ROMANOS 10
10
1Elyáxeg, emenyék ko'o kawakxohok apkelwagkásamap teyp énxet'ák Israel, almaxnéseshok nahan cha'a Dios yakwayam katnehek xa. 2Ewanchek ko'o axének xa énxet'ák nak ekyetna ekyawe apkelmopmenyého elának Dios apmopmenyého; akke kañamak ekmámnaksoho apkelya'ásegwayam xa apkelmopmenyého nak. 3Melya'ásegkok ektémakxa m'a senteméseso nak nelpéwomo Dios, elenxanmok nahan cha'a eltemésesakpohok apancha'awok apkelpéwomo eñama m'a apkeltémakxa nak, melyaheykekxohok ma'a sempekkenchesama axta Dios yakwayam hentemésesek nelpéwomo. 4Cristo apteme ektemegwánxa néxa segánamakxa, yakwayam enxoho kóltemésesek apkelpéwomo apyókxoho énxet apteme nak melya'áseyam.
5Apxénchek axta Moisés ektémakxa senteméseso nelpéwomo Dios eñama m'a segánamakxa aptéma axta aptáxéso s'e: “Enxet apsawhomo enxoho apkelyaheykekxoho ektémakxa nak segánamakxa, exkak sat ekyennakte apnenyek.”#Lv 18.5. 6Keñe m'a sẽlteméseso nak cha'a nelpéwomo eñama magya'áseyam, katnehek cha'a amya'a kaxénaxchek se'e: “Nágkatne elchetamso apwáxok xép se'e: ‘¿Yaksak sat kexaha kamhagkok néten?’ —yakwayam enxoho keyntementak náxop Cristo—; 7Nágkólteme nahan kélpeywa s'e: ‘¿Yaksak sat katxek kañe' máxek ekmatawóneg?’ ” —yakwayam enxoho kólya'ásekxak néten Cristo nepyeseksa apkeletsapma. 8¿Yaksak eyke ektéma, ektéma nak amya'a se'e?: “Keto' ekyetnakxa Dios appeywa aphakxa exchep, yetnak ma'a apátog tén han ma'a apwáxok.”#Dt 30.12-14. Cháxa amya'a nenlegasamol'a eñama magya'áseyam xa. 9Apxénchek agkok xép aptaha Jesús Wese' apagkok, agkok kay'ásekmok nahan apwáxok apxátekháseykmo Dios ma'a Cristo, ewagkasakpok sat teyp xép. 10Megkay'áseyam egwáxok cha'a kañék sẽlteméseso nelpéwomo, egátog nahan cha'a kañék nenxeyenma magya'ásekmo Jesucristo peya hẽlwagkasek teyp.
11Hakte temegkek eknaktáxésamaxche s'e: “Enxet apteme enxoho mey'áseyam Cristo, megkatnegwomek sat eyakhémo apteme mey'áseyam.”#Is 28.16. 12Hawók ektémakxa nepyeseksa énxet'ák judíos ma'a ektémakxa nak han nepyeseksa énxet'ák metnaha nak judíos; hakte wánxa xama Wese' egegkok ma'a aptaha nak han Wese' apagkok apyókxoho énxet, eyeykhásesamhok cha'a apméso aksok eltakmela eleñama néten ma'a énxet ektaha nak apwóneykha apwesey. 13Hakte keso ektémakxa nak appeywa s'e: “Elwagkasakpok sat teyp apyókxoho énxet'ák ektaha nak apwóneykha apwesey.”#Jl 2.32. 14¿Háxko eyke katnehek ewónmakha apwesey Cristo m'a énxet'ák metnama nak makham melya'áseyam? ¿Háxko eyke nahan katnehek etnehek melya'áseyam ma'a énxet'ák megkóltennáseykencha'a enxoho apwesey Cristo? ¿Háxko katnehek eña' méko enxoho eltennáseykencha'a amya'a eñama Dios? 15¿Háxko nahan katnehek eltennaha énxet'ák méko enxoho m'a ektaha nak apkelapháseykha? Ekhawo ektémakxa nak ekxeyenma ektáxésamaxche s'e: “¡Tások agko' apkelwé énxet'ák ektaha nak apsáyam amya'a ektakmela.”#Is 52.7.
16Háwe eyke apyókxoho énxet apkelyaheykekxoho m'a ektémakxa nak ekpeywa tásek amya'a. Ekhawo ektémakxa axta apxeyenma Isaías se'e: “Wese', ¿yaksak axta énxet mey'áseykmo neltenneykha axta negko'o?”#Is 53.1. 17Nenlegé amya'a keñamak ma'a nenteme nak magya'áseyam, Cristo amya'a apagkok nahan ma'a eklegamaxkohol'a.
18Ektahak ko'o selmaxneyeykha s'e: ¿Enxeykel'a ellegeyk énxet'ák tásek amya'a? ¡Apkellegaye'! Hakte temegkek eknaktáxésamaxche s'e:
“Ekyókxoho yókxexma axta payheykekxak
apkeltenneykha xa énxet'ák nak,
sawheykekxók axta apkeltenneykha keso náxop.”#Sal 19.4.
19Ektahak makham selmaxneyeyncha'a s'e: ¿Enxeykel'a elya'ásegkok énxet'ák Israel xa? Hakte axta aptemék sekxo' appeywa Moisés se'e:
“Ko'o sat kañék yakwayam kólnathak ma'a
pók énxet'ák melya'áseyak nak Dios;
allókasek sat ko'o kéxegke yakwayam kóltaknók
ma'a énxet melya'áseyak nak aksok.”#Dt 32.21.
20Keñe axta megyéseykxo aptaha appeywa Isaías se'e:
“Eteyákxeyk axta ko'o m'a énxet'ák
mehektamsama axta;
ekxekmowásexkók axta ko'o m'a énxet'ák
metegyeykencha'a axta sekwesey.”#Is 65.1.
21Aptahak axta nahan Isaías apkexénágko énxet'ák Israel se'e: “Yókxoho ekhem axta ko'o selhaxanma, selwóneykencha'a énxet'ák meyke apkelyaheykekxoho nak, tén han ma'a elyennakte nak apwáxók.”#Is 65.2.
Currently Selected:
ROMANOS 10: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
