APOCALIPSIS 19

1Ekleg'ak axta ko'o kélpeywa ekxámokma ekyennakte agko' ma'a néten natámen xa. Entahak axta kélpeywa s'e:

“¡Apcheymákpoho sat cha'a kóltemésesek Wese' egegkok!

Dios egagkok apagkok ma'a nelwagkásamáxche teyp nak,

tén han ma'a apcheymákpoho nak,

tén han ma'a apmopwána nak,

2hakte ekpéwomo agko' cha'a

katnehek apyekpelchémo m'a Dios,

ekmámnaksoho nahan cha'a katnehek;

hakte apxénchek axta yakwánxa katnehek

aplegasáseykegkoho m'a kelán'a ekyakmagkáseyak nak

pók énxet ekpathetéyak ektegye selyakye,

cham'a, ektawáseykencha'a axta keso náxop

eñama m'a ektémakxa axta kamasexta;

axta aphésásók mók Dios ma'a aptekyawa axta énxet'ák

apagkok, cham'a aplegasásegkoho axta xa kelán'a nak.”#Dt 32.43; 2 R 9.7.

3Tamhákxeyk axta makham kélpeywa s'e:

“¡Apcheymákpoho sat cha'a kóltemésesek Wese' egegkok!

Megkamassegwomek sat nahan cha'a ekmaheyak

néten éten agkok xa Babilonia.”#Is 34.10.

4Apkelháxahánteyk axta náxop veinticuatro apkelámha apmonye'e tén han ma'a hawók nápakha énxet apkeleñama nak néten, apkelpeykásawók axta Dios apha nak néten aptaháno ektakmalma. Aptahak axta apkelpakmeta s'e: “¡katnahagkok sat! ¡Apcheymákpoho sat cha'a kóltemésesek Wese' egegkok!” 5Legáxchek axta kélpeywa eñama m'a ekyetnakxa axta taháno ektakmalma. Entahak axta amya'a s'e:

“¡kólteméses apcheymákpoho Dios egagkok

kélyókxoho kéxegke, apketkók tén han ma'a

apkelwányam nak, tén han kéxegkáxa

kéllané nak kéltamheykha eñama nak Dios,

kéltaha nak han cha'a kéláyo!”#Sal 115.13.

Nekkések Apketkok elyamhopma

6Ekleg'ak axta nahan ko'o ekyennamáxma, máxa axta entahak ma'a apxámakxal'a énxet apyennegkesóxma, máxa axta nahan entahak extegyawa m'a ekteyeykenxal'a yegmen#Ez 1.24. cham'a ektémol'a takha' appáwá ekyennakte agko'. Entahak axta apkelpakmeyesma s'e:

“¡Apcheymákpoho sat cha'a kóltemésesek

Wese' egegkok Dios!

hakte apcheynawok kaxwo' aptamheykha Wese' egegkok,

Dios egagkok ekha nak apyennakte.#Sal 93.1; 97.1; 99.1.

7Kalpayhekxa' hana egwáxok,

agyáncheshok hana ekpayheykekxa egwáxok,

óltemésesek hana apcheymákpoho Dios,

hakte wa'ak kaxwo' ekhem yakwánxa nak kalyamhápok

Nekkések Apketkok, keláneykxek ektahakxa

m'a yakwayam nak etnehek aptáwa:#Ef 5.23-32.

8kel'awok axta kataxnekxak apáwa

apkexyawáyo apcháxñeyo apagko'la'a,

tén han ma'a apkelyenmeyakla'a,#Ap 7.14.

hakte cháxa apáwa apkexyawáyo nak

ekyetchesamaxkoho m'a

nentémakxa ekpéwomo nak,

cham'a apkeltémakxa nak Dios énxet'ák apagkok.”

9Aptahak axta seyáneya Dios apchásenneykha s'e:

“Etaxés ektéma nak se'e: ‘Apkeleñémo sat énxet ektaha nak kéláneyeykha yakwayam epásegwók Nekkések Apketkok#Mt 22.2-3. elyamhopma.’ ” Axta nahan aptahak seyáneya s'e: “Cháxa amya'a ektaha nak ekmámnaksoho agko' eñama Dios xa.”

10Eltekxekkek axta ko'o etapnák náxop ekpayhókxa apkenmágkaxa Dios apchásenneykha, yakwayam alpeykesho', wánxa agkok, aptahak axta seyáneya s'e: “Ná etne aksa xa, ko'o sekteme Dios apchásenneykha, ekhawók ko'o exchep, ekhawók nahan ma'a apkelyáxeg'a ektaha nak melyenseyam apkeltenneykha Jesús apwesey. Elpeykesho m'a Dios.” Hakte, cháxa eyewáneseso énxet'ák ektaha nak apkellegaso Dios appeywa xa apkeltenneykha nak Jesús apwesey.

