អេសាយ 49
49
អ៊ីស្រាអែលអ្នកបម្រើរបស់ព្រះយេហូវ៉ា
1កោះទាំងឡាយអើយ ចូរស្ដាប់ខ្ញុំចុះ!
ជាតិសាសន៍នានាដែលនៅឆ្ងាយអើយ ចូរប្រុងស្ដាប់ចុះ!
ព្រះយេហូវ៉ាបានត្រាស់ហៅខ្ញុំតាំងពីផ្ទៃម្ដាយ
ព្រះអង្គបានលើកឡើងនូវឈ្មោះខ្ញុំ#49:1 ព្រះអង្គបានលើកឡើងនូវឈ្មោះខ្ញុំ―ឬ “ព្រះអង្គបានដាក់ឈ្មោះខ្ញុំ”។តាំងពីក្នុងពោះម្ដាយខ្ញុំ។
2ព្រះអង្គបានធ្វើឲ្យមាត់របស់ខ្ញុំដូចជាដាវដ៏មុត
ក៏បានលាក់ខ្ញុំនៅក្រោមម្លប់នៃព្រះហស្តរបស់ព្រះអង្គ
ហើយបានធ្វើឲ្យខ្ញុំទៅជាព្រួញដែលត្រូវបានសម្រួច
ព្រមទាំងលាក់ខ្ញុំនៅក្នុងបំពង់ព្រួញរបស់ព្រះអង្គ។
3ព្រះអង្គមានបន្ទូលនឹងខ្ញុំថា៖ “អ្នកជាអ្នកបម្រើរបស់យើង
គឺអ៊ីស្រាអែលដែលយើងនឹងត្រូវបានលើកតម្កើងសិរីរុងរឿងតាមរយៈអ្នក”។
4ប៉ុន្តែខ្ញុំបានពោលថា៖ “ខ្ញុំបាននឿយហត់ជាឥតប្រយោជន៍
ខ្ញុំបានបង់កម្លាំងរបស់ខ្ញុំជាឥតបានការ និងឥតប្រយោជន៍;
យ៉ាងណាក៏ដោយ សេចក្ដីយុត្តិធម៌របស់ខ្ញុំនៅជាមួយព្រះយេហូវ៉ា
ហើយរង្វាន់របស់ខ្ញុំក៏នៅជាមួយព្រះរបស់ខ្ញុំដែរ”។
5ឥឡូវនេះ ព្រះយេហូវ៉ាជាអ្នកដែលសូនខ្ញុំតាំងពីផ្ទៃម្ដាយឲ្យបានជាបាវបម្រើរបស់ព្រះអង្គ
ដើម្បីនាំយ៉ាកុបមករកព្រះអង្គវិញ
និងដើម្បីឲ្យអ៊ីស្រាអែលត្រូវបានប្រមូលមកឯព្រះអង្គ
ព្រះអង្គមានបន្ទូល
——ដ្បិតខ្ញុំត្រូវបានលើកតម្កើងនៅចំពោះព្រះនេត្ររបស់ព្រះយេហូវ៉ា
ហើយព្រះរបស់ខ្ញុំបានជាកម្លាំងរបស់ខ្ញុំ——
6គឺព្រះអង្គមានបន្ទូលថា៖
“ជារឿងតូចតាចទេ ដែលអ្នកធ្វើជាបាវបម្រើរបស់យើង
ដើម្បីស្ដារបណ្ដាកុលសម្ព័ន្ធរបស់យ៉ាកុបឡើងវិញ
ហើយធ្វើឲ្យពួកអ្នកដែលត្រូវបានរក្សាទុកនៃអ៊ីស្រាអែលត្រឡប់មកវិញ!
យើងនឹងធ្វើឲ្យអ្នកទៅជាពន្លឺដល់សាសន៍ដទៃទៀតផង
ដើម្បីឲ្យសេចក្ដីសង្គ្រោះរបស់យើងបានទៅដល់ចុងបំផុតនៃផែនដី”។
7ព្រះយេហូវ៉ា ជាព្រះប្រោសលោះនៃអ៊ីស្រាអែល
ជាអង្គដ៏វិសុទ្ធរបស់ពួកគេ
បានមានបន្ទូលដូច្នេះនឹងអ្នកដែលត្រូវបានមើលងាយ
ដែលត្រូវប្រជាជនស្អប់ខ្ពើម
ដែលជាបាវបម្រើរបស់ពួកមេគ្រប់គ្រងថា៖
“បណ្ដាស្ដេចនឹងឃើញ ហើយក្រោកឡើង
ពួកមេដឹកនាំនឹងក្រាបចុះដោយព្រោះព្រះយេហូវ៉ាដែលជាព្រះដ៏ស្មោះត្រង់
ជាអង្គដ៏វិសុទ្ធនៃអ៊ីស្រាអែល
ហើយព្រះអង្គបានជ្រើសរើសអ្នក”។
8ព្រះយេហូវ៉ាមានបន្ទូលដូច្នេះថា៖
“ក្នុងវេលានៃការសន្ដោស យើងបានឆ្លើយនឹងអ្នក;
ក្នុងថ្ងៃនៃសេចក្ដីសង្គ្រោះ យើងបានជួយអ្នក។
យើងនឹងរក្សាអ្នក ហើយតាំងអ្នកឡើងទុកជាសម្ពន្ធមេត្រីដល់បណ្ដាជន
ដើម្បីស្ដារទឹកដីនេះឡើងវិញ
ដើម្បីកាន់កាប់មរតកដែលជាទីស្ងាត់ជ្រងំ
9ទាំងនិយាយនឹងពួកអ្នកដែលជាប់គុកថា: ‘ចូរចេញមក!’
