APOCALIPSIS 18

Babilonia apteyam

1Ekwet'ak axta ko'o pók Dios apchásenneykha apweywento apkenyekto m'a néten natámen xa; kólyahakxohok agko' axta nahan ma'a, chápogwatchek axta nahan elseyexma apagkok keso náxop. 2Aptahak axta apyennaktésawo appeywa s'e:

“¡Apteyekmek, apteyekmek tegma apwányam

Babilonia!#Is 21.9; Jer 51.8; Ap 14.8.

¡Kelyekhama' ekheykegkaxa tamhákxa',

tén han ektamhákxo elleykegkaxa m'a

ekyókxoho ektémakxa nak espíritu elmasagcha'a,

náta elmasagcha'a axanák nahan tamhákxa'

tén han ma'a ekyókxoho ektémakxa nak

aksok nawha'ák elmasagcha'a

tén han ma'a ekmanyása nak!#Is 13.21; Jer 50.39.

3Ekyókxoho yókxexma nahan kelnahakkásak

anmen eñama m'a

ektémakxa nak kamasexta Babilonia;#Is 23.17; Jer 51.7.

apyakmagkáseykegkek axta anhan pók kelwese'e

apheykha náxop appathetéyak xa,

keñe anhan ektemesáseykegko kelwese'e m'a

énxet'ák apkelyanmagkásamap nak keso náxop,

eñama m'a ekyeykhásamáxkoho nak

elma aksa cha'a aksok.”

4Ekleg'ak axta nahan ko'o kélpeywa eñama néten. Entahak axta amya'a s'e:

“Kólántep kéxegke xa

nepyeseksa tegma apwányam nak,

kéltaha nak énxet'ák ahagkok,#Is 48.20; Jer 50.8; 51.6,45.

yakwayam enxoho megkólwéhenekxók apkeltémakxa nak

melya'asáxma xa énxet'ák nak,

yakwayam enxoho nahan megkawakxók kéxegke m'a

ektémakxa nak kéllegasáseykegkoho ekmaso;

5hakte yágwokmok kaxwo' apkeltémakxa nak

melya'asáxma, wokmók ma'a néten,#Gn 18.20-21; Jer 51.9.

xénwokmek nahan apwáxok Dios

apkeltémakxa ekmaso xa énxet'ák nak.

6Kólhésho nahan kéxegkáxa kélteméseso m'a

ektemésesamakxa axta anhan kélnápakha kéxegke

xa tegma apwányam nak;#Sal 28.4; 137.8; Jer 50.29.

kólyeykhásamho kélhésamo m'a ekwánxa

axta ektemésesamakxa,

kólyentaxnésesho ekmáske ekya,

nágkólhésho aksa m'a ekwánxa axta

ekméso kélnápakha kéxegke;

7kólyentaxnésesho nahan awáxok,

kóllegásesagkoho nahan

ekhawo m'a ekwánxa axta eyeymáxkoho awáxok,

tén han ma'a ekwánxa axta ektakmelmo ekha,

Hakte katnehek cha'a elchetamso awáxok se'e:

‘Ektemeyk kaxwo' ko'o wese', háwe kaxwo' ko'o tampe',

mañegkok sat nahan cha'a.’

8Ekeso eñamakxa peya nak kahapwak aksok ekmaso

ektéma nak se'e:#Is 47.7-9.

étsapma, eklegeykegkoho tén han ma'a meyk eyakhe,

kawatnaxchek sat nahan neyseksa táxa;

hakte apmopwána eghak ma'a Dios Wese' egegkok,

aptaha nak apxeyenma yakwánxa katnehek

kéllegasáseykegkoho xa.”

