ROMANOS 11
11
Enxet'ák Israel kélyéseykha
1Ektahak ko'o selmaxneyeykha s'e: ¿Apkeltaknawágwokmek enxeykel'a Dios ma'a ektaha nak énxet'ák apagkok? ¡Ma', meltaknawágweykmok! Ko'o nahan sekteme énxet Israel, Abraham aptáwen neptámen, eñamak ko'o m'a nepyeseksa Benjamín énxet'ák apagkok.#Flp 3.5. 2Apxeyenmék axta Dios aptaha énxet'ák apagkok ma'a énxet'ák Israel, cham'a sekxo' axta; meltaknawágweykmok nahan kaxwo'. ¿Yagkólya'ásegkok kéxegke ekxeyenma nak eknaktáxésamaxche ektémakxa axta Elías, aptaha axta Dios appeywa aplegaso, cham'a apxeyenma axta ekmaso énxet'ák Israel aptéma nempeywa nelmaxnagko? Aptéma axta s'e. 3“Wese', apkennapchek axta énxet'ák Israel ma'a énxet'ák ektaha axta apkellegaso xép appeywa, appalchesakmek axta anhan ma'a ekwatnamáxchexa axta cha'a aksok ektekyawa kélméso exchep, ko'o aksa mamatña makham, peyk eyke nahan amátog ko'o xa.”#1 R 19.10,14. 4Aptahak axta Dios apchátegmowágko s'e: “Siete mil énxet elpagkanak ko'o, cham'a meltekxeyeykegko nak aptapnák elpeykeshok dios Baal.”#1 R 19.18. 5Hawók nahan ektahakxa kaxwo' nak, apkantawók apkeleymomap ma'a énxet'ák Israel, Dios axta apkelyéseykha eñama apkelásekhayo. 6Dios apkelásekhayo agkok keñamak ektéma xa, háwe kaxwo' eñama m'a ektémakxa axta aksok apkeláneyak; apkeláneyak aksok axta agkok keñamak ektéma xa, megkatnehek axta Dios segásekhayo m'a ektémakxa nak segásekhayo.
7¿Háxko eyke ektahakxa so kaxwo' nak? Axta elweteyk énxet'ák Israel aksok apketamsama axta, wánxa axta eyke aksa apkelwetaya aksok apkelchetamso m'a ektaha axta Dios apkelyéseykha. Apxámok axta eyke megkalyakwámeyak, 8ekhawo ektémakxa nak ekxeyenma eknaktáxésamaxche s'e: “Aptemésesek axta Dios mema takha' amya'a, ekwokmoho keso kaxwo' nak; aptemésesek axta máxa meyke apakta'ák, tén han máxa meyke apeyk'ák.”#Dt 29.4; Is 29.10. 9Aptemegkek axta anhan appeywa David se'e:
“Kelhanma sat katnekxak apteykegkaxa nak aptéyak
tén han ma'a táma segmomol'a,
yakwayam enxoho kalpelápagkasek,
tén han kóllegásesagkohok.
10Meyke apakta'ák sat etnekxak,
mopwancha'ak sat étaxma';
megkamassegwomek sat nahan cha'a aptamhéyak apkelekhe.”#Sal 69.22-23.
Enxet'ák metnaha judíos apkelwagkásamap teyp
11Ektahak kaxwo' selmaxneyeykha s'e: ¿Megyaknekxéya sat néten énxet'ák judíos apkelpelapokmo axta? ¡Yaknekxak sat néten! Wánxa agkok, apkelwet'ak axta eyke apkelwagkásamap teyp pók énxet'ák, cham'a melyaheykekxo axta Dios énxet'ák judíos, temék axta xa yakwayam enxoho eyásekkesek ma'a énxet'ák Israel. 12Tekkesek agkok aksok eltakmela náxop xa apkelpelápeyam axta énxet'ák Israel, tén han ma'a megyakhémo axta apkeltémakxa, tekkesesek agkok nahan aksok eltakmela m'a énxet'ák metnaha nak judíos xa apkelpelápeyam axta énxet'ák judíos, egwanchek kaxének egwáxok, sat eyke ekyagwánxa agkok ma'a aptekkesásekxo sat makham Dios melya'áseyam xa énxet'ák judíos.
13Yetneyk eyke aksok yakwayam altennaksek kéxegke megkóltaha nak judíos. Hakte axta eyáphásak ko'o Dios nepyeseksa m'a énxet'ák metnaha nak judíos, ékeso eñamakxa sekxeyenma nak ko'o ektaha ektakmela m'a sektamheykha nak. 14Emenyék ko'o eyásekkesek sekpeywomo xamo' kéxegke, yakwayam enxoho elwagkasakpok nahan teyp. 15Sawheykxók agkok Dios segásekheykekxoho keso náxop, eñama m'a apkelyetnakhaso axta Dios énxet'ák judíos, ¿háxko katnehek apkelásekhákxoho enxoho makham Dios xa énxet'ák judíos? Elmekxak apkelyennakte m'a énxet apkeletsapma axta. 16Kélpagkanchesek agkok Dios ma'a hótahap kélyáseso apmonyel'a, apyókxoho nahan kóltemésesek kélpagkancheso Dios. Kélpagkanchesek agkok Dios yámet egkepmenák, kawomhok nahan kélpagkancheso m'a aktegák.
17Nápakha énxet'ák judíos axta kélyakténak ektémol'a kólyaktének yámet ekweseyl'a olivo, keñe axta kélyepetchesa exchep ma'a kélyakténakxa axta, xép aptaha axta aphawo m'a yámet olivo émhal'a naxma. Cháxa ektahakxa axta apyepetcha'a exchep egkepmenák ma'a ektémakxal'a yámet olivo. 18Wánxa agkok, mopwanchek xép keyxkohok appeywa ewanyaha m'a yámet aktegák ekteyapma agko' nak. Aptemék agkok xép xa, kaxén apwáxok metnaha exchep apméyak ma'a yámet egkepmenák nak, yámet egkepmenák akke ekméyak xép.
