COLOSENSES 4
4
1Kéxegke kélwese'e nak, kólteme cha'a kéltémakxa ektakmela kóllának énxet kéltemesáseykha naksa nak, kólteméses nahan ma'a ekpayhawo nak kóltemésesek. Kaxén kéxegkáxa kélwáxok apha Wese' kélagkok ma'a néten.#Ef 6.9.
2Nágkólyensem cha'a kélteme nempeywa nelmaxnagko,#Ef 6.18-20; Flp 4.6. kólleyxmakha cha'a, kólmés nahan ekpayheykekxa kélwáxok Dios.
3Hẽlmaxnéses nahan cha'a negko'o xa yakwayam enxoho hegkegwánesesek Wese' egegkok óltennaha m'a appeywa, yakwayam enxoho anhan agkegwának anxének negko'o m'a amya'a megkólya'áseykegko axta eñama Cristo, cháxa keñamak sekha ko'o sẽlpextétamakxa eñama xa amya'a megkólya'áseykegko axta. 4Helmaxnéses nahan ko'o xa yakwayam enxoho katakmelhok agko' selya'asásegwayam énxet'ák xa amya'a nak, cham'a eyéméxko nak atnehek ko'o.
5Kólteme cha'a ekha kélya'áseykegkoho kéxegke nepyeseksa m'a énxet'ák apkelya'áseyam nak, kólyentamaxkoho cha'a kóllának aksok ektakmela keso negwánxa nak.#Ef 5.16. 6Kólteme cha'a ektakmela kéltenneykha, cham'a ekmátsa nak ageyxho', kéméxchek nahan cha'a kólya'asagkohok kélátegmowéyak kélmók.
Pablo ekxeyenma apwáxok
7Egyáxeg Tíquico#Hch 20.4; 2 Ti 4.12. sat esakxések kéxegke amya'a setnamakxa nak ko'o, aptaha nak meyenseyam sepasmo sektamheykha, sekxegexma nahan ektemék nenláneya m'a nentamheykha eñama nak Wese' egegkok. Cháxa egyáxeg aptaha nak negásekhayókxa negko'o xa. 8Ekeso eñamakxa seyáphasa nak kélhágkaxa kéxegke xa egyáxeg nak, yakwayam enxoho eltennasha ektémakxa negheykha negko'o, yakwayam enxoho anhan elwaskakkásekxohok kéxegke.#Ef 6.21-22. 9Onésimo sat nahan etnehek apxegexma apxega sat xa egyáxeg Tíquico,#Flm 10-12. cham'a Onésimo, aptaha nak egyáxeg negásekhayókxa negko'o, aptaha nak han egyáxeg meyenseyam aptamheykha, aptaha nak han apkeñama kélnepyeseksa kéxegke, sat eltennasha kéxegke ekyókxoho ektémakxa nak negheykha negko'o s'e.
10Apcháphásesek kéxegke ekxeyenma apwáxok Aristarco;#Hch 19.29; 27.2; Flm 24. keso sekha nak xamo' sẽlpextétamakxa; hawók nahan ma'a Marcos,#Hch 12.12,25; 13.13; 15.37-39. aptaha nak Bernabé apyaha' apketche. Ekmések axta kéxegke sekpeywa seltamhókxa kóltemésesek ma'a Marcos; aptemék sat agkok meyk'a kéxegke, kóláhapmakha sat. 11Apcháphásesek nahan ekxeyenma apwáxok kéxegke m'a Jesús apkeltamhomakpo nak han Justo. Cháxa sepasmeykencha'a nak ko'o sektamheykha yakwayam kawak ma'a aptémakxa nak Wese' apwányam Dios, apkeleñama nepyeseksa m'a énxet'ák judíos apteme nak han melya'áseyam, kaxnók ma'a pók énxet'ák nak. Awanhek axta anhan sepeykesáseykekxa ewáxok ko'o xa énxet'ák nak. 12Apcháphásesek nahan ekxeyenma apwáxok ma'a Epafras,#Col 1.7; Flm 23. aptaha nak han Cristo Jesús apkeláneykha; aptaha nak nahan apkeñama kélnepyeseksa kéxegke. Elmaxnéseshok nahan cha'a kéxegke, yakwayam enxoho keynnakwók kélteme megkólya'áseyam, tén han kólméshok agko' kélwáxok yakwayam kóllának ma'a Dios apmopmenyého nak. 13Ekya'ásegkok ko'o Epafras ekyetna ekyawe ekxéneykha apwáxok kéxegke, ekya'ásegkok nahan ko'o ekyetna ekxéneykha apwáxok Epafras ma'a énxet'ák apheykha nak Laodicea, tén han ma'a énxet'ák apheykha nak Hierápolis. 14Apcháphásesek nahan ekxeyenma apwáxok kéxegke m'a Lucas,#2 Ti 4.11; Flm 24. aptaha nak pánakte egyap negásekhayo. Apcháphásesek nahan ekxeyenma apwáxok ma'a Demas.#2 Ti 4.10; Flm 24.
15Kóltennés negaphásesa negko'oxa ekxeyenma egwáxok ma'a ẽlyáxeg'a apheykha nak Laodicea. Kóltennés nahan negaphásesa negko'o ekxeyenma egwáxok ma'a Ninfa, tén han ma'a énxet'ák apchakneykekxoho nak cha'a axagkok. 16kélpenchesek sat agkok kélyetseté s'e weykcha'áhak nak, kólaphés sat nahan ma'a apchakneykekxexa nak énxet'ák tegma apwányam Laodicea,#Ap 3.14-22. yakwayam enxoho kalyetsetaxchek nahan ma'a. Kólyetset sat nahan kéxegkáxa weykcha'áhak ekwe enxoho kélhágkaxa eñama m'a Laodicea. 17Kólteme sat kólának Arquipo s'e:#Flm 2. “Elenxanmoho sat esawhohok elának ma'a aptamheykha, cham'a apkeltamhókxa axta etnehek Wese' egegkok.”
18Ko'o Pablo, ko'o ahagko' sektáxéseso kéxegke s'e ekxeyenma ewáxok nak. Kaxén kélwáxok sekha ko'o sẽlpextétamakxa. Dios sat etnehek apméso naksa kéxegke m'a ektémakxa nak segemleykekxoho.
Currently Selected:
COLOSENSES 4: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
