អេសាយ 52
52
1ភ្ញាក់ឡើង! ភ្ញាក់ឡើង! ស៊ីយ៉ូនអើយ
ចូរបំពាក់ឫទ្ធានុភាពរបស់អ្នក!
យេរូសាឡិមជាក្រុងដ៏វិសុទ្ធអើយ
ចូរស្លៀកសម្លៀកបំពាក់ដ៏រុងរឿងរបស់អ្នក!
ដ្បិតលែងមានពួកដែលគ្មានការកាត់ស្បែក និងពួកសៅហ្មង
ចូលមកក្នុងអ្នកទៀតឡើយ។
2យេរូសាឡិមអើយ ចូររលាស់ធូលីចេញពីខ្លួន!
ចូរក្រោកឡើង ហើយអង្គុយ!#52:2 យេរូសាឡិមអើយ ចូររលាស់ធូលីចេញពីខ្លួន! ចូរក្រោកឡើង ហើយអង្គុយ!―ឯកសារបុរាណខ្លះថា “យេរូសាឡិមជាឈ្លើយសឹកអើយ ចូររលាស់ធូលីចេញពីខ្លួន ហើយក្រោកឡើង!”។
កូនស្រីស៊ីយ៉ូនជាឈ្លើយសឹកអើយ
ចូរដោះចំណងចេញពីករបស់អ្នក!
3ដ្បិតព្រះយេហូវ៉ាមានបន្ទូលដូច្នេះថា៖
“អ្នករាល់គ្នាត្រូវបានលក់ដោយឥតគិតថ្លៃ
ក៏ត្រូវបានប្រោសលោះមិនមែនដោយប្រាក់”។
4ព្រះអម្ចាស់របស់ខ្ញុំ គឺព្រះយេហូវ៉ាមានបន្ទូលដូច្នេះថា៖
“ពីដំបូងប្រជារាស្ត្ររបស់យើងបានចុះទៅអេហ្ស៊ីប ដើម្បីរស់នៅបណ្ដោះអាសន្ននៅទីនោះ;
ក្រោយមក ជនជាតិអាស្ស៊ីរីបានសង្កត់សង្កិនពួកគេដោយឥតហេតុ។
5ដូច្នេះឥឡូវនេះ តើយើងត្រូវធើ្វអ្វីនៅទីនេះ?”។
នេះជាសេចក្ដីប្រកាសរបស់ព្រះយេហូវ៉ា។
“ដែលប្រជារាស្ត្ររបស់យើងត្រូវបានយកទៅដោយឥតគិតថ្លៃ
ពួកមេគ្រប់គ្រងរបស់ពួកគេក៏ធ្វើឲ្យពួកគេទ្រហោយំ
ហើយនាមរបស់យើងត្រូវបានប្រមាថឥតឈប់ឈរវាល់ព្រឹកវាល់ល្ងាច”។
នេះជាសេចក្ដីប្រកាសរបស់ព្រះយេហូវ៉ា។
6“យ៉ាងណាមិញ ប្រជារាស្ត្ររបស់យើងនឹងស្គាល់នាមរបស់យើង។
ដូច្នេះនៅថ្ងៃនោះ ពួកគេនឹងដឹងថា គឺយើងហ្នឹងហើយ ជាព្រះអង្គនោះ ដែលបាននិយាយ។
មើល៍! គឺយើងហ្នឹងហើយ!”។
7ជើងរបស់អ្នកដែលប្រកាសដំណឹងល្អលើភ្នំនានា ស្រស់ស្អាតណាស់ហ្ន៎!
អ្នកទាំងនោះជាអ្នកប្រកាសសេចក្ដីសុខសាន្ត
ជាអ្នកប្រកាសដំណឹងល្អដ៏ប្រសើរ
ជាអ្នកប្រកាសសេចក្ដីសង្គ្រោះ
ជាអ្នកដែលនិយាយនឹងស៊ីយ៉ូនថា៖ “ព្រះរបស់អ្នកបានសោយរាជ្យហើយ!”។
8ន៏ សំឡេងពួកអ្នកយាមរបស់អ្នក!