19Sat kexaha etnehek appeywa exchep se'e: “Nakso' xa, kélyakténchek axta eyke aktegák yámet olivo yakwayam helyepetchesek ko'o.” 20Wánxa agkok, hákho axta elyakténamaxche xa yámet aktegák nak, hakte méko axta megkalya'áseyam. Hákho eyke kélyepetcheso exchep xa, hakte yetneyk mey'áseyam. Nágkeyxkoho aksa appeywa, tásek eyke yé'. 21Apyakmagkáseykxeyk agkok Dios ektémakxa yámet aktegák ekteyapma agko' nak, eyakmagkásekxak sat nahan aptémakxa exchep. 22Elano, awanhek segásekhayo Dios, metnehek eyke anhan melané m'a ekpayhókxa enxoho hentemésesek. Apkeláneyak axta Dios ekpayhókxa axta etnésesek, cham'a appallakmo axta énxet'ák, apchásekha'awok axta eyke exchep. Xép akke kéméxchek elának ma'a ekleklamókxa nak apwáxok Dios; agkok etnahak xép xa, kólyaktének sat nahan xép xa. 23Apkelyensakmek agkok énxet'ák judíos ma'a ektémakxa nak apkelya'áseyam, máxa axnagkok kélyepetcháseykekxa mók yámet aktog sat katnehek; hakte apwanchek Dios épetchásekxak makham mók. 24Xép metnaha nak judío, kélyakténchek axta exchep apkeñama m'a yámet olivo émha nak naxma, keñe kélyepetcheseykmo m'a yámet olivo ektakmela nak, megkóltehek eyke cha'a kólyepetchesek mók yámet xa ektaha nak, akke ekyagwánxa agkok ektakmela kólyepetchásekxak makham aktog yámet olivo m'a kélyakténmakxa axta kélyetcháseykekxoho nak énxet'ák judíos.
Apsawhomákpoho apkelwagkásamap teyp énxet'ák Israel
25Elyáxeg, emenyék ko'o kólya'ásegwomhok se'e aksok ekyexamaxche apkeláneykekxa nak Dios, yakwayam enxoho megkeyxkók kélpeywa kólxének ekha kélya'áseyak; nápakha énxet'ák Israel akke aptamheykegkok mema takha' amya'a, ekwokmoho sat ma'a ekwánxa enxoho apxámokma énxet'ák metnaha judíos apkelyakmagkaso apwáxók. 26Temék agkok xa, apyókxoho énxet'ák Israel sat elwagkasakpok teyp, hakte temegkek eknaktáxésamaxche s'e:
“Sión sat yenyék ewak aptaha nak sẽlchexeykekxa negko'o,
elekwatak sat nentémakxa ekmaso
nepyeseksa Jacob énxet'ák apagkok.#Is 59.20.
27Cháxa yakwánxa sat katnehek ekhémo mók
selpakhetchásamáxkoho énxet'ák xa,
cham'a sekmasésesa sat ektémakxa nak melya'asáxma.”#Jer 31.33-34.
28Aptemék apkenmexma Dios énxet'ák judíos eñama aptaknagko m'a amya'a segwagkasamo nak teyp, yakwayam enxoho kólyentamaxchek kéxegke kóltehek megkólya'áseyam; makhemek eyke makham apkelásekhayo Dios énxet'ák judíos, hakte apkelyésáha axta aptawan'ák neptámen. 29Mehegyementemekxék Dios ma'a aksok segméso nak, melwátésemek nahan segwóneykha. 30Axta kólyaheykekxohok kéxegke Dios nano' axta, apkemleykxók eyke kaxwo' kéxegke Dios eñama m'a melyaheykekxoho axta Dios énxet'ák judíos. 31Ekhawo nahan ektémakxa s'e, massék kaxwo' apkelyahákxoho Dios énxet'ák judíos, kéxegke eyke yakwayam yemlekxohok Dios, yakwayam enxoho anhan yemlekxohok Dios ma'a énxet'ák judíos. 32Aptemésesek axta Dios apyókxoho énxet'ák elma m'a ektémakxa nak melyaheykekxoho, yakwayam enxoho exnéshok mók apkelemleykekxoho apyókxoho énxet.
33¡Xámok agko' aksok eltakmela eleñama nak Dios, magwanchek agya'asagkohok ekwánxa, tén han ma'a ektémakxa nak apya'áseykegkoho, cham'a ektémakxa nak han ekha apyekpelchémo, méko kawának kaxének ektémakxa enxoho aksok apmáheyo elának, méko nahan keykpelkohok apmáheyókxa nak etnehek!#Is 55.8-9. 34“¿Yaksak awanchek keykpelkohok ektémakxa nak ekpakmeteykha apwáxok Wese' egegkok?, ¿Yaksak nahan kawának kay'ásesagkohok Dios?#Job 15.8; Is 40.13; Jer 23.18; 1 Co 2.16. 35¿Yaksak axta énxet apmésa aksok apméso naksa m'a Dios, yakwayam enxoho exnéshok mók Dios?” 36Hakte ekyókxoho aksok keleñamak ma'a Dios, Dios nahan keñamak elánteyapma xa, yakwayam enxoho nahan kaltemésesek apcheymákpoho.#1 Co 8.6; Ef 4.6; Col 1.16. ¡Apcheymákpoho sat cha'a kóltemésesek Dios! ¡Katnahagkok sat!
Currently Selected:
ROMANOS 11: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
