APOCALIPSIS 9

Phishqa kaj trompeta langostaswan

1Phishqa kaj angeltaj trompetata waqacherqa. Chaypacha rikorqani uj qoyllurta janaj pachamanta jallp'aman urmamojta; ukhu pacha pujyoj llavesnintataj payman qorqanku. 2Ukhu pacha pujyutataj kicharerqa, pujyoj q'osñintaj wicharimorqa uj jatun hornoj q'osñin jina. Intitaj, wayrapis laqhayaykorqa chay pujyoj q'osñinrayku. 3Q'osñimantataj langostas jallp'aman llojsimorqanku, atiytaj paykunaman qosqa karqa; imaynatachus atoj atoj khurus atiyniyoj kanku, ajinata. 4Chay langostas kamachisqas karqanku ama imananankupaj jallp'api kaj qhorasta, ni ima q'omerta, nitaj ima sach'atapis; astawanqa runasta, pikunachus frentesninkupi Diospa sellonta mana apankuchu, chaykunallata. 5Kamachillarqankutaj ama wañuchinankuta chay runasta; astawanqa phishqa killata chay runasta ñak'arichinankuta; ñak'ariyninkutaj karqa, imaynatachus runa ñak'arin atoj atoj payta wach'ejtin, ajinata.

6Chay p'unchaykunapi runas wañuyta mask'anqanku, manataj tarenqankuchu; wañuyta munanqanku, wañuytaj paykunamanta ayqenqa.

7Chay langostasqa rijch'akorqanku maqanakupaj wakichisqa caballosman; umasninkupitaj qori pillus jina churasqas karqanku, uyasninkutaj runa uyas jina karqanku. 8Chujchasninkoqa warmikunaj chujchasnin jina karqanku. Kirusninkutaj leonespa kirusnin jina karqanku. 9Pechoquerasninkoqa karqanku, fierro pechoqueras jina, lijrasninkoj sonasqanrí, carrospa sonasqan jina, imaynatachus ashkha caballoswan phawanku maqanakuman, ajinata. 10Atoj atojpata jina chupasninkoqa wach'inasninkupis karqanku. Chupasninkupitaj atiyniyoj karqanku runasta phishqa killata ñak'arichinankupaj. 11Ukhu pachaj angelninta reyninkupaj jap'inku; sutintaj hebreo parlaypi Abadón, griego parlaypitaj Apolión.

12Ñaupaj kaj way ripunña. Kunanqa, iskay, way nispa qhapariykunaraj kaypa qhepanta jamonqanku.

13Sojta kaj angeltaj trompetata waqacherqa. Uyarerqanitaj parlamojta, qori altarpa tawantin cantosninmanta. Chaytaj Diospa ñaupaqempi kasharqa. 14Nerqataj sojta kaj angelman, pichus trompetata jap'isharqa chayman: Eufrates jatun mayu qayllapi tawa watasqa angelesta phaskaramuy, nispa. 15Chay tawa angelestaj phaskarasqas karqanku, pikunachus chay horapaj, chay p'unchaypaj, chay killapaj, chay watapaj wakichisqas karqanku, runaspa kinsa kaj t'aqanta wañurachinankupaj. 16Ejércitoj yupakuynintaj, caballospi rejkuna iskay pachaj millones karqanku. Noqataj uyarerqani paykunaj yupayninkuta.

17Chay jinamanta uj rikhuriypi caballosta rikorqani, chaykunapi lloq'asqa kajkunatapis. Paykunaj pechoquerasninkoqa ninamanta karqanku, jacinto rumimanta, azufremantawan. Caballospa umasninkutaj, leonespa umasnin jina karqanku. Simisninkumantataj nina q'osñi, azufretaj llojsimusharqa. 18Kay kinsa jasut'iykunawantaj, runaspa kinsa kaj t'aqan wañorqa ninawan, q'osñiwan, azufrewantaj. Chaykunaqa caballospa simisninkumanta llojsimusharqanku. 19Caballospa atiynenqa siminkupi, chupasninkupi ima kasharqanku; imaraykuchus chupasninkoqa katarej umasninman rijch'akunku; chaykunawantaj wach'inku.

20Chay waj runas mana wañorqankuchu chay jasut'iykunawan; nitaj chaywampis makisninkoj ruwasqasninmanta Diosman kutirikorqankuchu, supaykunata yupaycharqanku, lantistawan, qorimanta ruwasqasta, qolqemanta, broncemanta, rumimanta, k'aspismanta ima. Chaykunaqa mana qhawayta atinkuchu, nitaj uyariyta, nitaj puriytapis. 21Manataj kutirikorqankuchu juchasninkumanta, runata wañuchisqankumanta, layqachisqankumanta, qhenchachakusqankumanta, suwasqasninkumanta ima.

Currently Selected:

APOCALIPSIS 9: QCHSB

Highlight

Copy

Compare