APOCALIPSIS 16

Vasos k'ajaj phiñakuywan junt'asqas

1Templomanta sinch'ita parlamojta uyarerqani, qanchis angelesmantaj nerqa: Riychej, jich'amuychej jallp'aman Diospa k'aja phiñaynimpa chay qanchis vasosmanta.

2Ñaupaj kaj angeltaj rispa copasmanta jallp'aman jich'aykorqa. Uj asnaj, nanachej ch'upu onqoytaj runasman jamorqa, pikunachus phiña animalpa marcanwan karqanku, lantintapis yupaycharqanku chaykunaman.

3Iskay kaj angeltaj ma qochaman copamanta jich'aykorqa, qochataj uj wañusqaj yawarninman jina tukorqa. Mar qochapi kausajkunataj tukuynin wañorqanku.

4Kinsa kaj angeltaj mayusman, yaku pujyusman ima copanmanta jich'aykorqa. Chaykunataj yawarman tukorqanku. 5Yakuspa angelnintataj uyarerqani nejta: Cheqanmin kanki, Señor. Qan kanki, karqankitaj santo; imaraykuchus kay imasta ajinata juzgarqanki. 6Paykunaqa ajllasqaspa yawarninta, porfetaspatapis jich'arqanku. Chayrayku qampis yawarllatataj paykunaman ujyachinki. Paykunaqa chay jasut'ipaj jina kanku.

7Altarmantataj wajta uyarerqani, nejta: Arí, Señor Dios, Tukuy Atiyniyoj, juiciosniykeqa cheqa, cheqantaj kanku.

8Tawa kaj angeltaj intiman vasonmanta jich'aykorqa, chaywanqa inti aswan atiyniyoj karqa, runata ninawan ruphachinampaj. 9Runastaj sinch'i k'ajaywan ruphachikorqanku, Diospa sutimpa contrantataj rimarqanku. Qhesacharqanku pitachus aterqa qhechuyta chay jasut'iykunata; manataj Diosman kutirikorqankuchu payta jatunchanankupaj.

10Phishqa kaj angeltaj phiña animalpa tiyananman copanmanta jich'aykorqa, reinontaj laqhayaykorqa, nanaywantaj runakunaqa qallusninkuta khanirakorqanku. 11Janaj pacha Diospaj sajrata rimarqanku nanayninkurayku, ch'upusninkuraykutaj; manataj sajra ruwasqasninkumanta Diosman kutirikorqankuchu.

12Sojta kaj angeltaj Eufrates jatun mayuman copanmanta jich'aykorqa, yakuntaj ch'akiporqa, inti llojsimuynejmanta reyespaj ñan wakichisqa kanampaj.

13Rikorqanitaj sierpej siminmanta, phiña animalpa siminmanta, llulla sut'inchajpa siminmantapis, kinsa millay supaykunata llojsejta jamp'atusta jina. 14Supaykunaj espiritusnin kanku, pikunachus t'ukunapaj rikuchinasta ruwanku, tukuy kay pachapi reyespaman rinku, paykunata tantamunankupaj maqanakuman, jaqay jatun Tukuy Atiyniyoj Diospa p'unchaynimpaj.

15Kayqa, noqa suwa jina jamushani. Kusikuyniyojmin mana puñuspa qhawajqa, p'achantapis jallch'ajqa, ama q'alalla purinampaj, nitaj p'enqayninta rikunankupaj.

16Paykunataj tantaykorqanku, hebreo parlaypi Armagedón, nisqa cheqapi.

17Qanchis kaj angeltaj wayraman copanmanta jich'aykorqa. Janaj pachapi templomanta, trononmantawan uj sinch'i qhapariy uyarikorqa: Ñapis ruwasqaña, nispa. 18Chaypacha, lliuj lliujkuna, qhapariykuna, qhon qhonkuna karqanku. Jallp'aj manchay ikhakuynin karqa; chay jinataqa mana jayk'ajpis jallp'a kuyuykacharqachu, runas kay pachapi kasqankumantapacha. 19Jatun llajtataj kinsaman ch'ejtakorqa, gentilespa llajtasninkutaj urmarqanku. Diostaj chay jatun Babiloniamanta yuyarikorqa, k'ajaj phiñakuynimpa vino copanmanta pay ujyanampaj. 20Tukuy churu jallp'a ayqerqa, orqostaj chinkarerqanku. 21Janaj pachamanta runasman manchay jatuchaj granizos urmamorqanku, uj quintal jina llasas. Runastaj granizoj ñak'arichisqanwan Diospaj sajrata rimarqanku, imaraykuchus chay llakeyqa maypuni karqa.

Currently Selected:

APOCALIPSIS 16: QCHSB

Highlight

Copy

Compare