9Ellekxagwaha sat kelwese'e apkelwányam apkeleñama náxop apwet'a enxoho ekpakna éten apmeta xa tegma apwányam nak, ektaha nak ekyetchesamaxkoho kelán'a ekmaso ektémakxa, cham'a apyakmagkáseykegko axta pók appatheteykegko, cham'a ekweykekxoho axta anhan ma'a ektémakxa nak ektakmelmo ekha. 10Makhawók sat yekhegwók eñama apkeye m'a ektahakxa kéllegasáseykegkoho. Sat etnehek elpakmétek se'e:

“¡Xép laye tegma apwányam Babilonia,

tegma apwányam apyennakte,

pelakkásók agko' nahan ekwa'a

kéllegasáseykegkoho.”#Ez 26.16-17.

11Ellekxagwaha sat nahan énxet'ák ektaha nak apkexeykekxa cha'a aksok keso náxop, eñama kélmaséseyam xa tegma apwányam nak, hakte méko sat katnehek elma m'a aksok apkexeykekxa nak, ektéma nak se'e:#Ez 27.31,36. 12cham'a sawo ekyátekto elyenma elmomnáwa nak, tén han ma'a sawo ekmopé elyenma elmomnáwal'a, tén han ma'a meteymog eltakmalma nak, tén han ma'a aksok elmomnáwa elánamáxkohol'a lamom, tén han ma'a apáwa apkexyawáyol'a, tén han ma'a apáwa apkeláxñeyol'a, tén han ma'a apáwa hómáyok apmomnáwal'a, tén han ma'a apyexwasél'a; tén han ma'a ekyókxoho ektémakxa nak yámet ekmátsa ekpakneyam; tén han ma'a ekyókxoho aksok kélmeykencha'awol'a elánamáxche yannapóxeg apma'ák, tén han ma'a elánamáxchel'a yámet ektakmalma, tén han ma'a elánamáxchel'a sawo ekyentaxno ekyexwasél'a, tén han ma'a elánamáxchel'a sawo ekyentaxno, tén han ma'a elánamáxchel'a meteymog elyawe eltakmalmal'a. 13Axta anhan ma'a pexmok ekmátsa ekpakneyamla'a, tén han ma'a aksok ekmátsa ekpakneyam neltexneykegkohol'a egyempehek, tén han ma'a aksok ekmátsa ekpakneyamla'a éten agkok, tén han ma'a sokmátsa ekmomnáwal'a, tén han ma'a yámet ánek ekmátsal'a ekpakneyam; tén han ma'a vino, pexmok, tén han ma'a hótahap apnekla'a, tén han ma'a hótahap apaktekla'a; tén han ma'a aksok nawha'ák kélpátegkesamol'a aksok, nekkések, yatnáxeg, weyke takaxchók, ekweykmoho nahan ma'a énxet kélchexeykekxa nak ekha ekyanmaga aptaha neykhe énxet.#Ez 27.12-13,22. 14Sat nahan etnehek yának epakhetchesek tegma apwányam se'e:

“¡Méko kaxwo' xép ma'a aksok ekyexna ekmátsa nak,

cham'a apyespagkama axta cha'a exchep;

xegánegkásók agko' kaxwo' xép ma'a

ekyókxoho ektémakxa axta aksok

eltakmela apagkok, tén han ma'a

ektémakxa axta ekxákma aksok apagkok!”

15Makhawók sat yekhegwók eñama apkelaye yakwánxa katnehek kéllegaséykegkoho tegma apwányam xa énxet'ák ektaha axta apkexeykekxa xa aksok nak, cham'a aptamheykegko axta kelwese'e eñama xa tegma apwányam nak. Ellekxagwaha sat ma'a, kakhek sat nahan apwáxók.#Ez 27.31,36. 16Sat nahan etnehek elpakmétek se'e:

“¡Xép laye tegma apwányam!

aphawók axta exchep kelan'a apkexyawáyol'a ektaxno,

ektaxneykekxal'a apáwa hómáyok

tén han ma'a apyexwasél'a,

cham'a ekmeykencha'awol'a sawo ekyátekto elyenma

ekmomnáwa kalnáxamha,

tén han ma'a eknatanma ekmomnáwal'a,

tén han ma'a meteymog ektakmalmal'a.

17¡Ekmanyehe agko' nahan kelmassegwokmok

ektémakxa nak ekxákma aksok apagkok

xa tegma apwányam nak!”

