ROMANOS 8
8
Nelyaheykekxoho Espíritu apkeñama Dios
1Méko kaxwo' yakwayam kának kóllegásesagkohok ma'a énxet'ák apyepetcheyo nak Cristo, 2hakte ẽlhexyawáseykxeyk axta negko'o m'a segánamakxa eñama nak Espíritu, segmésamol'a cha'a ekyennakte egnenyek eñama negyepetcheyo Cristo Jesús, cham'a sẽlmoma axta m'a ektémakxa nak ekmowána mólya'asáxma, tén han sẽlhexyawáseykxo neyseksa m'a ektémakxa nak ekmowána nétsapma. 3Hakte apkelanak axta Dios ma'a megkawagko axta kalána' Moisés segánamakxa apagkok, yawanchek axta kalána' segánamakxa xa, eñama m'a ektémakxa nak melya'asáxma énxet'ák. Apcháphásek axta Apketche Dios apheyásamákpoho m'a énxet'ák ekha nak melya'asáxma, yakwayam etnehek apyanmaga m'a ektémakxa nak mólya'asáxma, yakwayam enxoho nahan kólmasesók ma'a ektémakxa nak mólya'asáxma, cham'a, ektémakxa nak ekyetno mey'asáxma énxet. 4Apkelanak axta Dios xa, yakwayam enxoho anlána' negko'o eltémókxa nak antehek segánamakxa, hakte magyetlákxak negko'o m'a nentémakxa egagko' nak, wánxa m'a apkeltémókxa nak antehek Espíritu.
5Enxet'ák ektaha nak apkelyetleykekxa apkeltémakxa apancha'awo' nak melya'asáxma, wánxa aksa kaxénmakha apwáxok ma'a apkeltémakxa apancha'awo' nak; keñe m'a énxet'ák apkelyetleykekxa nak ma'a apkeltémókxa nak antehek Espíritu, wánxa aksa kaxénmakha apwáxok ma'a aksok eñama nak Espíritu. 6Xénaha agkok aksa egwáxok wánxa m'a nentémakxa egagko' nak, cháxa segya'asamol'a nétsapmakxa xa; keñe m'a ekxéneykha nak egwáxok aksok apkeltémókxa nak anlának Espíritu, cháxa segmésamol'a ekyennakte egnenya'ák xa, tén han meyke ektahakxa egwáxok. 7Xénaha agkok kélwáxok wánxa m'a kéltémakxa kélagko' nak, kélenmexma kóltehek ma'a Dios, hakte megkólmenyék kóllának ma'a eltémókxa nak antehek segánamakxa apagkok, megkólmenyék nahan. 8Megkólwanchek kéxegke kólpeykesásekxak apwáxok Dios, kéltaha enxoho kélyetleykekxa m'a nentémakxa egagko' nak mólya'asáxma.
9Massegkek eyke kélyetleykekxa kéxegke xa nentémakxa egagko' nak, wánxa m'a apkeltémókxa nak antehek Espíritu, cham'a eyámnaksoho enxoho apha kélwáxok kéxegke Espíritu apkeñama nak Dios. Méko agkok negko'o m'a Espíritu apkeñama nak Cristo, mantehek negko'o Cristo énxet'ák apagkok. 10Apheyk agkok kélwáxok kéxegke Cristo, katsapok eykhe kélyókxa eñama m'a mólya'asáxma, megkatsepek eyke m'a kélhagák, hakte aptemésesek axta kéxegke kélpéwomo Dios. 11Apheyk agkok kélwáxok kéxegke m'a Espíritu apkeñama nak Dios, cham'a apxátekhásekmo axta Jesús, etnésesók sat kéxegke kélhaxnagcha'ak natámen kéletsapma m'a Dios apxátekhásekmo axta Cristo, eñama apha kélwáxok ma'a Espíritu apkeñama nak Dios.#1 Co 3.16.
12Elyáxeg, yetneyk negko'o aksok negánemaxko nak anlának, háwe eyke m'a negyetleykekxa nak nentémakxa egagko' mólya'asáxma. 13Hakte, kélyetlákxeyk agkok kéxegke m'a nentémakxa egagko' nak mólya'asáxma, kóletsapok sat; wánxa agkok kélmasések agkok kéxegke xa kéltémakxa kélagko' nak megkólya'asáxma eñama m'a appasmo nak Espíritu, megkóletsepek sat.
