អេសាយ 43
43
ព្រះទ្រង់ប្រោសលោះអ៊ីស្រាអែល
1យ៉ាកុបអើយ ព្រះយេហូវ៉ាជាព្រះអង្គដែលនិម្មិតបង្កើតអ្នក
អ៊ីស្រាអែលអើយ ព្រះអង្គដែលសូនអ្នក
ឥឡូវនេះព្រះអង្គមានបន្ទូលដូច្នេះថា៖
“កុំខ្លាចឡើយ ដ្បិតយើងបានលោះអ្នកហើយ;
យើងបានហៅអ្នកចំឈ្មោះ;
អ្នកជារបស់យើងហើយ!
2នៅពេលអ្នកឆ្លងកាត់ទឹក យើងនៅជាមួយអ្នក;
នៅពេលអ្នកឆ្លងកាត់ទន្លេ វានឹងមិនជន់លិចអ្នក;
នៅពេលអ្នកដើរកាត់ភ្លើង អ្នកនឹងមិនរលាក
ហើយអណ្ដាតភ្លើងក៏មិនឆេះអ្នកដែរ។
3ដ្បិតយើងជាយេហូវ៉ា ព្រះរបស់អ្នក
យើងជាអង្គដ៏វិសុទ្ធនៃអ៊ីស្រាអែល គឺជាព្រះសង្គ្រោះរបស់អ្នក។
យើងប្រគល់អេហ្ស៊ីបជាថ្លៃលោះរបស់អ្នក
ព្រមទាំងប្រគល់អេត្យូពី និងសាបាជំនួសអ្នកផង។
4ដោយព្រោះអ្នកមានតម្លៃ និងមានកិត្តិយសក្នុងភ្នែករបស់យើង
ហើយយើងស្រឡាញ់អ្នក
ដូច្នេះយើងនឹងប្រគល់មនុស្សដទៃជំនួសអ្នក
ក៏នឹងប្រគល់ជាតិសាសន៍នានាជំនួសជីវិតរបស់អ្នកដែរ។
5កុំខ្លាចឡើយ ដ្បិតយើងនៅជាមួយអ្នក។
យើងនឹងនាំពូជពង្សរបស់អ្នកមកពីទិសខាងកើត
ហើយប្រមូលអ្នកមកពីទិសខាងលិច។
6យើងនឹងបង្គាប់ទិសខាងជើងថា: ‘ចូរប្រគល់មក៍!’
ក៏បង្គាប់ទិសខាងត្បូងថា: ‘កុំឃាត់ទុកឡើយ!’។
ចូរនាំពួកកូនប្រុសរបស់យើងមកពីទីឆ្ងាយ
ចូរនាំពួកកូនស្រីរបស់យើងមកពីចុងបំផុតនៃផែនដី
7គឺអស់អ្នកដែលត្រូវបានហៅតាមនាមរបស់យើង
និងអ្នកដែលយើងបាននិម្មិតបង្កើតសម្រាប់សិរីរុងរឿងរបស់យើង
ជាអ្នកដែលយើងបានសូន ក៏បានបង្កើតពួកគេឡើង”។
8ចូរនាំប្រជាជនដែលខ្វាក់ ប៉ុន្តែមានភ្នែក
ក៏ថ្លង់ ប៉ុន្តែមានត្រចៀក ចេញមក!
9ចូរឲ្យអស់ទាំងប្រជាជាតិជួបជុំគ្នា
ចូរឲ្យជាតិសាសន៍នានាប្រមូលគ្នាចុះ!
តើនរណាក្នុងចំណោមព្រះទាំងនោះ#43:9 ព្រះទាំងនោះ―ន័យត្រង់គឺ “ពួកគេ”។អាចថ្លែងការនេះ
គឺអាចតំណាលឲ្យយើងស្ដាប់នូវអ្វីដែលកើតឡើងពីមុនបាន?
ចូរនាំសាក្សីរបស់ពួកវាមក ដើម្បីបញ្ជាក់ថាខ្លួនឥតទោស!