Makhawók axta nahan apchánwokmok apyókxoho apkelámha apmonye'e nak apkeltamheykha yántakpayhe, tén han ma'a apkelyekwomol'a yegmen ey'aksek neyáwa yántakpayhe, tén han ma'a apkeltamheykha nak kañe' yántakpayhe, tén han ma'a apyókxoho ektaha nak apkeltamheykha neyseksa wátsam ekwányam.#Is 23.14; Ez 27.26-30. 18Xama axta apkelwet'a ekpakna éten apmeta m'a tegma apwányam nak, aptahak axta apkelyennaktésawo apkelpeywa s'e: “Magweteyk makham pók tegma apwányam aphawo xa.”#Ez 27.32. 19Apkelexpakha'ak axta nahan akkatkók xóp ánek, apkellekxagweyha axta nahan, chakhak axta anhan apwáxók. Aptahak axta apkelyennaktésawo apkelpeywa s'e:

“¡Xép laye tegma apwányam!

temesáseykegkek nahan kelwese'e apyókxoho énxet

eñama ekxákma aksok apagkok xa tegma apwányam nak

cham'a énxet'ák ekha axta yántakpayhe apagkok

apkeltamheykencha'a m'a wátsam ekwányam.

¡Ekmanyehe agko' nahan kélmasésakmok xa!”#Ez 27.30-34.

20Kalpayhekxa' kélwaxok kéxegke kélheykha nak néten,

kélwet'a ektahakxa xa tegma apwányam nak,#Dt 32.43; Jer 51.48.

kalpayhekxa' nahan kélwáxok kéxegke

kéltaha nak Dios énxet'ák apagkok

tén han ma'a aptaha nak seykha amya'a

tén han ma'a ektaha nak Dios

appeywa apkellegaso, hakte

aphésásók mók Dios aptemésesamakxa axta

kéxegke xa tegma apwányam nak, cham'a apxéna axta Dios yakwánxa katnehek kéllegasáseykegkoho xa tegma apwányam nak.

21Apya'ásek axta néten xama meteymog Dios apchásenneykha ekha apyennakte natámen xa, máxa axta m'a meteymog ekyawe agko' la'a, apyenyenték axta kañe' wátsam ekwányam. Aptahak axta appakmeta s'e:

“Sat katnehek kéltegkeso exchep xa

xép tegma apwányam Babilonia,#Jer 51.63-64.

megkólwetekxók sat cha'a.#Ez 26.21.

22Kamaskohok agko' sat nahan eklegáxko

kélpáwaso yát'axpog apyawe

ámay apagkok nak xép,

tén han ma'a yammámok ekpáwá nak,

tén han ma'a kélakkahaso ekpáwá nak,#Is 24.8; Ez 27.32.

méko sat nahan etnehek ma'a

ektaha nak apkeltamheykha,

cham'a ektémakxa enxoho apkeltamheykha,

kamaskok sat nahan eklegáxko m'a meteymog ekyawe

kéltekxekxamol'a aksok.

23Kamaskohok agko' sat nahan elsasáxma

chálewaso apagkok xép,

kamaskok sat nahan ma'a

ektémakxa l'a ekyennamáxma keytek sẽlyamhopma.#Jer 7.34; 25.10.

Apmelyeha'ak axta eykhe m'a ektaha axta

apkexakkáseykekxa cha'a exchep aksok apagkok keso náxop,

méko axta kaxhok keso náxop,

hakte apkelyexancháseykha axta nahan xép apyókxoho

pók aptémakxa énxet,

eñama m'a aptémakxa nak xép apteme yohóxma.”

24Hakte wetáxchek axta Dios appeywa apkellegaso éma apagkok xa tegma apwányam nak, cham'a ektaha axta Dios énxet'ák apagkok, tén han ma'a apyókxoho ektaha axta aptekyawa keso náxop.#Jer 51.49.

Currently Selected:

APOCALIPSIS 18: LEGN

Highlight

Copy

Compare