APOCALIPSIS 17

Qhenchachakoj warmej ñak'ariynin

1Chaypacha, qanchis angelesmanta pikunachus qanchis vasosta jap'isharqanku, chaykunamanta ujnin kaj jamorqa, parlapayawaspataj niwarqa: Kayman jamuy, qhencha warmej juchachasqa kasqanta rikuchisqayki. Payqa ashkha yaku patapi tiyasqa kashan. 2Paywan jallp'api kaj reyes qhenchachakorqanku, kay pachapi tiyakojkunapis qhenchachakusqan vinowan machaykorqanku.

3Chantá, Espíritu ch'in pampaman pusawarqa, rikorqanitaj uj warmita. Puka phiña animalpa patampi tiyasharqa. Chay animalqa Diospa contrampi rimay sutiswan junt'a karqa, qanchis umayoj, chunka wajrayojtaj. 4Warmitaj kulli puka p'achawan p'achallisqa karqa, qoriwan k'achanchasqa, k'anchaj, qhapaj rumiswan, walqaswan ima allinchasqa; makimpitaj qori copayoj millaykunawan junt'asqa, qhenchachakusqampa ch'ichinwan ima. 5Frentempitaj uj suti escribisqa karqa: Pakasqa yachay, jatun Babilonia, qhenchachakoj warmispa maman, kay pachapi millaykunajtapis. 6Rikorqanitaj chay warmita ajllasqaspa yawarninwan, Jesuspa testigosnimpa yawarninwan ima machasqata.

Payta rikuspataj maytapuni t'ukorqani. 7Angeltaj niwarqa: Imaraykutaj t'ukunki? Chay warmimanta pakasqa yachayta willasqayki, warmita apamoj phiña animalmantawan, mayqenchus qanchis umayoj, chunka wajrayojtaj. 8Chay rikusqayki phiña animalqa karqa, manataj kanchu. Ukhu pachamanta wicharimonqa, chinkaymantaj renqa. Jallp'a patapi tiyakojkunataj, pikunaj sutisninkuchus kausay libropi mana escribisqachu kashanku kay mundoj qallariyninmantapacha, phiña animalta rikuspa t'ukonqanku. Chay animaltaj karqa, manataj kanchu, kanqataj.

9Kaymin yachayniyoj yuyayqa. Chay qanchis umaqa, qanchis orqos kanku. Chaykunaj patampitaj chay warmeqa tiyasqa kashan. 10Qanchis reyestaj kanku. Chaykunamanta phishqa urmankuña. Uj kashan, ujtaj manaraj jamunchu. Jamuspapis pisi p'unchaykunallata kanan tiyan. 11Chay phiña animalqa karqa, manataj kanchu. Pusaj kaj kampis, chay qanchiskunamantaqa chinkaymantaj rishan.

12Chay chunka wajrata rikusqaykeqa, chunka reyes kanku. Paykunaqa suyuta manaraj jap'inkuchu, chaywampis uj horapaj jina reyes jina atiyta jap'enqanku, chay phiña animalwan khuska. 13Chaykunaqa uj yuyayniyojlla kanku. Phiña animalman kallpankuta, atiyninkutawan qonqanku. 14Kaykunaqa Corderoj contrampi maqanakonqanku. Corderotaj paykunata atipanqa. Payqa señorkunaj Señornin, reyespa Reynintaj. Paywan kajkunarí wajyasqas, ajllasqas, junt'ajkunataj kanku.

15Paytaj niwarqa: Chay ashkha yaku rikusqaykeqa, maypichus chay qhenchachakoj warmi tiyasqa kashan chayqa, llajtas kanku, ashkha runakuna, jatuchaj naciones, tukuy laya parlayniyojkuna ima. 16Chay chunka wajras, phiña animalpi rikorqanki chaykuna, qhenchachakoj warmita chejnenqanku, sapanta q'alallata saqerpayanqanku, aychantataj mikhonqanku, ninawantaj ruphachenqanku. 17Diosqa sonqonkupi churarqa paypa munayninta ruwanankupaj, uj sonqolla kanankupaj, suyutataj phiña animalman qonankupaj, Diospa nisqan junt'akunankama. 18Chay rikusqayki warmeqa jatun llajtamin, pichus kay pachapi reyesta kamachishan.

Currently Selected:

APOCALIPSIS 17: QCHSB

Highlight

Copy

Compare