ROMANOS 12
12
Nempagkanchásamáxche Dios
1Elyáxeg selásekhayo, eltamhok ko'o kaxénwakxohok kélwáxok kéxegke Dios segemleyam seltamho kóltemésesaxchek kéxegke kélmeyásamáxkoho kélagko' Dios, ektémol'a aksok kélméso Dios, meyke ekyepetche xama aksok ekmaso, cham'a ekleklamókxa nak apwáxok Dios. Cháxa ektémakxa nak ekmámnaksoho nelpeykesamo Dios xa, eyéméxko nak agmések Dios. 2Nágkólwéhenekxoho aksa aptamhágkaxa énxet keso negwánxa nak, wánxa agkok, kólyakmagkas ma'a ektémakxa nak elchetámeykha kélwáxok, yakwayam enxoho anhan kañék kélyakmagkaso kéltémakxa kéltaha enxoho xa, keñe anhan kólyekpelchágwomhok ma'a ektémakxa nak Dios apmopmenyého, cham'a aksok ektakmela nak, ekleklamókxa nak han apwáxok Dios, cham'a ektaha nak han ekpéwomo agko'.
3Dios segkéso sektamheykha eñama seyásekhayo, keñamak seltennasa kélyókxoho kéxegke seltamho megkólyeykhasaxkók ekxéneykha kélwáxók kéxegke kélagko'. Emenyék ko'o kaxénmakha cha'a apwáxok kélxama kéxegke, yakwayam meyeykhasakpók ekxéneykha apwáxók apagkok apagko', cham'a ektémakxa axta apméso apmopwána Dios yetlo mey'áseyam. 4Ekhawo ektémakxa nak ekyókxoho ekhéyak nak negyókxa, megkaxnawok mók eltamheykha ekyókxoho nak, 5ekhawo nahan negko'o xa, nenxámok eykhe, xama eyke nentamhákxak nempasmeykekxa Cristo, negyepetchawók nahan egmók nentamhákxo wánxa xama.#1 Co 12.12.
6Egmések axta Dios megkaxnémo mók ektémakxa negmowána segméso naksa, cham'a apmokókxa axta hegmések cha'a negyókxoho negko'o. Egmések agkok negko'o Dios yakwayam anlegaksek appeywa, tásek anlegaksek, cham'a ekwánxa enxoho ekyetna magya'áseyam; 7Egmések agkok Dios negmowána ampasmok egmók, tásek antakmelcheshok nempasmo. Apxakkak agkok enxama apmopwána elxekmósek apnámokkok, tásek elxekmósek apnámokkok; 8apxakak agkok enxama apmopwána elwaskakkásekxohok apnámokkok, tásek elwaskakkásekxohok. Apmések agkok enxama aksok pók, tásek egkések yetlo meyke ekxeyenma apwáxok mók aksok. Aptemék agkok enxama ekha kéláyo ektémakxa enxoho aptamheykha, tásek etakmelcheshok aptamheykha; enxama ektahakxa enxoho appasmo énxet ekha nak eyéméxchexa aksok, tásek epasmok yetlo ekpayheykekxa apwáxok.#1 Co 12.4-11.
Eyéméxchexa antehek negyetlo nak Cristo
9Kólteme ekmámnaksoho agko' kélásekhamaxkoho. Kóltaknaw ma'a nentémakxa ekmaso nak, kóllenxanmoho kéllané m'a nentémakxa ektakmela nak. 10Kólásekhoho cha'a m'a megkólya'áseyam xamo' nak Cristo, kólyanchesagkoho cha'a kélásekhayo, kólteme nahan cha'a kélyaheykekxoho kélmók.
11Kólwaskápekxoho, nágkólteme megkeykwayam kóltemeykha, kóllána cha'a kéltamheykha eñama nak Dios yetlo ekmáheyo agko' kélwáxok.
12Kalpayhekxa cha'a kélwáxok eñama m'a ektémakxa nak kélhaxneykha; kólenmaxaxkoho cha'a yetlo kélwaskápeykekxoho m'a kéllegeykegkoho nak; nágkólyensem nahan kélteme nempeywa nelmaxnagko.
13Kólpásem Dios énxet'ák apagkok ma'a ektémakxa nak ekha eyéméxchexa aksok, kólahapmakha cha'a meyk'a kélagkok.#He 13.2; 1 P 4.9.
14Kólmaxnéses énxet'ák apmenxeneykha nak kéxegke, kólána epasmok Dios.#Mt 5.44; Lc 6.28. Kólmaxnéses, nágkóltakneyagkoho.
15Kalpayhekxa cha'a kélwáxok xamo' énxet'ák elpayheykekxa nak apwáxók, kóllekxagwaha nahan cha'a xamo' ma'a énxet'ák apkellekxagweykha nak.
16Kólhésho cha'a mók kélwáxok, nágkóleyxkoho aksa, wánxa agkok, kólhésaxkoho m'a énxet'ák meyke kéláyo nak. Nágkaxén aksa kélwáxok kéltaha kéxakko' ekha kélmowána.#Pr 3.7.
17Nágkólhésho mók aptemésesakxa ekmaso kélmók. Kólenxánem cha'a kóllának aksok eltakmela nápakta'awo' apyókxoho énxet. 18Kólenxánem cha'a kóltehek meyke kélenmexamaxche xamo' ma'a apyókxoho énxet'ák nak, cham'a kélewagkexa enxoho. 19Elyáxeg selásekhayo, nágkólhésho aksa mók kéltemeseseykmoho exma kéxegke, kólho aksa eñásesagkohok Dios; hakte temegkek eknaktáxésamaxche s'e: “Ko'o payhawók axnéseshok mók, ko'o sat ayakmagkásekxa', aptahak Wese' egegkok.”#Dt 32.35. 20Temék nahan eknaktáxésamaxche s'e: “Meyk agkok enchakhak énxet apkenmexeykha nak xép, egkés apto, hem agkok nahan enchakhak, egkés yegmen; sat kañék apmegkagweykekxa pók eñama apteméseso exchep xa ektaha nak.”#Pr 25.21-22. 21Neygyoho aksa katxek apwáxok xép nentémakxa ekmaso nak, wánxa agkok, elána' cha'a aksok ektakmela yakwayam emallánek xép xa aksok ekmaso nak.
Currently Selected:
ROMANOS 12: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
