɔ, nɛ a bu lɛ ngɔ si bɔfo nyɔngma kɛ kake ɔ nɔ.

Currently Selected:

Bɔfo 1: DAN77

Highlight

Copy