អេសាយ 50
50
1ព្រះយេហូវ៉ាមានបន្ទូលដូច្នេះថា៖
“លិខិតលែងលះរបស់ម្ដាយអ្នករាល់គ្នាដែលយើងបានបណ្ដេញនាងចេញនោះ តើនៅឯណា?
តើយើងបានលក់អ្នករាល់គ្នាទៅម្ចាស់បំណុលមួយណា?
មើល៍! អ្នករាល់គ្នាត្រូវបានលក់ទៅ
ដោយព្រោះសេចក្ដីទុច្ចរិតរបស់អ្នករាល់គ្នាទេ
ហើយម្ដាយរបស់អ្នករាល់គ្នាត្រូវបានបណ្ដេញចេញ
ក៏ដោយព្រោះការបំពានរបស់អ្នករាល់គ្នាដែរ។
2កាលយើងមកដល់ ម្ដេចក៏គ្មានអ្នកណាសោះ?
កាលយើងហៅ ម្ដេចក៏គ្មានអ្នកណាឆ្លើយ?
តើដៃរបស់យើងបានរួញខ្លី មិនអាចលោះបានឬ?
តើយើងគ្មានអំណាចនឹងរំដោះឲ្យរួចឬ?
មើល៍! យើងធ្វើឲ្យសមុទ្ររីងស្ងួតដោយការស្ដីបន្ទោសរបស់យើង
យើងធ្វើឲ្យទន្លេទៅជាទីរហោស្ថាន
នោះត្រីក៏ធុំក្លិនស្អុយដោយសារគ្មានទឹក ហើយងាប់ដោយស្រេកទឹក។
3យើងស្លៀកពាក់ឲ្យផ្ទៃមេឃដោយភាពខ្មៅងងឹត
ហើយយកក្រណាត់ធ្មៃធ្វើជាគម្របរបស់វា”។
អ្នកបម្រើដែលស្ដាប់បង្គាប់
4ព្រះអម្ចាស់របស់ខ្ញុំ គឺព្រះយេហូវ៉ាបានប្រទានដល់ខ្ញុំនូវអណ្ដាតរបស់អ្នកដែលទទួលការបង្រៀន
ដើម្បីឲ្យខ្ញុំចេះជួយមនុស្សល្វើយ ដោយពាក្យសម្ដី។
ព្រះអង្គដាស់ខ្ញុំឡើង ពីមួយព្រឹកទៅមួយព្រឹក
គឺព្រះអង្គដាស់ត្រចៀករបស់ខ្ញុំ
ដើម្បីឲ្យស្ដាប់ ដូចជាអ្នកដែលទទួលការបង្រៀន។
5ព្រះអម្ចាស់របស់ខ្ញុំ គឺព្រះយេហូវ៉ាបានបើកត្រចៀករបស់ខ្ញុំ
ហើយខ្ញុំមិនបានបះបោរឡើយ ក៏មិនបានបកក្រោយដែរ។
6ខ្ញុំបានប្រគល់ខ្នងខ្ញុំទៅឲ្យពួកអ្នកដែលវាយ
ក៏បានប្រគល់ថ្ពាល់ខ្ញុំទៅឲ្យពួកអ្នកដែលបោចពុកចង្កា;
ខ្ញុំមិនបានគេចមុខពីភាពអាប់យស និងការស្ដោះទឹកមាត់ឡើយ។
7ដ្បិតព្រះអម្ចាស់របស់ខ្ញុំ គឺព្រះយេហូវ៉ានឹងជួយខ្ញុំ
ដោយហេតុនេះខ្ញុំមិនអៀនខ្មាស
ដោយហេតុនេះខ្ញុំបានធ្វើមុខដូចជាថ្មដែកកេះ
ខ្ញុំដឹងថា ខ្ញុំមិនអាម៉ាស់មុខឡើយ។
8ព្រះអង្គដែលបញ្ជាក់ថាខ្ញុំឥតទោស ព្រះអង្គគង់នៅជិត;
តើនរណាអាចតតាំងនឹងខ្ញុំបាន?
ចូរឲ្យពួកយើងឈរឡើងជាមួយគ្នា!
តើនរណាជាអ្នកចោទប្រកាន់ខ្ញុំ?
ចូរឲ្យអ្នកនោះចូលមកជិតខ្ញុំ!
9មើល៍! ព្រះអម្ចាស់របស់ខ្ញុំ គឺព្រះយេហូវ៉ានឹងជួយខ្ញុំ
តើនរណាអាចផ្ដន្ទាទោសខ្ញុំបាន?
មើល៍! ពួកគេទាំងអស់គ្នានឹងពុកផុយដូចសម្លៀកបំពាក់
ហើយសត្វល្អិតនឹងស៊ីបំផ្លាញពួកគេ។
10ក្នុងចំណោមអ្នករាល់គ្នា មានអ្នកណាដែលកោតខ្លាចព្រះយេហូវ៉ា
ហើយស្ដាប់តាមសំឡេងរបស់បាវបម្រើព្រះអង្គ?
ចូរឲ្យអ្នកដែលដើរក្នុងភាពងងឹត ហើយគ្មានពន្លឺ ទុកចិត្តលើព្រះនាមរបស់ព្រះយេហូវ៉ា
ហើយពឹងផ្អែកលើព្រះរបស់ខ្លួនចុះ!
11មើល៍! អ្នកទាំងអស់គ្នាដែលបង្កាត់ភ្លើង
ជាអ្នកដែលក្រវាត់ខ្លួនដោយកន្ទុយអុសអើយ
ចូរដើរក្នុងពន្លឺភ្លើងរបស់អ្នករាល់គ្នា
និងក្នុងកន្ទុយអុសដែលអ្នករាល់គ្នាបានបញ្ឆេះនោះចុះ!
ការនេះនឹងបានដល់អ្នករាល់គ្នា ពីដៃរបស់យើង
គឺអ្នករាល់គ្នានឹងដេកក្នុងទុក្ខវេទនា៕
Currently Selected:
អេសាយ 50: GKHB
Highlight
Copy
Compare
Share
Want to have your highlights saved across all your devices? Sign up or sign in
GLOBAL KHMER BIBLE©
Copyright © 2023 by Global Bible Initiative
