COLOSENSES 2
2
1Eltamhok ko'o kólya'ásegwomhok selenxanakmoho sektamheykha ekyentaxno agko' yakwayam apasmok kéxegke, tén han ma'a énxet'ák apheykha nak tegma apwányam Laodicea,#Ap 3.14-22. tén han ma'a apyókxoho énxet mehetaya nak makham sekyókxoho. 2Ekwaskápeykxók ko'o yakwayam enxoho elxawagkok ekmayheykegkoho apwáxók xa énxet'ák nak, yakwayam enxoho megyexpanchesakpek eñama m'a apkelásekhamakpoho nak, yakwayam enxoho nahan katnehek ekyawe agko' apkelya'ásegwayam, cham'a ekmowána nak kalya'asásegwók ma'a megyahayo axta kólya'asagkohok Dios, cham'a aptaha nak Cristo. 3Cristo apteme ekyetnamakxa m'a ekyókxoho ektémakxa nak negya'ásegwayam tén han ma'a negyekpelchágwayam nak. 4Eltennásek ko'o kéxegke xa, yakwayam enxoho megkalyexanchesha kéxegke m'a amya'a senlekweykmoho nak. 5Maxnak eykhe ko'o sekyókxoho kélnepyeseksa kéxegke, xénchek eyke cha'a ewáxok, payhekxeyk nahan ewáxok sekwet'a kéltakmelchesamo kéltamheykha, tén han kéllenxanakmoho kélyennaktésamo kélteme megkólya'áseyam ma'a Cristo.
Axnagkok nentémakxa eñama Cristo
6Kéméxchek kéxegke kóltehek kélyepetcheyo Jesucristo Wese' egegkok ekhawo kéltahakxa axta kélma takha'. 7kéméxchek kóltehek kéxegke kélyepetcheyo kélagko' ma'a Cristo, tén han kóltehek kélasenneykekxa kélagko' eñama m'a megkólya'áseyam nak, ekhawo ektahakxa axta kélxekmóso kéxegke, kólmések nahan cha'a ekxeyenma kélwáxok Dios.
8Kólawho kéxegke: nágkólho aksa kamok kélwáxok kéxegke m'a apmáheyo nak elyexanchesha énxet'ák yetlo apchásenneykekxa m'a ektémakxa nak apkelya'áseyak megkamámnaksoho, hakte metnehek cha'a apchásenneykekxa Cristo xa énxet'ák nak, wánxa cha'a yásenneykxak ma'a apkeltémakxa nak énxet, tén han apchásenneykekxo cha'a m'a ektémakxa nak ekmowána aksok eláneykencha'a nak keso náxop.#Gá 4.3,9.
9Hakte ekyókxoho aptémakxa nak Dios, sawhomáxkók ekyetnama m'a ektémakxa axta apyókxa Cristo apwaya keso náxop. 10Sawhomáxkók kéxegke kélxawáya m'a aksok eleñama nak Dios eñama kélyepetcheyo m'a Cristo, aptaha nak apkemha apmonye neyseksa ekyókxoho aksok ekha nak elmowancha'a, tén han ma'a ekha nak kélyaheykekxoho. 11Kélkaháseyxchék axta kéxegke eñama kélyepetcheyo Cristo, háwe eyke m'a ektémakxal'a hẽlkahaksek kélyenyekhamol'a egyempehek, akke m'a sẽlyenyókaso nak nentémakxa mólya'asáxma. Cháxa sẽlkahaso eñama nak Cristo xa. 12Kélatawañamáxchek axta kéxegke xamo' Cristo, cham'a kélyakpasásegko axta yegmen, kélnakxátekhásekmek axta nahan kéxegke xamo' ma'a Cristo,#Ro 6.4. hakte axta kólya'áseykmok kéxegke Dios ekha apmopwána, cham'a aptaha axta apxátekháseyam Cristo nepyeseksa apkeletsapma axta. 13Máxa kélhapák axta kéltemék kéxegke nápakto' Dios nano' axta eñama m'a megkólya'asáxma axta, tén han eñama m'a megkólkahásamáxche axta kélyenyekhamol'a egyempehek; apmések eyke kaxwo' kéxegke Dios ekyennakte kélnenyek xamo' Cristo,#Ef 2.1-5. cham'a Dios aptaha nak meyakmagkáseykekxa ekyókxoho ektémakxa mólya'asáxma. 