ROMANOS 14
14
Nágkólyamatchesha aksa kélyáxeg kéltémo xamo' nak megkólya'áseyam
1Kólahapmakha énxet'ák elyelkamáxkoho nak apteme melya'áseyam, nágkólyamatchesaxche. 2Agyetchásekxohok hana s'e; yetneyk énxet'ák apkenagko nak yepwának etwok ekyókxoho aksok, keñe m'a énxet'ák elyelkamáxkoho nak apteme melya'áseyam, wánxa aksa etwok ma'a ekyexna eñama nak namyep. 3Enxet apsawhomo nak apto ekyókxoho aksok, kéméxchek mewanyaha pók meto nak mók xama aksok, keñe m'a énxet meto nak mók xama aksok, kéméxchek mématchesha m'a apsowhomo nak apto ekyókxoho aksok, hakte negyókxoho cha'a hegmok takha' Dios. 4¿Yaksak apkenagkama etnahak xep apmoko nak ématchesha pók wese' apkeláneykha? Tásek agkok aksok apkelané esenhan ma'a eyesagko enxoho aksok apkelané, wese' apagkok aksa ey'asagkoho'. Wánxa agkok, kalkohok sat eyke apwáxok Wese' apagkok, hakte yetneyk apmopwána Wese' egegkok etnésesek apchásekhayo wese' apagkok xa apkeláneykha nak.
5Yetneyk nahan énxet appagkanma nak cha'a xama ekhem, etnésesek ektakmela, yetneyk nahan énxet aptemésesamol'a meyke ekyeykhamaxche ekyókxoho ekhem. Apyókxoho énxet kéméxchek katnehek ekmámnaksoho agko' apya'áseyak ma'a ektémakxa nak elchetamso apwáxok. 6Enxet appagkanma nak xama ekhem, Wese' egegkok yakwayam etnehek apcháyo eyke keñamak appagkanma xa ekhem nak. Enxet apsawhomo nak apto ekyókxoho aksok, Wese' egegkok yakwayam etnehek apcháyo eyke keñamak apsawhomo aptama xa aksok nak, egkések nahan ekxeyenma apwáxok Dios; énxet meto nak mók xama aksok, Wese' egegkok yakwayam etnehek apcháyo eyke keñamak metama xa mók xama aksok nak, egkések nahan ekxeyenma apwáxok Dios.#Col 2.16.
7-8Egmeyhek agkok, Wese' egegkok akke aksa yakwayam ampagkanchesaxche, nétsekkek agkok nahan, cháxa yakwayam antehek negáyo Dios xa. Negko'o nenteme Wese' énxet'ák apagkok, megkeyxek ma'a nétsapa enxoho esenhan ma'a negyenna enxoho. Ekeso eñamakxa megkatakmela nak etnehek enxama negko'o ekxéneykha apwáxok apagkok apagko' neyseksa apyennakte, háwe nahan nétsapma egagkok egagko'. 9Axta keñamak apketsapma Cristo, tén han apxátekhágweykmo eñama s'e: yakwayam etnehek Wese' apagkok énxet'ák apkeletsapma nak, tén han ma'a apkelyenna nak.
10¿Yaksak ektaha kéltaha nak kélyekpelchémo kélyáxeg? ¿Yaksak ektaha kélyamatchásencha'a nak kélyáxeg? Negyókxoho sat anchaknágwók aphakxa Dios, yakwayam enxoho etnehek segyekpelchémo.#2 Co 5.10. 11Hakte temegkek eknaktáxésamaxche s'e:
“Aptahak Wese' egegkok se'e:
Nakso' sektahakxa nak sekpeywa,
apyókxoho énxet'ák sat eltekxeyagkok
aptapnák emonye ko'o,
apyókxoho sat nahan eltemésesek apcheymákpoho Dios.”#Is 45.23.
12Negyókxoho sat óltennaksohok egagko' Dios ektémakxa axta aksok nenlané.
Nágkóllanés aksa mey'asáxma kélyáxeg
13Ekeso eñamakxa megkatakmela nak antehek nelyamatcháseykha egnámokkok. Kólhésho sat mók kélwáxok yakwayam megkóllának ma'a aksok elánésamo nak mey'asáxma kélyáxeg. 14Ekya'ásegkok ko'o méko xama aksok ektemésásamáxkoho agko' ekmanyása; wese' egegkok Jesús may'áseyam keñamak sektemésesa ko'o ekmámnaksoho xa. Xénchek agkok apwáxok énxet ektaha ekmanyása xama aksok, nakso' nahan etnésesek ekmanyása xa énxet nak. 15Apto agkok keñamak megkalcha apwáxok apyáxeg aptahakxa exchep, metnahak xép ma'a ektémakxa nak negásekhayo. ¡Ná etwasha aksa exchep apyáxeg aptaha axta apyanmaga Cristo eñama m'a aksok apto nak! 16Kólenxánem cha'a megkaxénaxchek ekmaso m'a ekxeyenmakxa nak kélwáxok kéxegke ektaha ektakmela. 17Háwe aptémakxa Wese' apwányam Dios ma'a nento tén han ma'a negya nak mók xama aksok, háwe ektémakxa xa, akke m'a ekpéwomo nentémakxa nak, meyke ektahakxa egwáxok, tén han ma'a ekpayheykekxa nak egwáxok eñama Espíritu Santo. 18Enxet ektahakxa enxoho aptamheykha eñama Cristo apteme xa ektaha nak, kalkohok apwáxok Dios, tásek nahan katnehek apxeyenma énxet.
19Kéméxchek negko'o ólwaskápekxohok anlának ekyókxoho aksok sentekkesesamo nak meyke ektahakxa egwáxok; cháxa egwanchek ólpasmaxkohok agyanchesagkohok nenteme magya'áseyam nentaha enxoho xa. 20Nágkóltawasha aksa Dios aptamheykha eñama m'a aksok kéltamakxa nak. Ekyókxoho aksok negmowána antók; akke sagkek ma'a negmasésesa enxoho apteme mey'áseyam egmók eñama m'a nento nak. 21Tásek megkóltók ápetek tén han megkólyenek vino, tén han megkóllának ma'a xama aksok enxoho, cham'a elánésamo nak mey'asáxma egyáxeg. 22Cháxa ektémakxa nak ekxeyenma apwáxok xép kéméxchek katnehek nahan ekxeyenma apwáxok nápakto' Dios xa ektaha nak. Apkeleñémo énxet megkasagchamo nak apwáxok kaxénwakxohok apwáxok aptahakxa, cham'a ekxeyenmakxa nak apwáxok ektakmela elána'. 23Enxet eyámnaksoho enxoho mey'ásegko ekpayhawo antók xama aksok esenhan ma'a megkapayhawo nak antók, apsexnánémap apagko' etnehek ma'a aptawa enxoho, hakte etwok aksa neyseksa mey'áseyak ektakmela. Ekyókxoho aksok maghaxanma nak anlának neyseksa magya'áseyak ektakmela, cháxa mólya'asáxma xa.
Currently Selected:
ROMANOS 14: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