ក៏និយាយនឹងអ្នកដែលនៅក្នុងសេចក្ដីងងឹតថា: ‘ចូរលេចមក!’។
ពួកគេនឹងស៊ីស្មៅនៅតាមផ្លូវ
ហើយវាលស្មៅរបស់ពួកគេនឹងនៅលើអស់ទាំងទីទួលត្រងិល។
10ពួកគេនឹងមិនឃ្លាន ក៏មិនស្រេកដែរ
រីឯកម្ដៅ និងព្រះអាទិត្យនឹងមិនធ្វើទុក្ខពួកគេឡើយ
ដ្បិតព្រះដែលអាណិតមេត្តាពួកគេ នឹងដឹកនាំពួកគេ
ព្រះអង្គនឹងនាំផ្លូវពួកគេដល់ប្រភពទឹក។
11យើងនឹងធ្វើឲ្យអស់ទាំងភ្នំរបស់យើងទៅជាផ្លូវ
ហើយមហាវិថីរបស់យើងនឹងត្រូវបានលើកឡើង។
12មើល៍! អ្នកទាំងនេះនឹងមកពីទីឆ្ងាយ;
មើល៍! អ្នកទាំងនេះនឹងមកពីទិសខាងជើង និងពីទិសខាងលិច
ហើយអ្នកទាំងនេះក៏នឹងមកពីដែនដីស៊ីនីម#49:12 ស៊ីនីម―ជាភាសាហេព្រើរ មានន័យថា “ចិន”។ដែរ”។
13ផ្ទៃមេឃអើយ ចូរច្រៀងដោយអំណរ!
ផែនដីអើយ ចូរត្រេកអរ!
ភ្នំទាំងឡាយអើយ ចូរហ៊ោកញ្ជ្រៀវជាសម្រែកហ៊ោសប្បាយ!
ដ្បិតព្រះយេហូវ៉ាបានកម្សាន្តចិត្តប្រជារាស្ត្ររបស់ព្រះអង្គ
ហើយអាណិតមេត្តាមនុស្សរងទុក្ខរបស់ព្រះអង្គ។
ស៊ីយ៉ូនត្រូវបាននឹកចាំ
14ប៉ុន្តែស៊ីយ៉ូនពោលថា៖ “ព្រះយេហូវ៉ាបានបោះបង់ខ្ញុំចោល
ព្រះអម្ចាស់របស់ខ្ញុំបានភ្លេចខ្ញុំហើយ!”។
15“តើមនុស្សស្រីអាចភ្លេចកូនដែលនៅបៅរបស់នាង
ឥតអាណិតអាសូរកូនដែលកើតពីផ្ទៃខ្លួនឬ?
ទោះបីជាពួកនាងភ្លេចក៏ដោយ ក៏យើងមិនភ្លេចអ្នកឡើយ។
16មើល៍! យើងបានចារឹកអ្នកនៅបាតដៃរបស់យើងហើយ
កំពែងរបស់អ្នកនៅចំពោះយើងជានិច្ច។
17ពួកអ្នកសាងសង់#49:17 អ្នកសាងសង់―ឯកសារបុរាណខ្លះថា “កូនចៅ”។របស់អ្នកនឹងប្រញាប់មក#49:17 មក―ជាពាក្យជំនួយ។
ពួកដែលបំផ្លាញអ្នក និងពួកដែលកម្ទេចអ្នក នឹងចាកចេញពីអ្នកទៅ។
18ចូរងើបភ្នែកឡើងមើលជុំវិញចុះ!
