APOCALIPSIS 17
17
Eksexnánémaxche kelán'a ekyamagkáseyak pók énxet ekpathetéyak ektegye selyakye
1Ey'awak axta ko'o xama Dios apchásenneykha apkeñama nepyeseksa m'a siete Dios apkelásenneykha, cham'a apkelmeyncha'a axta siete egheykok eltakmela. Aptahak axta seyáneya s'e: “Empoho hana, axekmósek sat xép yakwánxa nak katnehek kéllegasáseykegkoho m'a kelán'a ekyakmagkáseykegko nak pók énxet ekpathetéyak ektegye selyakye, cham'a ekha nak néten yegmen.#Jer 51.13. 2Apyakmagkáseykegkek axta nahan cha'a pók kelwese'e apheykha náxop apatheteykegko xa kelán'a nak, kelnáhakkasek axta nahan anmen énxet apheykha náxop elánésa ekmaso nentémakxa mansexta xa kelán'a nak.”#Is 23.17; Jer 51.7.
3Apmeyk axta ko'o sekwanmagko Espíritu, keñe axta sentamákxo Dios apchásenneykha yókxexma meykexa énxet. Ekwetágwokmek axta ko'o kelán'a eyánte aksok nawhak eklo ekyexwasé m'a, héyegkek axta kéltáxeso enmexma Dios ma'a empehek, siete axta akkatkók ma'a, keñe axta diez ekyókxoho m'a kepet'ák.#Ap 13.1. 4Hómáyok axta ektaxno xa kelán'a nak, apyexwasé axta nahan, wakhésamaxchek axta nahan eknatanma sawo ekyátekto elyenma, tén han ma'a meteymog eltakmalma nak, tén han ma'a aksok ekmomnáwa elyakyel'a, egheykok ektakmalma axta nahan ekmeykha#Jer 51.7. láneyók axta aksok ekmanyása eñama m'a ekmaso ektémakxa axta kamasexta; 5Yetnegkek axta nahan kéltáxeso ekpayhakxa nát megkólya'áseyak ektémakxa, ektéma nak se'e: “Ko'o sekteme tegma apwányam Babilonia ektaha nak ektepakxa m'a ekmaso nak nentémakxa mansexta, ektaha nak han ektepakxa m'a ekyókxoho aksok ekmanyása ekheykegko nak keso náxop.” 6Keñe axta sekwet'a ko'o ekyeykesáxma kelán'a m'a Dios énxet'ák apagkok éma apagkok nak ektémol'a hegakhek anmen, tén han éma apagkok ma'a énxet'ák ektaha axta aptekyawa eñama melyenseyam apteme melya'áseyam Jesús.
Etlakkasek axta ko'o sekwet'a xa. 7Keñe axta aptaha seyáneya Dios apchásenneykha s'e: “¿Yaksak ektaha ekpelakkasa nak apwet'a? Altennaksek sat xép ektémakxa nak megkólya'áseyak ektémakxa xa kelán'a nak, altennaksek sat nahan ektémakxa xa aksok nawhak eklo eyánte nak xa kelán'a nak, cham'a siete akkatkók nak, tén han ma'a diez kepet'ák nak. 8Yáktegkek axta nano' xa aksok nawhak eklo apwet'a exchek xép, massegkek eyke kaxwo' ekyákto, kañe' máxek ekmatawóneg sat eyke kañentak katyapok#Dn 7.7; Ap 11.7. amonye ekmaheyak ma'a yakwánxa nak kólmasesamhok agko'. Katlakkasek sat étak énxet'ák apheykha nak keso náxop, cham'a megkanaktáxesamaxko nak apkelwesey weykcha'áhak ekyennaktésamo nak egnenyek#Sal 69.28; Ap 3.5; 13.8. eyeynamókxa m'a sekxo' elánamáxko keso náxop, cham'a apwet'a sat xa aksok nawhak eklo ekyáktama axta nano' axta, massegkek eyke kaxwo' ekyákto, wánxa agkok kawatak sat eyke makham.
