ROMANOS 7
7
Kélyetcháseykekxoho ektémakxa ekha entáwa
1Elyáxeg, kélya'ásegkok kéxegke ektémakxa segánamakxa, kélya'ásegkok nahan elyáteyeykegkoho cha'a segánamakxa m'a énxet meletsapma nak. 2Agyetchásekxohok hana m'a kelán'a ekha atáwa nak. Kelán'a ekha atáwa, wánxa aksa katnehek ekyepetcheyo m'a atáwa, eñama eltémo segánamakxa; wánxa agkok, apketsekkek agkok atáwa kelán'a, kamaskok ekyetna m'a eltémókxa nak antehek segánamakxa, cham'a ektemésesama axta cha'a ekyepetcheyo wánxa atáwa. 3Kelánegwokmek agkok kelán'a pók énxet neyseksa apha makham atáwa, tawáseyha ektémakxa elyamhopma; apketsekkek agkok atáwa, kamaskok ekyetna eltémókxa axta katnehek segánamakxa neyseksa apha atáwa, awanchek nahan kategyekxak pók énxet meyke ektawáseykha elyamhopma xama enxoho.
4Ekhawo nak han ektémakxa kéxegkáxa elyáxeg selásekhayo, Cristo apketsapma keñamak kéletsapawo nahan xamo' kéxegke m'a Cristo, massék ekyetna eltémókxa antehek segánamakxa kéxegke, kéltemék kaxwo' kéxegke kélyepetcheyo pók kéltáwa, cham'a apxátekhágwokmo axta nepyeseksa apkeletsapma natámen apketsapma. Cháxa keñamak peya anlának kaxwo' nentamheykha ektakmela nápakto' Dios xa. 5Hakte neyseksa nenteme axta negko'o ekha mólya'asáxma, henlanaksohok axta cha'a segánamakxa m'a aksok ekmaso negmáheyo nak anlának, hegya'aksohok axta cha'a nétsapmakxa xa. 6Máxa eghapák akke nentemék negko'o mólmexmo m'a eltémókxa nak antehek segánamakxa, cham'a sentemésesama axta máxa nelmomaxche, cháxa ektahakxa nak negkegwagko negko'o ólyahakxohok Dios yetlo meyke sẽlya'áseykhaxma neyseksók nenteme eghaxnagcha'ak eñama Espíritu, háwe eyke eñama nano' segánamakxa eknaktáxésamaxche nelyaheykekxoho negko'o Dios.
Mólya'asáxma ekyetna nak ko'o
7¿Anxéneya sat segánamakxa ekteme mólya'asáxma eñama xa? ¡Magwanchek anxének segánamakxa ekteme mólya'asáxma! Kaxtemek axta meyke segánamakxa, may'asagkek axta ko'o ektémakxa mólya'asáxma. May'asagkek axta ko'o ektémakxa étsapma egnenyek aksok, megkatnama enxoho ekpeywa segánamakxa s'e: “Nágkatsep apnenyek aksok.”#Ex 20.17; Dt 5.21. 8Meykekxék axta eyke mólya'asáxma xa eltémókxa nak antehek segánamakxa, cháseneykekxék axta eltémókxa antehek segánamakxa seyancheseseykmoho ko'o sekmáheyo alának ma'a aksok ekmaso nak. Méko agkok segánamakxa, megkeykpelchexchék ma'a ektémakxa nak mólya'asáxma. 9Ekhegkek axta ko'o yetlo meyke ektémakxa sekha, cham'a meykexa axta segánamakxa; wánxa agkok, xama axta ekwa'a eltémókxa nak antehek segánamakxa, xátekhákxék axta makham mólya'asáxma, 10keñe axta ko'o sektéma máxa sétsapma, ekmassegwokmo m'a ektémakxa axta ektakmelmo sekha. Cháxa setnésesamakxa axta ko'o eltémókxa antehek segánamakxa xa, eyéméxko axta eykhe hegkések ko'o sekyennakte, keñe axta sey'asa m'a nétsapmakxa nak, 11hakte meykekxék axta mólya'asáxma xa eltémókxa nak antehek segánamakxa, elyexancheseykha axta anhan,#Gn 3.13. axta anhan seyakhe ko'o xa eltémókxa nak antehek segánamakxa eñama eyásenneykekxa m'a mólya'asáxma.