ចូរតំណាលឲ្យគេស្ដាប់ ហើយឲ្យគេនិយាយថា៖ “ពិតមែន” ចុះ។
10នេះជាសេចក្ដីប្រកាសរបស់ព្រះយេហូវ៉ា៖
“អ្នករាល់គ្នាជាសាក្សីរបស់យើង និងជាអ្នកបម្រើរបស់យើងដែលយើងបានជ្រើសរើស
ដើម្បីឲ្យអ្នករាល់គ្នាបានស្គាល់ និងជឿលើយើង
ព្រមទាំងដើម្បីឲ្យយល់ច្បាស់ថា គឺយើងហ្នឹងហើយ ជាព្រះអង្គនោះ;
មុនយើង គ្មានព្រះណាត្រូវបានសូនឡើងទេ
ហើយក្រោយយើង ក៏មិនមានដែរ។
11យើង គឺយើងហ្នឹងហើយ ជាយេហូវ៉ា;
គ្មានព្រះសង្គ្រោះណាក្រៅពីយើងឡើយ។
12គឺយើងបានប្រកាស បានសង្គ្រោះ ហើយបានថ្លែងថា
គ្មានព្រះដទៃក្នុងចំណោមអ្នករាល់គ្នាឡើយ។
អ្នករាល់គ្នាជាសាក្សីរបស់យើង!”។
នេះជាសេចក្ដីប្រកាសរបស់ព្រះយេហូវ៉ា៖ “គឺយើងហ្នឹងហើយ ជាព្រះ។
13មែនហើយ តាំងពីមានថ្ងៃ គឺយើងហ្នឹងហើយ ជាព្រះអង្គនោះ
គ្មានអ្នកណាអាចរំដោះឲ្យរួចពីកណ្ដាប់ដៃរបស់យើងបានឡើយ។
ពេលយើងធ្វើ តើនរណាអាចបង្វែរបាន?”។
សេចក្ដីសង្គ្រោះរបស់ព្រះចំពោះការបះបោររបស់អ៊ីស្រាអែល
14ព្រះយេហូវ៉ាជាព្រះប្រោសលោះរបស់អ្នករាល់គ្នា
ជាអង្គដ៏វិសុទ្ធនៃអ៊ីស្រាអែល មានបន្ទូលដូច្នេះថា៖
“ដោយយល់ដល់អ្នករាល់គ្នា យើងនឹងចាត់គេឲ្យទៅបាប៊ីឡូន
ហើយនាំពួកគេទាំងអស់ចុះមកជាជនភៀសខ្លួន
គឺនាំជនជាតិខាល់ដេចុះមកតាមនាវាដែលជាទីអរសប្បាយរបស់ពួកគេ#43:14 ហើយនាំពួកគេទាំងអស់ចុះមកជាជនភៀសខ្លួន គឺនាំជនជាតិខាល់ដេចុះមកតាមនាវាដែលជាទីអរសប្បាយរបស់ពួកគេ―ឬ “ហើយបំបាក់រនុករបស់នាង នោះសម្រែកហ៊ោសប្បាយរបស់ជនជាតិខាល់ដេនឹងក្លាយទៅជាទំនួញវិញ”។។
15យើងជាយេហូវ៉ា
ជាអង្គដ៏វិសុទ្ធរបស់អ្នករាល់គ្នា
ជាអាទិករនៃអ៊ីស្រាអែល
ជាស្ដេចរបស់អ្នករាល់គ្នា”។
16ព្រះយេហូវ៉ាដែលធ្វើឲ្យមានផ្លូវក្នុងសមុទ្រ
ដែលធ្វើឲ្យមានគន្លងក្នុងទឹកដ៏ច្រើន
17ដែលនាំរទេះចម្បាំង និងសេះចេញមក
ព្រមទាំងកងទ័ព និងមនុស្សខ្លាំងពូកែ
(ពួកគេនឹងដេកទាំងអស់គ្នា មិនក្រោកឡើងទៀតឡើយ;
ពួកគេនឹងសាបសូន្យទៅ ហើយរលត់ដូចជាប្រឆេះ)
គឺព្រះអង្គមានបន្ទូលដូច្នេះថា៖
18“កុំនឹកចាំអំពីការពីមុនឡើយ
ក៏កុំរិះគិតអំពីការពីបុរាណដែរ។
19មើល៍! យើងនឹងធ្វើការថ្មីមួយ;
ឥឡូវនេះ វានឹងលេចឡើង!