14Apyókxoho énxet ektaha nak appeykesáseyak Espíritu apkeñama Dios, Dios apketchek ma'a. 15Axta kólxaweyk kéxegke espíritu yakwayam egkeyásekxak makham kélmeneykha ektémol'a énxet apkelmomap, wánxa m'a Espíritu aptemésesama nak kéxegke Dios apketchek. Espíritu nahan keñamak nentéma cha'a nempeywa s'e: “¡Táta!”#Mr 14.36; Gá 4.6. 16Epetchekxak nahan eghagak xa Espíritu nak, yakwayam exének nentaha negko'o Dios apketchek. 17Hegwakxohok sat nahan negko'o xa nenxawé m'a sempagkanchesama axta Dios hegmeyásekxak, cham'a sẽltennasama axta,#Gá 4.5-7. cháxa peya sat anxawhok xamo' Cristo xa, eyámnaksoho enxoho nenlegagkoho xamo' ma'a Cristo, yakwayam enxoho ampasmok ma'a ektémakxa nak apcheymákpoho.
Negeymáxkoho peya nak kawa'
18Xénchek ko'o ewáxok ektaha mékoho nenlegeykegkoho sónegwánxa nak, cham'a negyetchásawo enxoho m'a negeymáxkoho eñama nak Dios peya nak hegwatámhok. 19Kelpekhések kótak kólxekmósek aptaha nak Dios apketchek ma'a ekyókxoho aksok apkelané axta Dios. 20Mékoho axta kélteméseseykmok ma'a aksok apkelané axta Dios, háwe axta eyke ektamheyak ancha'awo', Dios axta eyke apteméseso xa ektaha nak;#Gn 3.17-19. akke kamassegweykmok elhaxneykha yakwayam kayakmagkasók ma'a ektamheykegkaxa nak, 21yakwayam enxoho kólmasésesek ma'a ektémakxa nak elmomaxche, tén han ma'a ektémakxa nak cha'a kélmaséseyam, yakwayam enxoho kawakxohok nahan ma'a ektémakxa nak kélmaséseso cha'a énxet'ák Dios apketchek ma'a ektamheykegkaxa axta, tén han kawakxohok ma'a ektémakxa nak apkeleymákpoho. 22Negya'ásegkok negko'o ellegágkoho ekmáske m'a ekyókxoho aksok apkelané axta Dios ektémol'a kañegkohok kelán'a amonye ektegkeso étche. 23Háwe ekwánxa agkok ellegágkoho m'a, nellegágkok eyke nahan negko'o xa, nenxawáyak eykhe m'a Espíritu aptaha nak apmonye nenxawé, amonye nenxawé m'a aksok peya nak anxawa'. Awanhek negko'o nenlegeykegkoho neyseksa nelhaxanma kawók ekhem yakwánxa hẽltemésesek Dios apketchek, cham'a yakwánxa sat hẽlyenyókasek ma'a ektémakxa nak negyókxa.#2 Co 5.2-4. 24Nelwagkásexchek negko'o teyp eñama nelhaxanma. Nelhaxneyha agkok negko'o neyseksa negwetayo m'a nelhaxanma nak, háwe nelhaxanma xa ektéma nak. Hakte manleyxmakha cha'a m'a negwet'awo enxoho aksok. 25Nelhaxneyha agkok ma'a aksok magwetayo nak, kéméxchek anleyxmakha meyke nelwáteseyam.
26Ekhawo ektémakxa nak han sempasmoma cha'a Espíritu neyseksa nelyelkamáxkoho. Magya'ásegkok negko'o nentémakxa antehek nempeywa nelmaxnagko, cham'a eyéméxchexa nak antehek, wánxa agkok Espíritu eyke apteme sempakhetcheseso negko'o Dios, yetlo apmáheyo apagko', cham'a magkegwagko nak negko'o antehek nempeywa. 27Dios, aptaha nak apkelyetsáteyak ektémakxa elchetamso egwáxok, ey'asagkohok ma'a aksok apmopmenyého nak exének Espíritu, hakte elmaxnésesek cha'a Espíritu m'a ektaha nak Dios énxet'ák apagkok ekhawo m'a ektémakxa nak ekxeyenma apwáxok Dios.
