អេសាយ 42
42
អ្នកបម្រើរបស់ព្រះយេហូវ៉ា
1“មើល៍! អ្នកបម្រើរបស់យើងដែលយើងទ្រទ្រង់
អ្នកដែលត្រូវបានជ្រើសរើសរបស់យើង ដែលយើងពេញចិត្ត។
យើងបានដាក់វិញ្ញាណរបស់យើងលើគាត់
ហើយគាត់នឹងនាំមកនូវសេចក្ដីយុត្តិធម៌ដល់ប្រជាជាតិនានា។
2គាត់មិនស្រែកគំហក ឬបន្លឺសំឡេងឡើយ
ហើយក៏គ្មានអ្នកណានឹងឮសំឡេងរបស់គាត់នៅតាមផ្លូវដែរ។
3គាត់នឹងមិនកាច់ដើមត្រែងដែលទក់ទេ
ហើយក៏មិនពន្លត់ប្រឆេះដែលជិតរលត់ដែរ;
គាត់នឹងនាំសេចក្ដីយុត្តិធម៌មកដោយសេចក្ដីពិតត្រង់។
4គាត់មិនចុះខ្សោយ ឬធ្លាក់ទឹកចិត្តឡើយ
រហូតទាល់តែបានស្ថាបនាសេចក្ដីយុត្តិធម៌ឡើងនៅលើផែនដី
ហើយកោះទាំងឡាយនឹងរំពឹងលើក្រឹត្យវិន័យរបស់គាត់”។
5ព្រះយេហូវ៉ាដ៏ជាព្រះដែលនិម្មិតបង្កើតផ្ទៃមេឃ ហើយសន្ធឹងវា
ជាព្រះដែលលាតផែនដី និងអ្វីដែលចេញមកពីទីនោះ
ជាព្រះដែលប្រទានខ្យល់ដង្ហើមដល់បណ្ដាជននៅលើផែនដី
ហើយប្រទានវិញ្ញាណដល់អ្នកដែលដើរនៅទីនោះ
គឺព្រះអង្គមានបន្ទូលដូច្នេះថា៖
6“គឺយើងជាយេហូវ៉ា បានហៅអ្នកក្នុងសេចក្ដីសុចរិត
យើងនឹងកាន់ដៃអ្នក ហើយរក្សាអ្នក។
យើងនឹងតាំងអ្នកឡើងទុកជាសម្ពន្ធមេត្រីដល់ប្រជាជន
និងជាពន្លឺដល់ប្រជាជាតិនានា
7ដើម្បីបើកភ្នែកមនុស្សខ្វាក់
ដើម្បីនាំអ្នកទោសចេញពីគុក
និងនាំពួកអ្នកដែលអង្គុយក្នុងសេចក្ដីងងឹតចេញពីទីឃុំឃាំង។
8គឺយើងហើយ ជាយេហូវ៉ា នេះជានាមរបស់យើង។
យើងមិនប្រគល់សិរីរុងរឿងរបស់យើងដល់អ្នកដទៃ
ក៏មិនប្រគល់សេចក្ដីសរសើរតម្កើងរបស់យើងដល់រូបឆ្លាក់ឡើយ។
9មើល៍! ការពីមុនបានសម្រេចហើយ
ហើយយើងនឹងប្រកាសការថ្មី។
យើងនឹងតំណាលឲ្យអ្នករាល់គ្នាស្ដាប់ មុនការទាំងនោះលេចឡើង”។
ចម្រៀងសរសើរតម្កើង
10ពួកអ្នកដែលចុះទៅសមុទ្រ និងរបស់សព្វសារពើដែលនៅទីនោះ
ព្រមទាំងកោះ និងពួកអ្នករស់នៅទីនោះអើយ
ចូរច្រៀងចម្រៀងថ្មីទៅកាន់ព្រះយេហូវ៉ា
ចូរច្រៀងចម្រៀងសរសើរតម្កើងដល់ព្រះអង្គពីចុងបំផុតនៃផែនដី!
11ចូរឲ្យទីរហោស្ថាន និងទីក្រុងទាំងឡាយក្នុងនោះ
គឺភូមិនានាដែលជនជាតិកេដាររស់នៅ បន្លឺសំឡេងឡើង!
ចូរឲ្យអ្នកដែលរស់នៅសិឡាច្រៀងដោយអំណរ
ចូរឲ្យពួកគេស្រែកពីកំពូលភ្នំចុះ!
12ចូរឲ្យពួកគេថ្វាយសិរីរុងរឿងដល់ព្រះយេហូវ៉ា
ហើយប្រកាសសេចក្ដីសរសើរតម្កើងនៃព្រះអង្គនៅតាមកោះនានា!