ពួកគេទាំងអស់ប្រមូលគ្នាមករកអ្នក”។
នេះជាសេចក្ដីប្រកាសរបស់ព្រះយេហូវ៉ា៖
“ដោយនូវជីវិតយើង អ្នកនឹងបានប្រដាប់ដោយពួកគេទាំងអស់គ្នាជាប្រាកដ ដូចជាគ្រឿងអលង្ការ
ហើយតុបតែងខ្លួនដោយអ្នកទាំងនោះ ដូចជាកូនក្រមុំ។
19ដ្បិតទីបាក់បែក និងទីស្ងាត់ជ្រងំ ព្រមទាំងទឹកដីខូចបង់របស់អ្នក
ឥឡូវនេះពិតជាចង្អៀតណាស់សម្រាប់រស់នៅ
ហើយពួកអ្នកដែលលេបអ្នកនឹងនៅឆ្ងាយពីអ្នក។
20ពួកកូនចៅដែលកើតដល់អ្នក#49:20 ដែលកើតដល់អ្នក―ជាពាក្យជំនួយ។ក្នុងពេលដែលអ្នកបាត់បង់កូន
នឹងនិយាយដាក់ត្រចៀករបស់អ្នកទៀតថា:
‘កន្លែងនេះចង្អៀតពេកហើយសម្រាប់ពួកយើង
សូមរកទីអាស្រ័យឲ្យពួកយើងរស់នៅផង!’។
21ពេលនោះ អ្នកនឹងនិយាយក្នុងចិត្តថា:
‘តើនរណាបានបង្កើតកូនទាំងនេះឲ្យខ្ញុំ?
ដ្បិតខ្ញុំបានព្រាត់កូន ហើយអារ
ក៏ត្រូវបានជម្លៀស ព្រមទាំងត្រូវបានដេញចេញផង
ដូច្នេះតើនរណាបានចិញ្ចឹមកូនទាំងនេះ?
មើល៍! ខ្ញុំត្រូវបានចោលនៅតែម្នាក់ឯង
ចុះកូនទាំងនេះមកពីណា?’”។
22ព្រះអម្ចាស់របស់ខ្ញុំ គឺព្រះយេហូវ៉ាមានបន្ទូលដូច្នេះថា៖
“មើល៍! យើងនឹងលើកដៃទៅប្រជាជាតិនានា
ក៏នឹងលើកទង់សញ្ញារបស់យើងឡើងដល់ជាតិសាសន៍ទាំងឡាយ
នោះពួកគេនឹងនាំពួកកូនប្រុសរបស់អ្នកមកដោយនៅនឹងដើមទ្រូង
ហើយលីពួកកូនស្រីរបស់អ្នកនៅលើស្មា។
23ស្ដេចនឹងធ្វើជាឪពុកចិញ្ចឹមរបស់អ្នក
ហើយមហេសីនឹងធ្វើជាមេដោះរបស់អ្នក;
ពួកគេនឹងក្រាបមុខដល់ដីនៅចំពោះអ្នក
ហើយលិទ្ធធូលីនៅជើងរបស់អ្នក។
ពេលនោះ អ្នកនឹងដឹងថា យើងជាយេហូវ៉ា។
អ្នកដែលទន្ទឹងរង់ចាំយើងនឹងមិនអាម៉ាស់មុខឡើយ”។
24តើអាចយករំពាពីមនុស្សខ្លាំងពូកែវិញបានឬ?
តើអាចរំដោះឈ្លើយសឹកពីមនុស្សកាចសាហាវ#49:24 មនុស្សកាចសាហាវ―ឯកសារបុរាណខ្លះថា “មនុស្សសុចរិត”។បានឬ?
25យ៉ាងណាមិញ ព្រះយេហូវ៉ាមានបន្ទូលដូច្នេះថា៖
“ទោះបីជាឈ្លើយសឹករបស់មនុស្សខ្លាំងពូកែក៏ដោយ ក៏នឹងត្រូវបានយកចេញដែរ
ហើយរំពារបស់មនុស្សកាចសាហាវក៏នឹងត្រូវបានរំដោះផង
ពីព្រោះយើងនឹងតតាំងនឹងអ្នកដែលតតាំងនឹងអ្នក
យើងនឹងសង្គ្រោះកូនចៅរបស់អ្នក។
26យើងនឹងធ្វើឲ្យពួកអ្នកដែលសង្កត់សង្កិនអ្នក ស៊ីសាច់របស់ខ្លួនពួកគេ
ហើយពួកគេនឹងស្រវឹងដោយឈាមរបស់ខ្លួន
ដូចជាស្រវឹងដោយស្រាទំពាំងបាយជូរថ្មី។
ពេលនោះ គ្រប់ទាំងសាច់នឹងដឹងថា យើងជាយេហូវ៉ា
ជាព្រះសង្គ្រោះរបស់អ្នក
ជាព្រះប្រោសលោះរបស់អ្នក
ជាព្រះដ៏មានព្រះចេស្ដារបស់យ៉ាកុប”៕
Currently Selected:
អេសាយ 49: GKHB
Highlight
Copy
Compare
Share
Want to have your highlights saved across all your devices? Sign up or sign in
GLOBAL KHMER BIBLE©
Copyright © 2023 by Global Bible Initiative
