COLOSENSES 3
3
1Kólchetam kéxegke aksok eleñama nak néten, cham'a aphamakxa nak Cristo ekpayhókxa nak apkelya'asamakxa Dios,#Sal 110.1; He 1.3. hakte kélnakxátekháseykmek axta kéxegke xamo' Cristo.#Ro 6.4-11; Col 2.12. 2Kaxénmakha cha'a kélwáxok ma'a aksok eleñama nak néten, nágkaxénmakha cha'a kélwáxok aksok eleñama nak keso náxop. 3Hakte kéletsepmeyk axta kéxegke, kaxwo' eyke, powásexkók kéxegke ekyennakte kélnenya'ák xamo' Cristo eñama kélyepetcheyo Dios. 4Cristo neykhe xa ektémakxa nak kélyennakte kéxegke.#Gá 2.20; Flp 1.21. Apkexyekmek sat agkok makham Cristo keso náxop, kéxegke sat nahan kóltehek kélxegexma, kawakxohok sat nahan kéxegkáxa m'a ektémakxa nak apcheymákpoho.
Nano' nentémakxa tén han axnagkok nentémakxa
5Kólmasésem kéxegke m'a ekyókxoho nentémakxa eñama náxop ekyetna nak kéxegke: nágkóllána aksa kélxama ekmaso nak nentémakxa mansexta, nágkóllána anhan nentémakxa ekmanyása nak, nágkólyeykhasaxkoho nahan kélmámenyého kóllának aksok, nágkólteme anhan kélmeyókásamáxkoho kélxakko' aksok (cháxa ekhawo nelpeykesamo nak kéleykmáseso xa). 6Cháxa keñamak ekxegakmo nak yakwayam ellegásesagkohok ekmaso agko' Dios xa énxet'ák apteme nak melyaheykekxoho.#Ef 2.3. 7Cháxa kélláneya axta kéxegkáxa nano' axta xa. 8Kólwatés kaxwo' kéxegke ekyókxoho s'e: nenlo, negyeykhásamáxkoho negmámenyého anlának aksok, ekmaso nentémakxa, negyamanma egmók, tén han ekmaso nak negya'áseyam. 9Nágkólyexanchesha aksa kélmók, hakte kélyenyókasek axta kéxegke m'a nano' kéltémakxa axta,#Ef 4.22. kélyenyókasek axta anhan ma'a aksok kélláneya axta cha'a nano' axta, 10kéltemék kéxegke axnagkok kéltémakxa nentémol'a antaxnekxak nentaxno aphaxnagkok:#Ef 4.24. cham'a axnagkok nentémakxa nak,#Gn 1.26; Ef 2.10. aptemesásegko nak cha'a axnagkok Dios, yakwayam kaxnágwakxohok ma'a aptémakxa nak, ektaha axta anhan apkelané, yakwayam enxoho agya'ásegwomhok ektakmela agko' ma'a aptémakxa nak Dios. 11Massegkek kaxwo' nenteme negyeykhamaxche egmók, megkeyxek nenteme enxoho griego esenhan nenteme enxoho judíos, megkeyxek nahan ma'a ekha enxoho sẽlkahaso kélyenyekhamol'a egyempehek, esenhan ma'a méko enxoho sẽlkahaso, megkeyxek nahan nenteme enxoho neñama mók nekha, megkeyxek nahan nenteme enxoho magya'áseyak aksok, megkeyxek nahan ma'a nenteme nak negmomaxche esenhan ma'a magmomaxche nak; Cristo eyke apwánxa apagko' meyke ekhémo, apheyk nahan kélwáxok Cristo kélyókxoho nak.