9“Sat se'e kólamenyéhok énxet ekha nak apya'áseyak tén han ma'a ekha nak apyekpelchémo: Cham'a siete apkatkók nak ekyetchesamaxkoho m'a siete egkexe elyawe nak yetlo kelán'a ekha m'a néten; kelwese'e apkelwányam nahan ekyetchesamaxkoho xa siete apkatkók nak. 10Cinco nahan apyókxoho apkeletsapma xa kelwese'e apkelwányam nak, aptamháha nahan kaxwo' xama xa kelwese'e apkelwányam nak, keñe mew'a makham ma'a pók. Apwa'ak sat agkok ma'a pók ektaha nak axayók apteyapma, megkawegkók sat eyke apteme wese' m'a. 11Cháxa aksok nawhak eklo ekyáktama axta nano' xa, cham'a ekmassama nak nahan ekyákto, cháxa aptemegwánxa nak ocho apyókxoho kelwese'e apkelwányam xa; akke nahan apkeñamak nepyeseksa m'a siete kelwese'e apkelwányam nak, cham'a apmahágko nak yakwánxa kólmasesamhok agko'.
12“Cham'a diez egkepet'ák apwet'a exchek xép, cháxa ekyetchesamaxkoho diez kelwese'e apkelwányam#Dn 7.24. melma nak makham apkeltamheykha; yakwatakxoho agko' sat eyke elmok apkeltamheykha, yetlo m'a aksok nawhak eklo ekha nak kélyaheykekxoho, ekhawo m'a ektémakxa nak kélyaheykekxoho kelwese'e apkelwányam nak. 13Hawók nahan mók elchetamso apwáxók xa diez kelwese'e apkelwányam nak yakwayam egkések aksok nawhak eklo m'a ektémakxa nak ekha apmopwancha'a, tén han ma'a ektémakxa nak kélyaheykekxoho. 14Elnapakpok sat Nekkések Apketkok xa kelwese'e nak, emalánek sat eyke Nekkések Apketkok nepyeseksa xa kelwese'e apkelwányam nak, yetlo apkelxegexma'a Nekkések Apketkok ma'a ektaha axta Dios apkelwóneykha, cham'a ektaha axta anhan Dios apkelyeseykha, cham'a meyenseyam nak han apteme melya'áseyam, hakte Nekkések Apketkok apteme Wese' nepyeseksa m'a kelwese'e nak, apteme nahan Wese' apwányam nepyeseksa kelwese'e apkelwányam nak.”#Dt 10.17; Ap 19.16.
15Aptahak axta nahan Dios apchásenneykha seyáneya s'e: “Yegmen apwet'a exchek xép ekha néten kelán'a ekyakmagkáseyak nak pók énxet ekpathetéyak ektegye selyakye, ekteme ekyetchesamaxkoho m'a pók aptémakxa énxet'ák nak, tén han ma'a mók ektémakxa nak apkelpakmeyesma, tén han ma'a apkeleñama nak ekyókxoho yókxexma. 16Keñe m'a diez egkepet'ák apwet'a exchek xép tén han ma'a aksok nawhak eklo nak, cháxa peya nak kataknók ma'a kelán'a ekyakmagkáseyak nak pók énxet ekpathetéyak ektegye selyakye, kayenyók sat nahan axakko', meyke apáwa sat nahan katnésesek, katókasek sat nahan ápetek ekyókxa, kawatnekxak sat nahan neyseksa táxa. 17Appekkenchesek axta Dios ektémakxa apmopmenyého kalanaxchek apwáxók xa énxet'ák nak: Kaxhok sat mók apkelpakmeyesma kelwese'e apkelwányam yakwayam egkések aksok nawhak eklo m'a ektémakxa nak kélyaheykekxoho, ekwokmoho eksawhexkoho ektaha m'a apxeyenma axta katnehek Dios. 18Kelán'a apwet'a exchek xép, cháxa tegma apwányam apkeláneykencha'a nak apyókxoho kelwese'e apkelwányam apheykha nak keso náxop.”
Currently Selected:
APOCALIPSIS 17: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
