Aizaia 44
44
Yawɛ kɔŋko n-nyɛ Naawuni
1Amaa pumpɔŋɔ, n dabili
Yaakubu zuliya Izraɛlnim’
bɛn nyɛ n ni pii shɛb’ ŋɔ,
wummiya!
2Yawɛ ŋun nam ya ŋɔ yɛliya,
Mani n-daa nam ya
yi manim’ puya ni;
n ni sɔŋ ya.
N dabili Yaakubu zuliya,
Jɛshurun ŋun nyɛ
n ni pun pii so ŋɔ,
di zɔriya dabiɛm.
3N ni chɛ ka kom tɛli
tiŋgbani din bɔri kom,
ka chɛ ka kom zo
n-tiɛli tiŋgbani din kuui.
N ni zaŋ n shia niŋ a zuliya ni,
ka niŋ alibarika niŋ a bihi ni.
4N ni chɛ ka bɛ yiɣisi
zooi yomyom kaman
kuliga ni mɔri la,
ka lan zooi yomyom
kaman mo’ shɛŋa
din ʒe baa din kom zɔri ni la.
5So ni ti yɛli,
n nyɛla Yawɛ nira,
ka so zaŋ Yaakubu
yuli bol’ omaŋa,
ka so mi sab’ pa o nuu zuɣu yɛli,
Yawɛ nira,
ka zaŋ Izraɛl leeg’ o yuli.
6 #
Aiz 48.12; Kah 1.17; 2.8; 22.13 Yawɛ ŋun nyɛ Izraɛl naa,
ka lan nyɛ Tɔbbihi Naa
ŋun nyɛ tiligira la yɛliya,
“Mani n-nyɛ piligu,
mani n-lan nyɛ bahigu.
Naawuni so kani pahi n zuɣu.
7Banima n-lee be kaman mani?
Bɛ wuhim’ li,
bɛ wuhim’ li n tooni.
Banima n-daa lee yɛli binshɛŋa
din ti yɛn niŋ yɛla
zali kurimbuni ha.
Bɛ yɛlim’ ti binshɛŋa
din na yɛn niŋ yɛla.
8Di chɛliya ka yi suhuri zɔhiri
bee n-chɛ ka dabiɛm mali ya.
N daa pun bi yɛli ya
kurimbuni ha, ka wuhi li?
Naawuni so kani pahi n zuɣu.
N ʒi Naawuni so ŋun
mali yiko pam yɛla yaha.
Yinima n-nyɛ n shɛhiranima.”
Bɛ mali buɣijɛmbo ansarisi
9Ninvuɣ’ shɛb’ bɛn zaa mɛri wuna pa shɛli, ka bɛ suhuri ni yuri binshɛŋa bi kuri ba buchi. Bɛ shɛhiranim’ ku tooi nya shɛli bee m-baŋ shɛli. Dinzuɣu bɛ ni di vi. 10Ŋuni n-lee ni me wuni bee n-kpe binnani zali ka di pa din mal’ o buchi?
11Nyama, ŋunkam zaa jɛmdi li ni di vi. Daadamnim’ bɛn nyɛ tuumbaŋdiba m-me wuna bee n-kpe li zali. Chɛ ka bɛ zaa laɣimna nti yiɣisi zani. Dabiɛm ni ti gbahi ba ka bɛ zaa di vi.
12Machɛle yi zaŋ kurigu she buɣim ni, o zaŋdila o nuu din mali kpiɔŋ n-kpuɣi zali ŋ-ŋme li hal ti mal’ li ka di niŋ o ni bɔri li shɛm. O yi tumda, kum mini kɔnyuri gbaar’ o, ka di wumd’ o pahi.