12Apkelásekha'awók kéxegke Dios, apkelyésáha axta nahan yakwayam kóltehek énxet'ák apagkok. Kólteme kélahakkásamáxche m'a ekmámnaksoho nak apmopyósa anlanok egmók, ektakmeleykha egwáxok, megkeymáxkoho egwáxok, meyke ekyenneykha egwáxok anlanok egmók, tén han ma'a mampekhésamaxche nak.#Ef 4.2. 13Kólteme cha'a kéllenmáxamáxkoho aptemésesakxa enxoho kélmók, nágkólyakmagkásekxa aksa ekyetna enxoho megkaleklo kélwáxok aptahakxa kélmók. Ekhawo aptahakxa axta Wese' egegkok meyakmagkáseykxo kéltémakxa kéxegke, nágkólyakmagkásekxa nahan kéxegkáxa aptemésesakxa enxoho kélmók.#Ef 4.32. 14Ekyagwánxa agko' ektakmela keytek kéxegke m'a kélásekhamaxkoho nak, cham'a negásekhayo segyepetcháseykekxohol'a cha'a egmók. 15Meyke ektahakxa egwáxok eñama Cristo sat katnehek ekpékesáseyak kélwáxok kéxegke. Axta keñamak apkelwóneykencha'a kéxegke Dios xa, yakwayam enxoho hentemesásekxak ektémakxal'a wánxa xama negyókxa. Kólmes nahan ekxeyenma kélwáxok Dios.
16Keytek sat cha'a kélwáxok kéxegke ekyókxoho amya'a eñama nak Cristo. Kólxekmós cha'a kélnámokkok, kólwaskakkásekxoho nahan cha'a kélnámokkok yetlo kélmeykha m'a ekyókxoho ektémakxa nak kélya'ásegwayam. Kólmeneykmes negmeneykmaso eñama nak salmos, tén han ma'a negmeneykmaso nak, tén han ma'a negmeneykmaso aptekkeso nak egwáxok Espíritu apkeñama nak Dios, yetlo kélméso ekxeyenma kélwáxok Dios. 17Kóllána cha'a yetlo kélxeyenma Wese' egegkok Jesús apwesey ekyókxoho aksok kéllanakxa enxoho esenhan ma'a kélxénakxa enxoho, kólmés nahan cha'a ekxeyenma kélwáxok Dios Egyap eñama m'a Wese' egegkok Jesús.#Ef 5.19-20.
Eyéméxchexa etnehek apkeltamheykha nepyeseksa apnámokkok énxet melya'áseyam nak Cristo
18Kelán'ák ekha nak anakteyegka'a, kólyahakxoho cha'a kélnakteyegka'a,#Ef 5.22; 1 P 3.1. hakte cháxa eyéméxchexa nak antehek nenteme nak magya'áseyam Wese' egegkok xa. 19Enxet'ák ekha nak apnakteyegka'a, kólásekhoho cha'a kélnakteyegka'a#Ef 5.25; 1 P 3.7. nágkólyennaktés cha'a kélpeywa kóllána'.
20Kélketchek, kólyahakxoho cha'a kélyepmeyk aptemésesakxa enxoho, hakte cháxa eklekkesamo nak apwáxok Wese' egegkok antehek xa.#Ef 6.1. 21Enxet'ák ekha nak apketchek#Ef 6.4. nágkóllókas aksa kélketchek, yakwayam enxoho megkayakhapwomók apwáxok.
22Kéxegke kélteme nak kélmomaxche kéltemesáseykha aksa, kólyahakxoho cha'a kélwese'e kélagkok apheykha nak keso náxop, kóllanés cha'a aksok wese' kélagkok, háwe ekwánxa agkok ma'a apkelánencha'a enxoho, yakwayam enxoho yának katakmelak kéltamheykha, wánxa agkok, kóltemeykha yetlo ekmáheyo kélwáxok, eñama kélaye m'a Wese' egegkok. 23Ekyókxoho aksok kéllanakxa enxoho, kóllána' cha'a yetlo kélmáheyo kélagko' kóllána', kéltémakxal'a kóllanaksek aksok Wese' egegkok, megkatnaha nak énxet kéltemesáseykha. 24Hakte kélya'ásegkok kéxegke peya egkeyásekxak kéxegke Wese' egegkok ma'a aksok appagkancheso nak yakwayam egkések, ektaha nak ekyakmageykekxa kéllané m'a kéltamheykha nak. Hakte kélláneyak kéxegke kéltamheykha eñama nak Cristo, aptaha nak apmámnaksoho Wese' kélagkok. 25Kéxegke ektahakxa enxoho kéllané aksok ekmaso, kólxewekxak sat ekyakmageykekxa m'a aksok ekmaso kéllané nak,#Ef 6.5-8. hakte mehentemésesek cha'a negyeykhamaxche egmók Dios.#Dt 10.17; Ef 6.9.
Currently Selected:
COLOSENSES 3: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
