APOCALIPSIS 15
15
Dios apkelásenneykha yetlo m'a siete ektemegwánxa nak néxa kéláphaso aksok elmasagcha'a
1Ekwet'ak axta makham ko'o mók aksok sempelakkaso agko' nak agweta' ma'a néten, cham'a aksok segyegwakkasamo nak agweta'; siete Dios apkelásenneykha axta m'a, yetlo m'a siete ektemegwánxa nak néxa aksok elmaso senlegasáseykegkoho. Cháxa ektahakxa axta ektemegwokmo néxa Dios aplo xa.
2Ekwet'ak axta makham ko'o xama aksok ekyetchesamaxkoho wátsam ekwányam elyenma, táxa axta nahan ekyepetche, apchaknáha axta nahan nekha wátsam ekwányam ma'a ektaha axta apkelyaphogweykmoho apkenmexa m'a aksok nawhak eklo tén han apkenmexa m'a kéleykmáseso kélheyaseykegkoho nak aksok nawhak eklo, cham'a aksok nawhak eklo ekha nak elkahaso. Yát'axpog apyawe axta nahan apkelmeykha xa énxet'ák nak, ektaha axta Dios apkelmeyáseyak. 3Apkelmeneykmásek axta nahan Moisés apmeneykmaso,#Ex 15.1-18. aptaha axta Dios apchásenneykha. Nekkések Apketkok apmeneykmaso axta nahan apkelmeneykmásak. Entahak axta apkelmeneykmaso s'e:
“Awanhok agko', tások agko' nahan ekyókxoho aksok
apkelané axta exchep Wese',
Dios ekha nak apyennakte;
ekpéwomo exchep ámay apagkok,
ekmámnaksoho nahan,
Xép Wese' apwányam nepyeseksa
énxet'ák keso náxop.
4¿Wese', yaksak sat megkakyek xép?
¿Yaksak sat megkaltemésesek apcheymákpoho?#Jer 10.7.
Xép apwánxa apagkok aptakmalma apagko';
apyókxoho pók aptémakxa énxet'ák sat elxegma,
elpeykeshok sat nahan xép.#Sal 86.9.
Hakte wetáxchek axta exchep ma'a
ektémakxa nak aptamheykha ekpéwomo.”
5Enmexawok axta ko'o néten natámen xa, ekwet'ak axta ko'o apmayheykxo tegma appagkanamap ma'a néten, cham'a ekpagkanamaxchexa agko' nak, kélpekkenmakxa nak ekhémo mók nelpakhetchásamáxkoho Dios.#Ex 38.21. 6Ekwet'ak axta anhan apkelántepa kañe' tegma appagkanamap siete Dios apkelásenneykha, yetlo apkelseykha siete aksok elmaso senlegasáseykegkoho nak. Apáwa apmopé apcháxñeyo axta apkelántaxno, apkelyenméyak axta nahan, sawo ekyátekto elyenma axta nahan apnakteté apnenya'ák. 7Xama énxet apkeñama néten axta aptépak aksa nepyeseksa hawók nápakha, apkelmeyásegkek axta anhan Dios apkelásenneykha siete egheykok eltakmalma ekyátekto elyenma yetlo elláneykegkoho m'a sẽllegasáseykegkoho ekmaso eñama nak Dios, cham'a apha nak megkatnegwayam enéxa. 8Lanawok axta éten#Ex 40.34; 1 R 8.10-11; 2 Cr 5.13-14; Is 6.4. tegma appagkanamap eñama m'a ektémakxa nak Dios apmopwána, tén han eñama m'a ektémakxa nak meyke ekhémo; méko axta eyegwagko katxek megkamassegwokmo m'a siete aksok elmaso apkelseykha axta m'a siete Dios apkelásenneykha.
Currently Selected:
APOCALIPSIS 15: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