12Segánamakxa ekteme ektakmalma, tásek han ma'a eltémókxa nak antehek, péwok nahan ektémakxa, tásek nahan. 13¿Enxoho axta eykel'a sey'asó ko'o nétsapmakxa xa segánamakxa ektakmela nak? ¡Axta hey'asók ko'o nétsapmakxa xa! Mólya'asáxma eyke eltémo amátog ko'o eyásenneykekxo m'a aksok ektakmela nak, yakwayam enxoho kataxchek ektaha nakso' mólya'asáxma m'a ektémakxa nak mólya'asáxma. Cháxa ektahakxa axta ekwetáxko ektaha ekmaso agko' ma'a ektémakxa nak mólya'asáxma, eñama eyásenneykekxa mólya'asáxma m'a eltémókxa nak antehek segánamakxa.
14Negya'ásegkok negko'o segánamakxa ektaha eñamakxa m'a Espíritu, wánxa agkok, ekmeyásexkok ahagko' axta eyke ko'o mólya'asáxma eñama sekteme sekyelkamáxkoho. 15May'asagkek cha'a ko'o m'a setnahakxa enxoho, hakte malanak cha'a ko'o m'a aksok sekmáheyo nak alána', wánxa aksa cha'a alának ko'o m'a aksok sektaknagkamakxa nak.#Gá 5.17. 16Elanak agkok ko'o m'a aksok mamáheyo nak alának, eykpelchágwomhok cha'a ko'o ektaha ektakmela m'a segánamakxa nak eñama selané xa. 17Háwe ko'o sekteme xa, akke ekteme m'a mólya'asáxma ekyetna nak ko'o. 18Ekya'ásegkok megkeytna ko'o aksok ektakmela xama enxoho, cham'a sektémakxa ahagko' nak ko'o may'asáxma; amawho eykhe cha'a ko'o alána' aksok ektakmela, mowanchek eyke alána'. 19Malanak cha'a ko'o aksok ektakmela sekmokókxa enxoho alána', wánxa aksa cha'a alána' ma'a aksok ekmaso mamáheyo neykhe cha'a alána'. 20Elanak agkok ko'o m'a aksok mamáheyo neykhe cha'a alána', háwe sekteme ahagko' ko'o xa, akke ekteme m'a mólya'asáxma ekyetna nak ko'o.
21Eykpelchágwók cha'a ko'o m'a sekmoko enxoho alának aksok eltakmela, wánxa aksa cha'a ótak hépetkohok ma'a aksok ekmaso nak. 22Yespakkek cha'a ko'o ewáxok apkeltémókxa nak antehek Dios, 23ekwet'ak eyke ko'o ekyetna ewáxok ma'a aksok enmexma nak cha'a m'a ektémakxa nak ekpakmeteykha ewáxok: cham'a eltémókxa nak antehek mólya'asáxma ekyetna nak ko'o, cham'a ekmoma nak han ewáxok.
24¡Asagko' agko' ko'o sektémakxa! ¿Yaksak sat hényókasek ko'o sekyókxa sey'asama nak nétsapmakxa? 25Dios apwánxa apagkok, cham'a sekmésamol'a ko'o ekpayheykekxa ewáxok eñama Cristo Jesús. Ekya'ásegkok ko'o eyéméxko agko' alyahakxohok ma'a apkeltémókxa nak antehek Dios, sektémakxa ahagko' eyke keñamak ekmoma ewáxok ma'a ektémakxa nak mólya'asáxma.
Currently Selected:
ROMANOS 7: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
