ROMANOS 15

Kólpeykesásekxa' apwáxók kélmók

1Negko'o ekyennakwayam nak nenteme magya'áseyam, kéméxchek ampasmok énxet'ák elyelkamáxkoho nak apteme melya'áseyam, yakwayam enxoho elenxanmohok apteme melya'áseyam, manlanyek ma'a yakwayam nak hegmések ekpayheykekxa egwáxok egagkok egagko'. 2Negyókxoho negko'o kéméxchek ampeykesásekxak apwáxok egmók, tén han ampasmok, yakwayam enxoho agyanchesesagkohok apteme mey'áseyam. 3Hakte axta etegyaha Cristo ekpayheykekxa apwáxok apagkok apagko', wánxa agkok, Cristo axta keñamak eksawhomáxkoho ektéma m'a ektémakxa nak eknaktáxésamaxche weykcha'áhak se'e: “Ko'o axta elyamatcháseyha m'a ektahakxa axta kélyamatcháseykha exchep.”#Sal 69.9. 4Naktáxesamaxchék axta yakwayam henxekmósek negko'o m'a ekyókxoho amya'a ekyetnama axta eknaktáxésamaxche nano' agko', yakwayam enxoho keytek negko'o nelhaxneykha eñama m'a magyenseyam tén han ekpayheykekxa egwáxok segméso nak eknaktáxésamaxche. 5Emenyék ko'o epasmok kéxegke Dios yakwayam kóltehek ekhémo mók kélwáxok, cham'a Dios segmésamol'a magyenseyam, tén han ekpayheykekxa egwáxok, ekhawo m'a aptémakxa nak Cristo Jesús, 6yakwayam enxoho kaxhok mók nenteméseso apcheymákpoho Dios negyókxoho nak, cham'a Jesucristo Wese' egegkok Apyap.

Tásek amya'a kéltennáseykha énxet'ák metnaha judíos

7Kólahapmakha cha'a kélmók, ekhawo ektahakxa axta apkelápeykha kéxegke Cristo yakwayam enxoho kóltemésesek apcheymákpoho Dios. 8Eltennásek ko'o kéxegke apwaya Cristo apyetchesamakpoho kélásenneykha yakwayam elanaksek aksok énxet'ák judíos, yakwayam enxoho exekmósek apkeláneya Dios ma'a apxeyenma axta elána', cham'a appekkencháseykekxo axta ẽlyepmeyk nano'. 9Apwa'ak axta anhan Cristo yakwayam enxoho eltemésesek apcheymákpoho Dios énxet'ák metnaha nak judíos eñama m'a ektémakxa nak ekha segemleykekxoho. Ekhawo ektémakxa nak eknaktáxésamaxche s'e:

“Ekeso eñamakxa peya nak altemésesek

apcheymákpoho exchep nepyeseksa

pók aptémakxa énxet'ák nak,

tén han anneykmaksek eñama nak xép apwesey.”#2 S 22.50; Sal 18.49.

10Temék nahan mók eknaktáxésamaxche s'e:

“¡Enxet'ák, kalpayhekxa' kélwáxok xamo' ma'a

Dios énxet'ák apagkok nak!”#Dt 32.43.

11Mók eknaktáxésamaxche nahan entemék se'e:

“¡Apyókxoho énxet'ák sat eltemésesek

apcheymákpoho Dios!”#Sal 117.1.

12Temegkek nahan apnaktáxeséyak Isaías, aptaha axta Dios appeywa aplegaso s'e:

“Etyapok sat aptáwen neptámen Isaí,

aptaha axta wese' David apyap,

apkemha apmonye sat kóltemésesek,

yakwayam etnehek Wese' nepyeseksa pók énxet'ák,

sat nahan kañék yakwayam keytek apkelhaxneykha

yakwánxa katnehek apmonye'e énxet'ák xa.”#Is 11.10.

13Emenyék ko'o eyáncheseshok kéxegke ekpayheykekxa kélwáxok Dios, tén han etnésesek meyke ektahakxa kélwáxok kélteme nak megkólya'áseyam ma'a, tén han etnésesek ekmámnaksoho agko' megkólya'áseyam yakwánxa etnésesek Dios kélmonye, eñama Espíritu Santo apmopwána, cham'a Dios segmésamol'a cha'a nelhaxneykha.

14Elyáxeg selásekhayo, ekya'ásegkok ko'o ekyetna kéxegke ekyawe kélásekhamaxkoho, tén han ekyetna ekyókxoho ektémakxa kélya'áseyak, tén han ekyetna kélya'áseyak yakwayam kólmések kélpeywa kélmók; 15wánxa agkok, magweyseykxak ko'o sektáxésesa kéxegke nekha aksok keso weykcha'áhak nak, yakwayam enxoho megkalwagkamagke'. Elanak ko'o m'a apkeltamhókxa axta atnehek Dios eñama segkéso sektamheykha, 16yakwayam atnehek Cristo apkeláneykha, yakwayam apasmok ma'a énxet'ák metnaha nak judíos. Hawók ko'o sektamheykha m'a ektémakxa nak apkeltamheykha énxet'ák appasmo nak apkelmaxnéseso apnámokkok, cham'a ektémakxa nak seklegaso amya'a eñama Dios. Emenyék anaklakxak nápakto' Dios énxet'ák metnaha nak judíos ektémol'a aksok kélméso Dios ekleklamol'a apwáxok, aptemésesama nak apkelpagkanamap Espíritu Santo yakwayam emok takha' Dios.

