APOCALIPSIS 11

Iskay rikojkuna

1Paytaj qowarqa uj soqosota varaman rijch'akojta, niwarqataj: Sayariy, varawantaj midiy Diospa templonta, altarta, chaypi yupaychajkunatawan. 2Temploj jawampi kaj patiota saqellay. Ama midinkichu; imaraykuchus gentilesman qosqa kashan, pikunachus ajllasqa llajtata, tawa chunka iskayniyoj killata saronqanku. 3Noqataj iskay rikojkunata kachamusaj, yana qhashqa p'achawan p'achallisqasta. Paykunaqa waranqa iskay pachaj sojta chunkayoj p'unchaykunata noqamanta sut'inchanqanku.

4Chay rikojkunaqa iskay olivo sach'as, iskay k'anchachinastaj kanku, jallp'aj Señornimpa ñaupaqempi churasqas kashanku chaykuna. 5Pillapis paykunata imanayta munanman chayqa, paykunaj siminmanta nina llojsimun rupharanampaj. Pitajchus paykunata sajrata ruwayta munanman chayqa, ajinallatataj wañunan tiyan. 6Kaykunaqa atiyniyoj kanku janaj pachata wisq'anankupaj ama paramunampaj, sut'inchasharqanku chay p'unchaykunapi. Atiyniyojllataj kanku yakusta kamachispa, yawarman tukuchinankupaj; jallp'atapis tukuy ima ñak'ariykunawan nanachinankupaj, mashkha kutitachá munasqankuta.

7Willayta tukojtinkuña, supayqa phiña animal jina, ukhu pacha pujyumanta wicharimuspa paykunawan maqanakonqa, atipanqa paykunata, wañuchenqataj. 8Ayasninkutaj jatun llajtaj plazampi wijch'usqas kanqanku, maypichus Señorninku chakatasqa karqa. Chay llajtaj sutenqa Sodoma, Egipto ima. 9Llajtasmanta, ayllusmanta, tukuy laya parlayniyojkunamanta, jawa runasmanta kajkunaqa, kinsa p'unchay khuskanniyojta paykunaj ayasninkuta qhawanqanku, manataj p'ampakunanta saqenqankuchu. 10Jallp'api tiyakojkunataj paykuna jawa qhochukonqanku, kusikonqankutaj paykunapura t'inkasta apachinakuspa. Chay iskay profetasqa jallp'api tiyakojkunata llakichej kanku.

11Kinsa p'unchay khuskanniyoj qhepatataj, Diospa kachamusqan kausaj espíritun paykunaman yaykorqa, chakisninkuwantaj sayarerqanku. Paykunata rikojkunarí anchatapuni mancharerqanku. 12Chantá, janaj pachamanta sinch'ita parlamojta uyarerqanku nejta: Kayman wicharimuychej, nispa. Janaj pachamantaj wicharerqanku phuyupi, enemigosninkutaj paykunata rikorqanku. 13Chay horapitaj manchay jallp'a ikhakuy karqa, llajtaj chunka kaj t'aqantaj urmarqa. Jallp'aj ikhakuynimpitaj qanchis waranqa runa wañorqa, wajkunataj manchariywan janaj pachapi kashaj Diosta yupaycharqanku.

14Iskay kaj way tukukunña. Kinsa kaj way usqhayta jamonqa.

Qanchis kaj trompeta

15Qanchis kaj angeltaj trompetata waqacherqa. Janaj pachapitaj sinch'i parlaykuna uyarikorqa, nispa: Kay pachapi reinosqa Señorninchejpataña kanku, Cristompatawan. Paytaj wiñay wiñaypaj kamachenqa. 16Chay iskay chunka tawayoj kuraj runastaj, Diospa ñaupaqempi tiyanasninkupi tiyasqa kasharqanku, qonqorikuspataj Diosta yupaycharqanku. 17Nerqankutaj: Qanman graciasta qoyku, Señor Dios Tukuy Atiyniyoj. Qan kanki, karqankitaj. Atiyniykita jap'erqanki, kamachishankiñataj. 18Jatun llajtakuna phiñarikorqanku. Qampa phiñakuyniykipis chayamunña, wañusqakunaj p'unchaynimpis juzgasqa kanampaj; kamachisniyki profetasman, ajllasqasman, sutiykita manchachikojkunaman, juch'uykunaman, jatunkunaman ima t'inkata qopunaykipaj; kay pachata tukuchejkunatapis tukuchinaykipaj.

19Templotaj janaj pachapi kicharikorqa, Diospa ruwasqan trato cajontaj rikukorqa templopi. Chaypachataj oqharikorqanku lliuj lliujkuna, qhapariykuna, qhon qhonkuna, jallp'a ikhakuy, manchay granizo ima.

Currently Selected:

APOCALIPSIS 11: QCHSB

Highlight

Copy

Compare