Popular Bible Verses from COLOSENSES 3

Share

Kólteme cha'a kéllenmáxamáxkoho aptemésesakxa enxoho kélmók, nágkólyakmagkásekxa aksa ekyetna enxoho megkaleklo kélwáxok aptahakxa kélmók. Ekhawo aptahakxa axta Wese' egegkok meyakmagkáseykxo kéltémakxa kéxegke, nágkólyakmagkásekxa nahan kéxegkáxa aptemésesakxa enxoho kélmók.

Kaxénmakha cha'a kélwáxok ma'a aksok eleñama nak néten, nágkaxénmakha cha'a kélwáxok aksok eleñama nak keso náxop.

Ekyókxoho aksok kéllanakxa enxoho, kóllána' cha'a yetlo kélmáheyo kélagko' kóllána', kéltémakxal'a kóllanaksek aksok Wese' egegkok, megkatnaha nak énxet kéltemesáseykha.

Apkelásekha'awók kéxegke Dios, apkelyésáha axta nahan yakwayam kóltehek énxet'ák apagkok. Kólteme kélahakkásamáxche m'a ekmámnaksoho nak apmopyósa anlanok egmók, ektakmeleykha egwáxok, megkeymáxkoho egwáxok, meyke ekyenneykha egwáxok anlanok egmók, tén han ma'a mampekhésamaxche nak.

Keytek sat cha'a kélwáxok kéxegke ekyókxoho amya'a eñama nak Cristo. Kólxekmós cha'a kélnámokkok, kólwaskakkásekxoho nahan cha'a kélnámokkok yetlo kélmeykha m'a ekyókxoho ektémakxa nak kélya'ásegwayam. Kólmeneykmes negmeneykmaso eñama nak salmos, tén han ma'a negmeneykmaso nak, tén han ma'a negmeneykmaso aptekkeso nak egwáxok Espíritu apkeñama nak Dios, yetlo kélméso ekxeyenma kélwáxok Dios. Kóllána cha'a yetlo kélxeyenma Wese' egegkok Jesús apwesey ekyókxoho aksok kéllanakxa enxoho esenhan ma'a kélxénakxa enxoho, kólmés nahan cha'a ekxeyenma kélwáxok Dios Egyap eñama m'a Wese' egegkok Jesús.

Ekyagwánxa agko' ektakmela keytek kéxegke m'a kélásekhamaxkoho nak, cham'a negásekhayo segyepetcháseykekxohol'a cha'a egmók.

Kólchetam kéxegke aksok eleñama nak néten, cham'a aphamakxa nak Cristo ekpayhókxa nak apkelya'asamakxa Dios, hakte kélnakxátekháseykmek axta kéxegke xamo' Cristo.

Meyke ektahakxa egwáxok eñama Cristo sat katnehek ekpékesáseyak kélwáxok kéxegke. Axta keñamak apkelwóneykencha'a kéxegke Dios xa, yakwayam enxoho hentemesásekxak ektémakxal'a wánxa xama negyókxa. Kólmes nahan ekxeyenma kélwáxok Dios.

Kólmasésem kéxegke m'a ekyókxoho nentémakxa eñama náxop ekyetna nak kéxegke: nágkóllána aksa kélxama ekmaso nak nentémakxa mansexta, nágkóllána anhan nentémakxa ekmanyása nak, nágkólyeykhasaxkoho nahan kélmámenyého kóllának aksok, nágkólteme anhan kélmeyókásamáxkoho kélxakko' aksok (cháxa ekhawo nelpeykesamo nak kéleykmáseso xa).

Hakte kéletsepmeyk axta kéxegke, kaxwo' eyke, powásexkók kéxegke ekyennakte kélnenya'ák xamo' Cristo eñama kélyepetcheyo Dios.

Kólwatés kaxwo' kéxegke ekyókxoho s'e: nenlo, negyeykhásamáxkoho negmámenyého anlának aksok, ekmaso nentémakxa, negyamanma egmók, tén han ekmaso nak negya'áseyam.

Nágkólyexanchesha aksa kélmók, hakte kélyenyókasek axta kéxegke m'a nano' kéltémakxa axta, kélyenyókasek axta anhan ma'a aksok kélláneya axta cha'a nano' axta, kéltemék kéxegke axnagkok kéltémakxa nentémol'a antaxnekxak nentaxno aphaxnagkok: cham'a axnagkok nentémakxa nak, aptemesásegko nak cha'a axnagkok Dios, yakwayam kaxnágwakxohok ma'a aptémakxa nak, ektaha axta anhan apkelané, yakwayam enxoho agya'ásegwomhok ektakmela agko' ma'a aptémakxa nak Dios.

Enxet'ák ekha nak apnakteyegka'a, kólásekhoho cha'a kélnakteyegka'a nágkólyennaktés cha'a kélpeywa kóllána'.

Kélketchek, kólyahakxoho cha'a kélyepmeyk aptemésesakxa enxoho, hakte cháxa eklekkesamo nak apwáxok Wese' egegkok antehek xa.

Kelán'ák ekha nak anakteyegka'a, kólyahakxoho cha'a kélnakteyegka'a, hakte cháxa eyéméxchexa nak antehek nenteme nak magya'áseyam Wese' egegkok xa.