Nelmalanma eñama segásekhayo Cristo
28Negya'ásegkok negko'o apkelanésama cha'a ekyókxoho aksok Dios ma'a énxet'ák ektaha nak apkelásekhayo, yakwayam enxoho kapasmok, cham'a énxet'ák ektaha axta apkelwóneykha Dios, ekhawo m'a ektahakxa axta apmopmenyého. 29Apkelpagkanchek axta Dios ma'a énxet'ák ektaha axta apkelyekpelchémo nano' axta, yakwayam enxoho exnágwakxohok ma'a Apketche,#2 Co 3.18; Gá 4.19; Flp 3.10. yakwayam enxoho etnehek apwányam nepyeseksa apkelyáxeg ma'a Apketche. 30Apkelwóneyha axta anhan Dios ma'a énxet'ák ektaha axta apkelpagkanma sekxo' agko'; aptemésesegkek axta anhan apkelpéwomo m'a énxet'ák ektaha axta Dios apkelwóneykha; apmések axta anhan apkeleymákpoho m'a énxet'ák ektaha axta apteméseso apkelpéwomo.
31¿Háxko sat kaxwo' antehek anxének xa aksok nak? Empasmeyk agkok negko'o Dios, méko kawának henmexek negko'o. 32Axta emyágweykekxak Apketche Dios segmésa negko'o, apcha'awok axta aksa apmatña negko'o eñamakxa, ékeso eñamakxa peya nak hegmések negko'o Dios ekyókxoho aksok xamo' ma'a Apketche. 33¿Yaksak sat awanchek kasexnenak ma'a ektaha nak Dios apkelyéseykha? Dios apteméseso apkelpéwomo xa. 34¿Yaksak sat kának kóllegásesagkohok? Cristo Jesús axta m'a apketsapa axta; háwe ekwánxa agkok ma'a apketsapa axta, apxátekhágwokmek axta anhan, apheyk nahan ma'a ekpayhókxa nak apkelya'asamakxa Dios, empakhetchesesek cha'a negko'o Dios. 35¿Yaksak sat kawának hegyenyókasek negko'o m'a ektémakxa nak Cristo segásekhayo? ¿Nenlegeykegkohoya, enxeykel'a m'a ekyentaxno nak negha, enxeykel'a m'a sẽlmenxeneykha nak, enxeykel'a m'a meyk segakhe nak, enxeykel'a m'a senteme nak meyke apáwa, enxeykel'a m'a aksok segakhamo nak, nétsapma enxeykel'a? 36Ekhawo ektémakxa nak ekxeyenma eknaktáxésamaxche s'e:
“Xép keñamak nentekyawa cha'a negko'o
yókxoho ekhem;
máxa ẽltemesásak negko'o nekkések
kélyentameykekxal'a aptekyómakxa.”#Sal 44.22.
37Nelmalanchek eyke cha'a negko'o neyseksa ekyókxoho xa aksok nak, eñama senteméseso m'a aptaha axta segásekhayo. 38Ekya'ásegkok eyke ko'o méko kawának hegyenyókasek ma'a ektémakxa nak Dios segásekhayo. Yawanchek ma'a ektémakxa nak nétsapma, tén han ma'a ektémakxa nak negyennakte, mopwanchek nahan ma'a Dios apkelásenneykha nak, yawanchek nahan ma'a aksok ekha nak elmowancha'a, yawanchek nahan sónegwánxa nak, yawanchek nahan ma'a aksok ekyetna nak egmonye, 39yawanchek nahan ma'a aksok ekyetno nak néten, tén han ma'a aksok ekyetna nak kónegó' agko', yawanchek nahan hegyenyókasek xama aksok ektaha axta apkelané Dios. ¡Méko kawának hegyenyókasek ektémakxa nak Dios segásekhayo, cham'a senxekmósa axta eñama Cristo Jesús aptaha nak Wese' egegkok!
Currently Selected:
ROMANOS 8: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
