APOCALIPSIS 16
16
Egheykok elláneykegkoho Dios senlegasáseykegkoho
1Ekleg'ak axta ko'o kélpeywa ekyennakte ektepa eñama m'a tegma appagkanamap. Entahak axta amya'a apkeláneyakpo siete Dios apkelásenneykha s'e: “Kólxeg, kólyegkenák náxop se'e siete egheykok elláneykegkoho nak sẽllegasáseykegkoho elmaso agko' eleñama nak Dios.”
2Apxegkek axta apmonye xama Dios apchásenneykha, apyegkenchek axta nahan sẽllegasáseykegkoho keso náxop. Tekkek axta anhan taskapma ekmáske agko' apyempe'ék#Ex 9.10; Dt 28.35. apyókxoho m'a énxet ekyetna axta aksok nawhak eklo elkahaso, tén han ma'a apkelpeykesamo axta cha'a kéleykmáseso kélheyáseykegkoho nak.
3Apxegkek axta anhan pók Dios apchásenneykha, apyegkenchek axta aksok kañe' wátsam ekwányam, keñe axta ektamhákxo éma yegmen ma'a wátsam ekwányam, máxa axta entahak ma'a apmatñakxal'a énxet. Keletsekkek axta ekyókxoho aksok elleykha nak kañe' wátsam ekwányam.
4Apxegkek axta nahan pók Dios apchásenneykha, apyegkenwokmek axta aksok kañe' wátsam, tén han ma'a ekteyapmakxa nak yegmen, éma axta anhan tamhákxak yegmen xa ekyókxoho nak.#Ex 7.17-21; Sal 78.44. 5Keñe axta sekleg'a ko'o appeywa Dios apchásenneykha ektaha nak aptakmelcheso yegmen. Aptahak axta s'e:
“Xép apteme appéwomo
eñama apyekpelchásesamo xa ektaha nak,
Xép O Dios aptakmalma, apha nak kaxwo',
tén han ma'a aphama axta nahan nano' axta,
6hakte apyegkenchesegkek axta éma apagkok,
xép énxet'ák apagkok xa énxet'ák nak,
apyegkenchesegkek axta nahan éma apagkok ma'a
énxet'ák ektaha nak apkellegaso xép appeywa.
Kaxwo' eyke, apkelágkek xép éma xa énxet'ák nak,
hakte payhawok elagkok.”
7Ekleg'ak axta anhan ko'o kélpeywa eñama m'a ekwatnamáxchexa axta cha'a aksok ektekyawa. Entahak axta s'e: “Nakso', Xép apteme Wese', Dios ekha apyennakte, aptemék axta exchep apyekpelchásesamo ekmámnaksoho agko', tén han ekpéwomo agko'.”
8Hawók nápakha axta apwokmok Dios apchásenneykha, apyegkenchek axta aksok apkexpakha'a m'a ekhem, keñe axta ekxaka ekmowána m'a ekhem yakwayam kalwetek ekmexanma apyókxoho énxet'ák. 9Apsawhekpók axta énxet'ák élmeta apyempe'ék, wánxa agkok, axta eyke kalya'aweykxak apwáxók ma'a Dios, axta anhan elpeykásawók Dios. Kenmexáha axta aksa cha'a apkelpeywa Dios aptaha neykhe apmopwána emagkok xa aksok elmasagcha'a nak.
10Cinco axta apwokmok Dios apchásenneykha apyegkenma aksok apkexpakha'a m'a aksok nawhak eklo ektaháno nak, keñe axta ekyaktésáxma m'a ektémakxa nak wese'.#Ex 10.21. Apkeltakxeyk axta apaxkok énxet'ák eñama apkellegeykegkoho ekmáske; 11wánxa agkok, axta eyke elwáteságkok makham apkelané apkeltémakxa ekmaso xa énxet'ák nak, kenmexáha axta aksa apkelpakmeyesma m'a Dios apha nak néten, eñama apkellegeykegkoho ekmáske tén han eñama apkellegeykegkoho ekmáske m'a taskapma ekteyapma apyempe'ék.