17Yetneyk ko'o sepeykesáseykekxa ewáxok se'e sektamheykha eñama nak Dios, hakte ekyepetcha'awok ko'o m'a Cristo Jesús, 18hakte magwakye' cha'a ko'o axének ma'a aksok apkeláneya nak Cristo eñama ko'o, yakwayam enxoho atnesásekxak apkelyaheykekxoho Dios énxet'ák metnaha nak judíos. Cháxa elánéxko axta xa, cham'a seltenneyncha'a axta ko'o, tén han eñama m'a aksok selané axta, 19tén han eñama elánamáxche m'a aksok magkenatcheso nak agweta', tén han ma'a sempelakkaso nak agweta', tén han eñama m'a Espíritu apkeñama Dios apmopwána nak. Cháxa ektahakxa axta seksawhawo ko'o selané sektamheykha seltenneykha amya'a segwagkasamo nak teyp eñama Cristo, axta eyeynawok ma'a Jerusalén, tén han ekyókxoho ma'a yókxexma nak, ekwokmoho yókxexma Iliria. 20Cháxa sektahakxa axta ko'o selenxanakmoho seltennáseykha amya'a segwagkasamo teyp ma'a megkañamáxchexa axta amya'a exénakpok Cristo, yakwayam enxoho ko'o malánegwomek sektamheykha ektaha axta aptekkeso apmonye pók énxet, 21wánxa sekmáheyo alának ko'o ektémakxa nak eknaktáxésamaxche s'e:

“Etak sat ma'a énxet'ák megkóllegasama axta amya'a

exénakpok Cristo;

elya'ásegwók sat énxet'ák

mellegaya axta exénakpok Cristo.”#Is 52.15.

Pablo ekxeyenma apwáxok etnehek meyk'a tegma apwányam Roma

22Sektamheykha keñamak megkatyapma cha'a sekxega yakwayam atyánegwakxohok kéxegke, ekmáheyók eykhe cha'a.#Ro 1.13. 23Wánxa agkok, ekpenchesek eyke kaxwo' sektamheykha m'a yókxexma nak, nano' eykhe sekmáheyo atnehek meyk'a kéxegke. 24Emenyék ko'o atnehek meyk'a kéxegke sekmahágko sat ma'a España. Eltamhok nahan ko'o helpasmok yakwayam alenxanmohok sekxega, cham'a natámen ekpayheykekxa sat ewáxok eñama selweteykekxa kéxegke yakwatakxoho. 25Jerusalén akke peyk amhagkok kaxwo' yakwayam apasmok ẽlyáxeg apheykha m'a. 26Hakte apmayhágkok axta yánchásekxak selyakye énxet'ák apheykha Macedonia, tén han Acaya, yakwayam yaphásesek ma'a ẽlyáxeg'a apteme nak melya'áseyam meyke aksok apagkok, apheykha m'a Jerusalén.#1 Co 16.1-4. 27Apmayhagkok axta elanagkok xa, tásek axta aptamhágkaxa, hakte payhawók axta etnahagkok xa. Enxet'ák judíos axta keñamak apkelxawáya aksok eltakmela eleñama Dios xa énxet'ák metnaha nak judíos, keñe xa énxet'ák metnaha nak judíos kéméxchek egkések aksok ma'a énxet'ák judíos apteme nak melya'áseyam yakwayam epasmok.#1 Co 9.11. 28Ekpenchesek sat agkok selané xa, cham'a sekmésa sat selyakye kélánchesáseykekxa xa énxet'ák nak, keñe sat amhagkok España, yakwatakxoho sat axnók kélnepyeseksa sekyeykhágwokmo sat ma'a. 29Nakso' ektemesásak peya anxawak ekxámokma agko' aksok eltakmela eleñama Cristo, cham'a sekwokmo sat kélnepyeseksa kéxegke.

30Elyáxeg, eltamhok ko'o helwahánhok kólwaskápekxohok helmaxnésesek kéxegke eñama nak ma'a Jesucristo, tén han eñama m'a negásekhayo segméso nak Espíritu. 31Helmaxnéses ko'o Dios, yakwayam enxoho hemyók nepyeseksa énxet'ák apkelya'áseyam apheykha nak ma'a Judea, yakwayam enxoho nahan kamaxchek takha' m'a sektahakxa nak ko'o sektamheykha, yakwayam apasmok elyáxeg'a apheykha m'a Jerusalén, 32yakwayam enxoho alwetágwakxak kéxegke yetlo ekpayheykekxa ewáxok, tén han allókasek sekyampé m'a sektaha sat meyk'a kéxegke, cham'a apkepmenyého sat Dios. 33Emenyék ko'o exek kélnepyeseksa kéxegke Dios, ektaha nak eñamakxa meyke ektahakxa egwáxok. Katnahagkok sat.

Currently Selected:

ROMANOS 15: LEGN

Highlight

Compare

Copy