APOCALIPSIS 15

Ángeles qanchis jasut'iykunawan

1Rikorqani janaj pachapi waj rikuchiyta jatunta t'ukunapaj jina. Qanchis ángeles jap'isharqanku qanchis qhepa jasut'iykunata, imaraykuchus chaykunawan Diospa phiñakuynin junt'akusharqa.

2Rikullarqanitaj vidriomanta jina uj mar qochata ninawan chajrusqata. Ajinallatataj rikorqani phiña animalta atipajkunata, lantintawan, marcantawan, sutimpa yupaynintawan vidriomanta mar qocha patapi sayashajta, Diospa arpasnin jap'irisqas. 3Diospa kamachin Moisespa takiyninta, Corderoj takiynintawan takisharqanku, nispa: Ancha jatuchaj, t'ukunapajtaj ruwasqasniykeqa, Señor Dios, Tukuy Atiyniyoj. Cheqantaj, cheqataj kanku ñankunasniykeqa. Qanqa tukuy laya runaspa Reynin kanki. 4Pitaj mana qanta manchachikunmanchu Señor? Pitaj atiyniykita mana jatunchanmanchu? Qanlla Santo kanki. Chayrayku tukuy runas ñaupaqeykiman jamonqanku, yupaychasonqankutaj. Cheqan juzgasqasniykeqa rejsisqas kanku.

5Kay imaspa qhepanta rikorqani, templota janaj pachapi kicharisqata, willanapaj santuariontawan. 6Templomanta qanchis ángeles llojsimorqanku, qanchis jasut'iykunata jap'irisqas, llimphu k'anchaj linowan p'achallisqas, pechosninkutaj qori chumpiwan chumpisqas. 7Tawa animalmanta ujnin kaj, qanchis angelesman qanchis qori vasosta qorqa, Diospa phiñakuyninwan junt'asqasta. Diosqa wiñay wiñaypaj kausan. 8Templotaj q'osñiwan junt'aykorqa, Diospa k'anchayninrayku, atiyninraykutaj. Manataj pipis temploman yaykuyta atejchu, chay qanchis angelespa, qanchis jasut'iykuna jap'isqanku junt'aykunankama.

Currently Selected:

APOCALIPSIS 15: QCHSB

Highlight

Copy

Compare