14Apmasések axta Dios ekyókxoho ektémakxa axta eknaktáxésamaxche yakwayam eykhe kólyakmagkásekxak, ektémakxa axta mólyaheykekxa m'a eltémókxa axta antehek eknaktáxésamaxche, cham'a eknaktáxésamaxche sẽlyateyeykegkoho axta cha'a eltémo anlának ma'a eltémókxa nak antehek.#Ef 2.15. Apmasések axta Dios xa, cham'a apyepetchesa axta néten aksok ektegyéso. 15Cristo axta keñamak apmasésesa Dios ektémakxa axta elmowancha'a m'a aksok ekha nak elmowancha'a, tén han ma'a ekha nak kélyaheykekxoho, apnaklákxeyk axta nápakta'awo' apxámokxoho énxet'ák, cham'a apkékesákxo axta apnaklákxo aptemésesa elmomaxche apxekmowásawo aptaha apmallanma.
Kólchetam aksok eleñama nak néten
16Nágkólhaxkoho aksa ekxénáxko enxoho eyesagko m'a aksok kéltéyak nak tén han ma'a kélyenéyak nak, tén han ma'a ekhem kélakneykekxexal'a yakwayam kalpayhekxak kélwáxok, esenhan ma'a pelten apketkok kélesawásesamol'a, esenhan ma'a ekhem kéllókasamakxal'a kélyampé.#Ro 14.1-6. 17Cháxa ektaha nak ekyetchesamaxkoho aksok peya nak kawa' xa ekyókxoho nak, Cristo eyke apteme apmámnaksoho. 18Nágkólho aksa émentók aksok kélxawé naksa kéxegke xa énxet'ák aptamheykegkohol'a máxa megkaleymáxkoho apwáxók, cham'a apkelpeykesamo nak Dios apkelásenneykha, apkexeyenmol'a apkelwetayo m'a aksok kélxekmósamo nak, cham'a megyésol'a eleykpoho' eñama ekteme elchetamso apwáxók ma'a ektémakxal'a elchetamso apwáxok énxet. 19Melyepetcheyók Cristo xa énxet'ák nak, cham'a Cristo aptaha nak apkemha apmonye, aptaha nak han cha'a apwánegkeso apyókxa, cham'a apchágko enxoho ekto, cham'a apyepetchásekxo enxoho cha'a mók, ekhawo m'a ektémakxa nak apmopmenyého Dios.#Ef 1.22; 4.15-16.
20Kéletsapawók axta kéxegke xamo' Cristo,#Ro 6.6-11; Gá 2.19-20. massék elma kéxegke m'a aksok ekha nak elmowancha'a eláneykencha'a nak keso náxop. ¿Yaksak ektaha, máxa kéltahak kélyetlákxo enxoho makham kéxegke ektémakxa nak keso náxop? ¿Yaksak ektéma kélyaheykekxoho nak cha'a, ektéma nak cha'a amya'a agáneyxchek se'e?: 21“Ná epaknegwomho aksa xa, ná etaw aksa xa, ná ema aksa.” 22Kamassegwók cha'a natámen kélmeykha xa ekyókxoho kéltemókxa nak antehek, hakte énxet apkeltémókxa antehek, énxet nahan keñamak sẽlxekmóso. 23Máxa eykhe katnehek eñama enxoho ektémakxa nak negya'ásegwayam xa aksok nak, hakte kaltamhok cha'a antehek máxa ektakmela enxoho nentémakxa, kaltamhok nahan cha'a antehek máxa megkeymáxkoho egwáxok, kaltamhok nahan cha'a anlegásesagkohok negyókxa, yawanchek eyke kamagkok ma'a aksok ekyespagkamakxa nak negyókxa.
Currently Selected:
COLOSENSES 2: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
