ROMANOS 9
9
Dios axta apkelyéseykha énxet'ák Israel
1Nakso' ko'o sektahakxa nak sekpeywa eñama sekteme may'áseyam Cristo Jesús, matnehek cha'a ko'o sekmowána amya'a. Elchetamso ewáxok ko'o keñamak sektemésesa ekmámnaksoho s'e, eñama sepeykesáseyak ma'a Espíritu Santo; 2awanhek ko'o selapwayam, megkamassegweykmok nahan eklegeykegkoho ewáxok, 3weykmók nahan sekmámenyého ko'o kasók setnésesakxa Dios, tén han henyókasek ma'a Cristo, ewanchek kexaha apasmok ẽlyáxeg'a sektaha enxoho xa, cham'a sekpeywomo xamo' nak. 4Hakte Israel aptawan'ák neptámen ma'a, apkelmomchek axta nahan Dios aptéma apketchek xa.#Ex 4.22. Aphegkek axta Dios nepyeseksa xa yetlo apcheymákpoho, apmésegkek axta anhan ma'a ekhémo mók apkelpakhetchásamákpoho nak Dios, tén han ma'a Moisés segánamakxa apagkok, apmések axta anhan ektémakxa nelpeykesamo Dios kañe' tegma appagkanamap, apmésegkek axta anhan appeywa yakweykenxa etnehek. 5Enxet'ák judíos apteme aptawan'ák neptámen ma'a ẽlyepmeyk nano' negko'o, apheyásamákpók axta énxet'ák judíos apwaya Mesías, cham'a aptémakxal'a énxetók xamo', aptaha nak Dios neyseksa m'a ekyókxoho aksok nak. Apcheymákpoho sat cha'a kóltemésesek Dios, katnahagkok sat nahan cha'a.
6Magwanchek anxének megkatnama m'a aptémakxa axta appeywa Dios apmésama m'a énxet'ák Israel; hakte háwe apyókxoho énxet Israel aptawan'ák neptámen apteme ekmámnaksoho apkeleñama m'a nepyeseksa énxet'ák Israel. 7Háwe apyókxoho Abraham aptawan'ák neptámen aptamhéyak ekmámnaksoho Abraham apketchek, aptemegkek axta eyke Dios apkenagkama Abraham se'e: “Isaac sat yenyék aptekkeso aptawan'ák neptámen xép.”#Gn 21.12. 8Cháxa segya'asásegwokmo nak negko'o megkañama nenteme Dios apketchek ma'a ektémakxa enxoho nempeywa; akke apteme Dios apketchek ma'a énxet'ák apxeyenma axta Dios etnehek apketchek, cháxa apkelxénamakpo nak cha'a aptaha nakso' Abraham aptawan'ák neptámen xa. 9Hakte keso aptémakxa axta appeywa Dios apmésama Abraham se'e: “Awatak sat makham ko'o ekwákxo enxoho makham se'e negwánxa nak, kategkesek sat étche apkenna' Sara.”#Gn 18.10.
10Háwe ekwánxa agkok sekxéna xa; akke anhan peyk axének ma'a apkánet Rebeca étchek axta, aptaha axta apyap ma'a Isaac, negko'o egyap nano'. 11-13Axta aptemék apkenagkama Dios Rebeca s'e: “Apsexyok sat etnehek apkemha apmonye apagkok ma'a apepma',”#Gn 25.23. cham'a mepaleykemxa axta makham xa énxet'ák nak, cham'a meláneykegkaxa axta makham aksok xama enxoho, aksok ektakmela, tén han aksok ekmaso nak. Hawók nahan ektémakxa nak ekxeyenma eknaktáxésamaxche s'e: “Eyásekhawok axta ko'o Jacob, ektaknókek axta Esaú.”#Mal 1.2-3. Cháxa ektahakxa axta eyámnaksoho senxekmóso Dios ekpayhawo elyésha énxet apkepmenyéxa enxoho elyésha, cham'a apmokókxa enxoho ewónmakha, meyke apkelyetsáteyak ma'a ektémakxa enxoho aksok apkelané.
14¿Anxéneya sat ektaha mekapéwomo aptémakxa Dios eñama apteme xa? Magwanchek antehek xa. 15Hakte axta aptemék Dios apkenagkama Moisés se'e: “Wamlekxohok sat ko'o énxet sekmokókxa enxoho wamlekxohok, yepyóshok sat nahan alanok ko'o m'a énxet sekmokókxa enxoho yepyóshok alano'.”#Ex 33.19. 16Háwe eyke m'a apmopmenyého nak énxet yemlekxohok Dios, tén han ma'a apwaskápeykekxoho nak apkeltémo yemlekxohok Dios, wánxa m'a apmokókxa enxoho yepyóshok elanok Dios. 17Hakte yetneyk eknaktáxésamaxche aptéma axta apkenagkama Dios wese' apwányam Egipto s'e: “Ektemésesek axta ko'o exchep wese' apwányam yakwayam enxoho kañék xép ekwetamaxche ektémakxa sekmowána ko'o, yakwayam enxoho kóllegaksek sekwesey ekyókxoho yókxexma.”#Ex 9.16. 18Yepyóshok cha'a elanok Dios énxet apkepmenyexa enxoho yepyóshok elano', ekyennakte apwáxok nahan cha'a etnésesek Dios énxet apmokókxa enxoho etnésesek ekyennakte apwáxok.