តើអ្នករាល់គ្នាមិនស្គាល់វាទេឬ?
យើងនឹងធ្វើឲ្យមានផ្លូវមួយនៅទីរហោស្ថាន
យើងនឹងធ្វើឲ្យមានទន្លេនៅវាលខ្សាច់។
20សត្វព្រៃនៃទីវាលនឹងលើកតម្កើងសិរីរុងរឿងដល់យើង
គឺទាំងឆ្កែព្រៃ និងអូទ្រីស
ពីព្រោះយើងបានផ្ដល់ទឹកនៅទីរហោស្ថាន
ក៏បានផ្ដល់ទន្លេនៅវាលខ្សាច់
ដើម្បីឲ្យប្រជារាស្ត្ររបស់យើងជាអ្នកដែលត្រូវបានជ្រើសរើសរបស់យើង បានផឹកផង
21ជាប្រជារាស្ត្រដែលយើងបានសូនសម្រាប់ខ្លួនយើង
ដើម្បីឲ្យពួកគេថ្លែងសេចក្ដីសរសើរតម្កើងដល់យើង។
22យ៉ាងណាមិញ យ៉ាកុបអើយ អ្នកមិនបានស្រែកហៅយើងទេ
ផ្ទុយទៅវិញ អ៊ីស្រាអែលអើយ អ្នកបាននឿយណាយនឹងយើង!
23អ្នកមិនបាននាំចៀមនៃតង្វាយដុតរបស់អ្នកមកថ្វាយយើងទេ
ក៏មិនបានលើកតម្កើងសិរីរុងរឿងដល់យើងដោយយញ្ញបូជារបស់អ្នកដែរ!
យើងមិនបានដាក់បន្ទុកលើអ្នកដោយតង្វាយធញ្ញជាតិទេ
ក៏មិនបានធ្វើឲ្យអ្នកនឿយហត់ដោយកំញានដែរ។
24អ្នកមិនបានទិញកំពានដោយប្រាក់ថ្វាយយើងទេ
ក៏មិនបានចម្អែតយើងដោយខ្លាញ់នៃយញ្ញបូជារបស់អ្នកដែរ
ផ្ទុយទៅវិញ អ្នកបានដាក់បន្ទុកលើយើងដោយបាបរបស់អ្នក
ទាំងធ្វើឲ្យយើងនឿយហត់ដោយអំពើទុច្ចរិតរបស់អ្នក។
25យើង គឺយើងហ្នឹងហើយ ជាព្រះអង្គនោះ
ដែលលុបការបំពានរបស់អ្នកចេញដោយយល់ដល់ខ្លួនយើង
ហើយយើងនឹងមិននឹកចាំបាបរបស់អ្នកទៀតឡើយ។
26ចូររំលឹកយើងចុះ ចូរឲ្យយើងតវ៉ាក្ដីជាមួយគ្នា!
ចូររៀបរាប់រឿងក្ដីរបស់អ្នកមក៍
ដើម្បីឲ្យអ្នកត្រូវបានបញ្ជាក់ថាឥតទោស។
27ឪពុកដើមរបស់អ្នកបានប្រព្រឹត្តបាប
ពួកអ្នកកណ្ដាលរបស់អ្នកបានបះបោរទាស់នឹងយើង។
28ដូច្នេះ យើងបានបន្ទាបបន្ថោកពួកមេដឹកនាំនៃទីវិសុទ្ធ
ហើយបានប្រគល់យ៉ាកុបទៅការញែកចេញបំផ្លាញ
ក៏បានប្រគល់អ៊ីស្រាអែលទៅការត្មះតិះដៀល”៕
Currently Selected:
អេសាយ 43: GKHB
Highlight
Copy
Compare
Share
Want to have your highlights saved across all your devices? Sign up or sign in
GLOBAL KHMER BIBLE©
Copyright © 2023 by Global Bible Initiative