ពួកគេបន្លឺសំឡេងឡើង
ពួកគេច្រៀងដោយអំណរជាមួយគ្នា
ពីព្រោះពួកគេនឹងឃើញផ្ទាល់ភ្នែក
នៅពេលព្រះយេហូវ៉ាយាងត្រឡប់មកស៊ីយ៉ូនវិញ។
9ទីបាក់បែករបស់យេរូសាឡិមអើយ
ចូរហ៊ោកញ្ជ្រៀវ
ចូរច្រៀងដោយអំណរជាមួយគ្នាចុះ!
ដ្បិតព្រះយេហូវ៉ាបានកម្សាន្តចិត្តប្រជារាស្ត្ររបស់ព្រះអង្គ
ក៏បានប្រោសលោះយេរូសាឡិមហើយ។
10ព្រះយេហូវ៉ាបានលាត់ព្រះពាហុដ៏វិសុទ្ធរបស់ព្រះអង្គនៅចំពោះភ្នែករបស់ប្រជាជាតិទាំងអស់;
អស់ទាំងចុងបំផុតនៃផែនដីនឹងឃើញសេចក្ដីសង្គ្រោះរបស់ព្រះនៃពួកយើង។
11ចាកចេញទៅ! ចាកចេញទៅ!
ចូរចេញពីទីនោះទៅ
កុំពាល់របស់សៅហ្មងឡើយ!
អ្នកដែលលើកសែងភាជនៈរបស់ព្រះយេហូវ៉ាអើយ
ចូរចេញពីកណ្ដាលបាប៊ីឡូនទៅ
ចូរជម្រះខ្លួនចុះ!
12យ៉ាងណាមិញ អ្នករាល់គ្នានឹងមិនចេញទៅដោយរួសរាន់ទេ
ក៏មិនទៅដោយរត់គេចដែរ
ដ្បិតព្រះយេហូវ៉ានឹងយាងទៅខាងមុខអ្នករាល់គ្នា
ព្រះនៃអ៊ីស្រាអែលនឹងការពារខាងក្រោយអ្នករាល់គ្នា។
អ្នកបម្រើដែលរងការឈឺចាប់ ត្រូវបានលើកឡើង
13មើល៍! អ្នកបម្រើរបស់យើងនឹងប្រព្រឹត្តដោយប្រាជ្ញា
លោកនឹងឡើងខ្ពស់ ហើយត្រូវបានតម្កើងឡើង
ព្រមទាំងត្រូវបានលើកឲ្យខ្ពស់យ៉ាងក្រៃលែង។
14ដូចដែលមនុស្សជាច្រើនបានស្រឡាំងកាំងនឹងអ្នកយ៉ាងណា
——ដ្បិតភិនភាគរបស់លោកខូចទ្រង់ទ្រាយជាងមនុស្សធម្មតា
រូបរាងរបស់លោកក៏ខូចទ្រង់ទ្រាយជាងមនុស្សជាតិ——
15លោកក៏នឹងប្រោះលើប្រជាជាតិជាច្រើនយ៉ាងនោះដែរ;
បណ្ដាស្ដេចនឹងបិទមាត់របស់ខ្លួនដោយព្រោះលោក
ដ្បិតអ្វីដែលមិនបានរៀបរាប់ប្រាប់ដល់ពួកគេ ពួកគេនឹងឃើញ
ហើយអ្វីដែលពួកគេមិនដែលឮ ពួកគេនឹងយល់ច្បាស់៕
Currently Selected:
អេសាយ 52: GKHB
Highlight
Copy
Compare
Share
Want to have your highlights saved across all your devices? Sign up or sign in
GLOBAL KHMER BIBLE©
Copyright © 2023 by Global Bible Initiative