13ព្រះយេហូវ៉ានឹងយាងចេញទៅ ដូចមនុស្សខ្លាំងពូកែ
ព្រះអង្គនឹងបណ្ដាលព្រះហឫទ័យឆេះឆួលឡើង ដូចអ្នកចម្បាំង;
ព្រះអង្គនឹងស្រែកឡើង
មែនហើយ ព្រះអង្គនឹងស្រែកយ៉ាងខ្លាំង
ហើយមានជ័យជម្នះលើពួកខ្មាំងសត្រូវរបស់ព្រះអង្គ។
14“យើងបាននៅស្ងៀមជាយូរមកហើយ
យើងបានរក្សាភាពស្ងៀមស្ងាត់ ហើយទប់ចិត្ត។
ប៉ុន្តែឥឡូវនេះ យើងនឹងស្រែកឡើងដូចស្ត្រីសម្រាលកូន
យើងនឹងដង្ហក់ ហើយត្រដរខ្យល់ផង។
15យើងនឹងធ្វើឲ្យភ្នំ និងទីទួលទៅជាស្ងាត់ជ្រងំ
ហើយធ្វើឲ្យអស់ទាំងរុក្ខជាតិនៅទីនោះក្រៀមស្វិតទៅ;
យើងនឹងធ្វើឲ្យទន្លេទាំងឡាយទៅជាកោះ
ហើយធ្វើឲ្យស្រះនានារីងស្ងួតដែរ។
16យើងនឹងនាំមនុស្សខ្វាក់ភ្នែកតាមផ្លូវមួយដែលពួកគេមិនស្គាល់
យើងនឹងដឹកនាំពួកគេតាមគន្លងដែលពួកគេមិនស្គាល់។
យើងនឹងធ្វើឲ្យសេចក្ដីងងឹតទៅជាពន្លឺនៅចំពោះពួកគេ
ហើយធ្វើឲ្យទីរដិបរដុបទៅជារាបស្មើវិញ។
គឺការទាំងនេះហើយ ដែលយើងនឹងធ្វើ
យើងនឹងមិនបោះបង់ចោលពួកគេឡើយ។
17រីឯពួកអ្នកដែលទុកចិត្តលើរូបឆ្លាក់
ហើយនិយាយទៅកាន់រូបសិតថា: ‘ពួកព្រះអង្គជាព្រះនៃយើងខ្ញុំ’
អ្នកទាំងនោះនឹងថយទៅវិញ
ហើយអាម៉ាស់មុខយ៉ាងខ្លាំង”។
អ៊ីស្រាអែលខ្វាក់ និងថ្លង់
18“មនុស្សថ្លង់អើយ ចូរស្ដាប់ចុះ!
មនុស្សខ្វាក់ភ្នែកអើយ ចូរប្រឹងមើល ដើម្បីឲ្យបានឃើញចុះ!
19តើនរណាខ្វាក់ភ្នែក ក្រៅពីអ្នកបម្រើរបស់យើង?
តើនរណាថ្លង់ដូចអ្នកនាំសារដែលយើងបានចាត់?
តើនរណាខ្វាក់ភ្នែកដូចអ្នកដែលមានមេត្រីនឹងយើង#42:19 នឹងយើង―ជាពាក្យជំនួយ។
ឬខ្វាក់ភ្នែកដូចបាវបម្រើរបស់ព្រះយេហូវ៉ា?
20អ្នកបានឃើញការជាច្រើន ប៉ុន្តែមិនយកចិត្តទុកដាក់ទេ
ត្រចៀកនៅចំហ ប៉ុន្តែស្ដាប់មិនឮសោះ”។
21ព្រះយេហូវ៉ាបានសព្វព្រះហឫទ័យនឹងលើកស្ទួយក្រឹត្យវិន័យ
ព្រមទាំងលើកតម្កើងសិរីរុងរឿង
ដោយយល់ដល់សេចក្ដីសុចរិតយុត្តិធម៌របស់ព្រះអង្គ។
22ប៉ុន្តែនេះជាប្រជាជនដែលត្រូវគេប្លន់ និងរឹបជាន់យក;
ពួកគេទាំងអស់គ្នាជាប់អន្ទាក់នៅក្នុងរូង
ហើយត្រូវបានលាក់ទុកក្នុងទីឃុំឃាំង;
ពួកគេបានទៅជារំពា គ្មានអ្នកណារំដោះឲ្យរួចឡើយ
ក៏បានទៅជាជ័យភណ្ឌដែលគ្មានអ្នកណាថា៖ “ចូរប្រគល់ទៅវិញ” នោះឡើយ។
23តើនរណាក្នុងចំណោមអ្នករាល់គ្នានឹងផ្ទៀងត្រចៀកនឹងសេចក្ដីនេះ
ក៏នឹងយកចិត្តទុកដាក់ ហើយស្ដាប់សម្រាប់ថ្ងៃខាងមុខ?
24តើនរណាបានប្រគល់យ៉ាកុបឲ្យទៅជាជ័យភណ្ឌ
ហើយប្រគល់អ៊ីស្រាអែលទៅពួកអ្នករឹបជាន់?
តើមិនមែនព្រះយេហូវ៉ាទេឬ
ដែលយើងរាល់គ្នាបានប្រព្រឹត្តបាបទាស់នឹងព្រះអង្គ
ក៏មិនព្រមដើរតាមមាគ៌ារបស់ព្រះអង្គ
ហើយមិនស្ដាប់តាមក្រឹត្យវិន័យរបស់ព្រះអង្គ?
25ដូច្នេះ ព្រះអង្គបានចាក់ភ្លើងនៃព្រះពិរោធរបស់ព្រះអង្គ
និងសង្គ្រាមដ៏កាចសាហាវ ទៅលើអ៊ីស្រាអែល;
ភ្លើងនោះបានបញ្ឆេះពួកគេនៅជុំវិញ ប៉ុន្តែពួកគេមិនយល់
ភ្លើងនោះបានដុតពួកគេ ប៉ុន្តែពួកគេមិនយកចិត្តទុកដាក់ឡើយ៕
Currently Selected:
អេសាយ 42: GKHB
Highlight
Copy
Compare
Share
Want to have your highlights saved across all your devices? Sign up or sign in
GLOBAL KHMER BIBLE©
Copyright © 2023 by Global Bible Initiative
