APOCALIPSIS 10

Ángel juch'uy librowan

1Waj kallpasapa angeltataj janaj pachamanta uraykamojta rikorqani phuyuwan muyurisqata, k'uychitaj uman patapi karqa, uyantaj inti jina, chakisnintaj nina pilarkuna jina. 2Makimpitaj juch'uy librota jap'isharqa, paña chakintataj mar qocha pataman churarqa, lloq'e chakintataj jallp'a pataman. 3Sinch'itataj qhaparerqa, leompis waqashanman jina. Qhaparejtintaj qanchis qhon qhonkuna sonasqankuta uyaricherqanku. 4Chay qanchis qhon qhonkuna sonasqankuta uyarichejtinkutaj, ñapis escribejña rishajtiy, janaj pachamanta uyarerqani nimuwajta: Imatachus chay qanchis qhon qhonkuna nimunku, chayta sellay; amataj chaykunataqa escribiychu, nispa.

5Mar qocha patapi, jallp'a patapiwan sayashajta rikusqay chay angeltaj, paña makinta janaj pachaman oqharerqa. 6Jurarqataj wiñay wiñaypaj kausajrayku, pichus janaj pachata ruwarqa, chaypi imaschus kajkunatawan, jallp'atapis, chaypi imaschus kajkunatawan, mar qochatapis, chaypi imaschus kajkunatawan; willarqataj tiempo manaña kananta. 7Manachayqa, qanchis kaj ángel parlamojtin, chay p'unchaykunapi trompetata waqachiyta qallarejtin imataj, Diospa pakasqa munaynin junt'akonqa, imaynatachus pay willarqa kamachisnin profetasman, chayman jina.

8Janaj pachamanta parlamojqa uj kutitawan nillawarqataj: Mar qocha patapi, jallp'a patapi ima uj ángel kashan. Riy jap'imuytaj chay angelpa makinmanta uj kicharisqa librituta. 9Chay angelmantaj rerqani chay librituta qonawampaj. Paytaj niwarqa: Jap'iy, oqoykuytaj; wijsaykitataj jayachisonqa, simiykipitaj misk'i kanqa, lachiwana misk'i jina.

10Jap'erqanitaj angelpa makinmanta chay librituta, mikhuykorqanitaj, simiypitaj misk'i misk'i karqa lachiwana misk'i jina; mikhuykojtiytaj wijsayta jayayacherqa. 11Angelqa nillawarqataj: Ujtawan ashkha llajtasman, runasman, tukuy laya parlayniyojkunaman, reyesman ima sut'inchanaykipuni tiyan, nispa.

Currently Selected:

APOCALIPSIS 10: QCHSB

Highlight

Copy

Compare