19Kóltehek sat helának kéxegke s'e: “Aptemegkek agkok Dios xa, ¿yaksak ektéma apxeyenma nak Dios aptaha apsexnánémap apagko' énxet, hakte méko kamagkok ma'a apkepmenyexa enxoho elának Dios?” 20Enxet, ¿yaksak ekxeyenma apwáxok apkenagkama etnék xép apmoko nak elátegmoweykpok Dios? ¿Apwanchek enxeykel'a yátegwáxwa etnehek yának énxet ektaha apkelané s'e: “¿Yaksak ektaha aptaha nak selané s'e ektaha nak?”#Is 29.16; 45.9. 21Enxet ektaha nak apkelané yátegwáxwa yelpa', apwanchek etnésesek ma'a apmokókxa enxoho etnésesek,#Jer 18.4-6. apwanchek etakmelcheshok apmeykha m'a pók, keñe m'a pók metakmelchesek apmeykha.
22Apmáheyok axta henxekmósek Dios ektémakxa senlegasáseykegkoho cha'a, tén han ma'a ektémakxa nak apmopwána, apkelenmáxekpók eyke yetlo mepekhésamap apkelanyo apkeltémakxa m'a énxet'ák ekpayhawo axta kóllegásesagkohok, cham'a peya axta kólmasesók. 23Apmokók axta eyke nahan henxekmósek Dios ektémakxa nak ekyawe apcheymákpoho, cham'a segemleykxoho axta, nano' axta senláneseykekxa egwáxok yakwayam hegwakxohok xa apcheymákpoho nak. 24Ẽlwóneyha axta negko'o Dios, nápakha axta apkeleñamak nepyeseksa énxet'ák judíos, keñe axta nápakha apkeleñama nepyeseksa énxet'ák metnaha nak judíos. 25Ekhawo ektémakxa nak ekxeyenma Oseas weykcha'áhak apagkok se'e:
“Enxet'ák ahagkok sat atnekxak ma'a
metnama axta énxet'ák ahagkok;
alásekhohok sat ma'a énxet'ák
malásekhayo axta.#Os 2.23.
26Yókxexma ektémakxa axta cha'a
kélxénamaxche kéxegke s'e:
‘Háwe kéxegke énxet'ák ahagkok’,
kóltamhaxchek sat kaxwo' kéxegke
Dios memassegwayam apketchek.”#Os 1.10.
27Axta aptemék Isaías apxeyenma énxet'ák Israel se'e: “Exámekxak sat eykhe Israel aptawan'ák neptámen, exnágwákxohok sat eykhe m'a ektémol'a ekxámokma xóp ánek wátsam ekwányam, apkeleymomap sat eyke aksa elwagkasakpok teyp, 28hakte kaxwo' sat esawhohok elának Wese' egegkok ma'a apxeyenma axta elának aksok keso náxop.”#Is 10.22-23. 29Ekhawo ektémakxa axta apxeyenma Isaías nano' se'e:
“Axta agkok hegmeyásak negko'o
Wese' egegkok ekha apyennakte entawan'ák nentámen,
aghágwakxohok axta m'a aptamheykegkaxa axta énxet'ák
apheykha axta tegma apwányam Sodoma,
tén han ma'a tegma apwányam Gomorra.”#Is 1.9.
Enxet'ák judíos apkelya'áseyam tásek amya'a
30¿Háxko sat kaxwo' antehek nempeywa anxének xa? Apxénchek axta Dios aptaha apkelpéwomo m'a énxet'ák metnaha nak judíos eñama apteme melya'áseyam, cham'a mektamsama axta nentémakxa ekpéwomo. 31Apmenyék axta eykhe kataksek énxet'ák Israel ekpéwomo apkeltémakxa eñama m'a segánamakxa, mopwanchek axta eyke. 32¿Yaksak axta ektéma? Hakte axta yásenneykekxak ma'a melya'áseyam, wánxa axta aksa apchásenneykekxo m'a aptamhéyak apancha'awo' nak. Ekeso eñamakxa elpelápagkasa axta “meteymog sempelápagkasamol'a” 33ekxeyenma nak eknaktáxésamaxche s'e:
“Ekpekkenchek ko'o Sión xama meteymog,
cháxa meteymog peya nak kalpelápagkasek énxet'ák xa;
énxet ektahakxa enxoho apteme mey'áseyam ma'a meteymog nak,
megkatnegwomek sat eyakhémo mey'áseyam.”#Is 28.16.
Currently Selected:
ROMANOS 9: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