Enxet apchánte yatnáxeg apmopé

11Ekwet'ak axta ko'o aptepa yatnáxeg apmopé ekmayhekxo m'a néten.#Ez 1.1. Enxet ekmámnaksoho meyenseyam apyetlo Dios axta apwesey m'a ektaha axta apchánte, hakte ekpéwomo agko' axta m'a ektémakxa axta apyekpelchémo énxet'ák,#Sal 96.13; Is 11.4. tén han ma'a ektémakxa axta apkelané kempakhakma. 12Máxa axta táxa elálewe m'a apakta'ák,#Dn 10.6. xámok axta nahan apkelatcheso apkátek eltakmela ekhágko m'a apkátek, yetnegkek axta nahan kéltáxeso xama kélwesey meyke ekya'áseyak, wánxa axta aksa apya'áseykegkoho apagko' ma'a ektaha axta apchánte yatnáxeg. 13Éma axta apkeltexnámap aptaxno; Dios appeywa axta eyke apwesey.#Jn 1.1,14. 14Apkelyetlókek axta nahan sẽlpextétamo apkeleñama nak néten, apkelexyawáyo axta nahan apkelántaxno, apkelmopé apkeláxñeyo axta eyke, yatnáxeg apkelmopé axta nahan apkelchánte. 15Sókwenakte ekmahanta axta nahan tépak apátog, yakwayam emha ellegásesagkohok ma'a apyókxoho pók aptémakxa énxet'ák nak. Wese' sat etnehek yetlo meyke apmopyósa elanok pók,#Sal 2.9. etnehek sat nahan apkelyekpelchémo apyókxoho énxet ekhawo aptémakxal'a m'a ektaha nak apkelyakhapma anmen yámet ekyexna, elagkok sat nahan ma'a Dios aplo ekxegakmo nak ektémol'a agyenek vino, cham'a Dios meyke ekhémo nak.#Is 63.3; Lm 1.15; Jl 3.13; Ap 14.20. 16Yetnegkek axta nahan kéltáxeso apchaklamap, tén han ma'a apyók ektéma nak se'e: “Wese' apwányam nepyeseksa m'a kelwese'e apkelwányam nak, apteme nahan Wese' nepyeseksa m'a kelwese'e nak.”#Dt 10.17; Ap 17.14.

17Ekwet'ak axta ko'o pók Dios apchásenneykha apkenmeyncha'a néten ekhem, apyennaktésawok axta appeywa apkelwónencha'a ekyókxoho náta ektómol'a ápetek, cham'a elchempeykencha'awol'a néten. Aptahak axta s'e: “¡Kólchempoho, kólaknekxa' kóltawagkok ekyawe ektámáxche eñama nak Dios, 18yakwayam enxoho kóltawagkok kelwese'e apkelwányam nak aphápetek, tén han aphápetek ma'a apkelámha apmonye'e nak sẽlpextétamo, tén han aphápetek ma'a énxet megyeye nak aksok, tén han ma'a yatnáxeg aphápetek nak, tén han aphápetek ma'a énxet ektaha nak apkelchánte, tén han ma'a ekyókxoho ektémakxa nak kélhápetek; cha'a aphápetek ma'a énxet melmomap nak, tén han aphápetek ma'a énxet apkelmomap nak, tén han aphápetek ma'a énxet meyke kéláyo nak, tén han aphápetek ma'a énxet ekyawe nak kéláyo!”#Ez 39.17-20.

19Ekwet'ak axta ko'o aksok nawhak eklo, tén han ma'a kelwese'e apkelwányam nak keso náxop, yetlo sẽlpextétamo apagkok, apchaknákxeyk axta yakwayam elnapakpok ma'a ektaha axta apchánte yatnáxeg tén han yakwayam elnapakpok ma'a ektaha axta sẽlpextétamo apagkok. 20Máxchek axta xa aksok nawhak eklo nak, máxkók axta xamo' ma'a ektaha axta apkellegaso amya'a megkamámnaksoho nak, cham'a, apkeláneykegko axta cha'a aksok sempelakkaso nak agweta' nakto' xa aksok nawhak eklo nak. Apkelyexancháseykha axta énxet'ák xa ektaha nak apkellegaso amya'a megkamámnaksoho, eñama apkeláneyak ma'a aksok sempelakkaso nak agweta'. Axta apkelyexancháseyha m'a énxet'ák apchahayo axta keytek aksok nawhak eklo elkahaso, cham'a apkelpeykesamo axta kéleykmáseso kélheyáseykegkoho nak aksok nawhak eklo.#Ap 13.1-18. Keñe axta kélyenyawa yetlo akta'ák neyseksa táxa xa aksok nawhak eklo nak, tén han yetlo apakta'ák ma'a ektaha axta apkellegaso amya'a megkamámnaksoho, cham'a eyálewomakxa nak táxa yetlo m'a aksok ánek eyálewomol'a. 21Keñe axta m'a apyókxoho énxet nak elnapa m'a sókwenakte ekteyapma axta apátog ma'a ektaha axta apchánte yatnáxeg, kelyakkanakmek axta anhan náta aphápetek xa énxet'ák nak.

Currently Selected:

APOCALIPSIS 19: LEGN

Highlight

Copy

Compare