12Seis axta apwokmok Dios apchásenneykha, apyegkenchek axta aksok kañe' wátsam ekwesey Éufrates, keñe axta ekyamaka m'a wátsam nak,#Is 11.15. yakwayam enxoho elyeykhak kelwese'e apkeleñama ekteyapmakxa ekhem.
13Ekwet'ak axta ko'o ektepa aksok ekmaso ekhó napnekteg átog yéwa ekwányam, axta anhan ekwet'ak ektepa átog ma'a aksok nawhak eklo, axta anhan ekwet'ak ektepa apátog ma'a seykha amya'a apmopwána amya'a nak. Antanxo axta ekyókxoho xa aksok elmasagcha'a ekhó nak napnekteg. 14kelyekhama' axta m'a, eláneyo axta cha'a aksok sempelakkaso nak agweta', kelántekkek axta yakwayam kanchásekxak apyókxoho kelwese'e keso náxop, yakwayam enxoho elmahagkok empakháxchexa, cham'a ekwokmo enxoho ekhem apagkok ma'a Dios ekha nak apyennakte.
15“Kóllano hana, exyekmek ko'o mehelháxanmakxoho ekhawo aptémakxal'a apmenyexma.#Mt 24.43-44; Lc 12.39-40; Ap 3.3. Apkeleñémo agko' énxet ektaha nak apkelhaxneykha, tén han ma'a apkeláneykekxa nak apkelnakta yakwayam elántaxnekxa', yakwayam enxoho nahan metyesha meyke apáwa tén han megkataxchek ma'a segmegkasamo nak.”
16Chanchesákxeyk axta kelyekhama' kelwese'e m'a yókxexma apkeltémakxa nak énxet'ák hebreos Armagedón.#Jue 5.19; 2 R 9.27; 23.29; 2 Cr 35.22; Zac 12.11.
17Siete axta apwokmok apyegkenma Dios apchásenneykha aksok ekyetno kañe' egheykok, apkexpakha'ak axta m'a exchahayam. Kañe' tegma appagkanamap apkeñama néten axta entépak kélpeywa ekyennakte agko' eñama m'a ekyetnamakxa nak taháno ektakmalma. Entahak axta amya'a s'e: “¡Penchásexchek elánamáxche!” 18Keñe axta ektepa apkelyenma, kélpeywa, tén han extegyawa, pexyenegkek axta xóp eñama m'a xóp ekyawheykha#Ap 8.5; 11.13,19. ekyennakte agko' axta, axta kaxnawok ma'a ekweykenxal'a cha'a ekyawheykha xóp apheykegkaxa énxet keso náxop. 19Apkántanxo nápakha'a axta apyepteypok tegma apwányam, apkelyaknenágkek axta anhan tegma apwányam nak keso náxop, keñe axta ekxénwákxoho apwáxok Dios ma'a tegma apwányam Babilonia, yakwayam yagkok sẽllegasáseykegkoho eñama nak Dios ekyetchesamaxkoho nak anmen, cham'a aplawa axta.#Is 51.17; Jer 25.15; Ap 14.10. 20Sawhexkók axta elmassegwokmo ekyókxoho egkexe étkók, tén han ma'a xóp elekháhéyak elyawe nak,#Ap 6.4. 21pallenteyk axta nahan yegmen elyennakte eleñama néten ekpalwa'akto énxet'ák,#Ex 9.23; Ap 11.19. cuarenta kilos axta ekwánxa elyentaxno, wánxa agkok, kenmexáha axta eyke aksa cha'a apkelpeywa Dios xa énxet'ák nak, eñama m'a yegmen elyennakte ekmaso axta, hakte sagko' agko' axta m'a sẽllegasáseykegkoho nak.
Currently Selected:
APOCALIPSIS 16: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