13Ka kapinta mi zaŋ o bimbuɣisirigu n-teei li buɣisi dɔɣu ka zaŋ bimboorigu m-booi booi li, ka zaŋ o tuma nɛma m-mal’ li kaman o ni bɔri li shɛm; ka lan zaŋ bimbuɣisiri’ shɛli m-buɣisi li ka mal’ li ŋmahindi ninsala, ka di mali ninsal’ viɛlim; ka o zaŋ li ti zali di jɛmbu shee. 14Di pa shɛli o ni ŋmala sida tia bee ka o piila oki bee siɣirili n-zaŋ li sa nyɔŋ puuni, ka saa mi n-niŋ li ka di zooi niŋ kpiɔŋ. 15Di nyaaŋa ka o ti zaŋ tihi maa da’ shɛŋa m-mali buɣim wuɣisi; ka zaŋ di shɛŋa mali buɣim she bɔrɔbɔro. Di nyaaŋa ka o naanyi zaŋ di shɛŋa mali wuna mini binnana zali n-damdiri di tooni jɛmdi li. 16Di nyaaŋa ka o zaŋ dari maa pirigili m-mali buɣim she nimdi ŋubi tiɣi; ka lan zaŋ di shɛŋa mali buɣim wuɣisi ka yɛra, “Buɣim ŋɔ wuɣisibu kpe ma nyaɣisim, di kpe n kɔba ni.” 17Ka o naanyi zaŋ dari maa din kpalim mali o wuni zali n-damdiri di tooni jɛmdi li, ka suhiri li yɛra, “Tiligim’ ma, dama nyini n-nyɛ n wuni!”
18Bɛ bi mi, bɛ mi bi baŋ, bɛ tɛha mini bɛ nina zommi, ka bɛ ku tooi baŋ shɛli bee n-nya shɛli. 19So ka tɛha bee baŋsim din ni chɛ ka o baŋ ka yɛli: “N zaŋla dari maa pirigili mali buɣim n-zaŋ bɔrɔbɔro mini nimdi she di buɣimsala ni ŋubi, ka ŋmaligi zaŋ din kpalim mali binshɛli din bi tu ni m mali n-damdi di tooni jɛm li.”
20Dindina nir’ yi mɔɣi tampiligim di so. O suhu ni tɛha m-birig’ o maa, ka o ku tooi tilig’ omaŋa bee n-yɛli, “N ni gbib’ binshɛli n nudirigu ni ŋɔ pala Naawuni.”
Yawɛ ŋun nyɛ namda ni Tiligira
21Izraɛlnim’ bɛn nyɛ
“Yaakubu zuliya ŋɔ,
teemiya dimbɔŋɔ;
yi nyɛla n-daba.
Mani n-nam ya
ni yi nyɛ n daba.
N ku tam yi yɛla.
22Mani n-nyɛ yi tiligira;
labimiya n sanna.
Dama n vuui yi tuumbiɛri mini
yi daalahichi bahi kaman sagbani
bee paɣili ni vuuri shɛm la.”
23Yawɛ tiligi Yaakubu zuliya,
ka wuhi Izraɛlnim’ o yiko.
Alizanda, yilimi yila.
Tiŋgbani, yɛrimi saɣi.
Zoya mini nyɔŋ puuni tia kam,
yɛrimiya saɣi.
24“Mani n-nyɛ Yawɛ
ŋun nyɛ yi tiligira.
Mani n-daa nam ya.
Mani n-nyɛ Yawɛ ŋun daa
nam binshɛɣukam zaa.
N kɔŋko n-daa nam zuɣusaa.
Mani n-daa lan nam tiŋgbani ŋɔ.
25 #
1 Kɔr 1.20
N chɛ ka baɣisi leei jɛra,
ka chɛ ka baŋdiba
bɛn yɛri binshɛŋa
din yɛn niŋ dahin’ shɛli ha
yɛla birinda;
ka chɛ ka yɛnnim’
baŋsim leei jɛrilim.
26Amaa man’ yi chɛ ka
n dabili bee n tumo yɛli shɛli,
n chɛrimi ka din niŋ pali.
N yɛli Jɛrusalɛm ni niriba
ni lan ʒini di ni,
ka yɛli Juda fɔntinsi ni
bɛ ni lan me li zali.
Bɛ ni lan me tin’ shɛŋa
din daa lu maa zaa zali.
27Mani n-nyɛ ŋun ni tooi
yɛli teeku ni di nyuuma.
N ni chɛ ka yi mɔɣa kom nyuui.
28 #
2 Yɛl 36.23; Ɛzra 1.2 Mani n-nyɛ ŋun yɛli Sairus;
‘A nyɛla m piɛgula,
ka ni niŋ n ni yɛl’ a
ni a niŋ shɛli.
A ni yɛli ka bɛ lan me Jɛrusalɛm zali;
ka chɛ ka bɛ sɔŋ
Naawuni jɛmbu duu tampuɣili.’ ”
Currently Selected:
Aizaia 44: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
