FILIPENSES 1

Pabloj napaykuynin

1Pablo Timoteowan Jesucristoj kamachisnin, escribimuyku kay cartata, Cristo Jesuspi juchamanta tukuy t'aqasqasman, Filipos llajtapi kajkunaman, iglesiapi kurajkunaman, diaconosman ima. 2Khuyakuy, sonqo tiyakuytaj qankunawan kachun, Tatanchej Diosmanta Señor Jesucristomantawan.

Pablo mañakun Diosmanta creejkunapaj

3Sapa kuti qankunamanta yuyarikuspa, Diosniyman graciasta qonipuni. 4-5Diosmanta mañakuspaqa, kusikuywampuni tukuy qankunapaj mañani; khuska kausakorqanchej evangelioman jina, ñaupaj p'unchaymantapacha kunankama. 6Kay imasmanta yachaspataj, allin ruwayta qankunapi Dios qallarerqa. Payllataj tukuychanankama ruwallanqapuni Jesucristoj jamunan p'unchayninkama. 7Allimpuni noqapajqa, qankunamanta yuyanayqa; imaraykuchus sonqoypi jap'iykichej. Carcelpi kashajtiypis, evangeliota willashajtiypis tukuy qankuna noqawan khuska kusikorqankichej, Diospa khuyakuynimpi. 8Dios yachan imaynatachus tukuyniykichejta munakusqayta, Jesucristoj jatun munakuyninwan. 9Kaytataj mañani Diosmanta, munakuyniykichej astawan ashkhayanampaj, astawanqa yachaypi, tukuy ima rejsiypitaj. 10Aswan allin kajta ajllanaykichejpaj, cheqan sonqoyoj kanaykichejpaj, mana k'aminas Cristoj p'unchaynimpi kanaykichejpaj. 11Cheqan ruwanaswan sumaj poqoyniyoj jina junt'asqa kaychej, Jesucristonejta, Dios jatunchasqa, yupaychasqataj kanampaj.

Noqaj kausayneyqa Cristomin

12Hermanos, munani yachanaykichejta imaschus noqapi kawasqanta. Chaykunataj uj yanapa karqanku, evangelio astawan ñaupajman rinampaj. 13Ajinapitaj yachanku preso kasqayta Cristorayku, palaciopi kaj soldadospis, wajkunapis yachallankutaj. 14Preso kasqayta yachaspataj yaqha tukuy hermanos, Señorpi sonqochakuspa sayarerqanku astawan parlanankupaj, Diospa palabranmanta mana manchachikuspa.

15Cheqamanta wakenqa Cristomanta willanku, qhawanakuspa, churanakuspataj; wakintaj sumaj sonqowan. 16Kaykuna ruwanku tukuy munakuywan, yachaspa chaypaj churasqa kasqayta evangelioj allinninta sayaykukunaypaj. 17Wakinkunataj Cristomanta willanku churanakuyta munaspa, mana allin sonqowanchu, preso kashajtiy astawan llakiyta yapanawankupaj. 18Kunan imataj tiyan? Cheqan sonqowampis manapis, Cristomanta willanku; chaymanta kusikuni. Qhepamampis astawan kusikullasajpuni. 19Noqa yachani kacharisqa kanayta, qankuna Diosmanta mañapushawankichej, Jesucristoj Espiritumpa yanapayninwan ima. 20Munasqayman jina suyashani mana imapi p'enqaypi kanayta. Astawanqa tukuy sonqopuni suyashani rikuchisqa kananta cuerpoypi Cristoj may jatun kaynin, kausaypipis, chayri wañuypipis. 21Noqapajqa Cristomin kausayqa, wañuytaj ganancia. 22Chaywampis kay cuerpoypi kausashaspa Señorpa ruwaynimpaj allin kanampaj kashani chayqa, mana yachanichu imatachus ajllanayta. 23Chay iskayninmantaqa mana ajllayta atinichu; astawanqa munayman wañupuyta, rispa Cristowan kanaypaj. Chaytaj astawan sumaj noqapajqa. 24Aychapi kashaspa qhepakunayqa, astawan allinraj kanman qankunarayku. 25-26Kaypi sonqoyta churaspataj, cheqamanta yachani qhepakunayta qankunawan, yanapaspa allin kanaykichejpaj, feniykichejmanta kusikunaykichejpaj; noqawan mayta kusikunaykichejpaj Cristo Jesuspi, watejmanta rikuspa noqata qankuna ukhupi.

27Munani ari allinta kausakunaykichejta, Cristoj evangelionman jina; ajinapi noqa watukoj jamojtiypis, chayri karupi kajtiypis, uyariyta munani qankuna sinch'is kasqaykichejta uj kikin espiritullapi, atipaspapuni uj yuyaylla evangeliopi feniykichej kasqanrayku. 28Sajra runas churanakojtinku ama manchariychejchu. Chayqa señal jina paykuna chinkayman rishasqankumanta. Qankunapajtaj uj señal jinallataj kanqa salvasqas kasqaykichejmanta. Chaytaj Diosmanta jamun. 29Chayrayku qankunaman qosqa kashan Cristorayku, mana paypi creenallaykichejtachu, astawanqa payrayku ñak'arinaykichej tiyan. 30Qankunapis chay maqanakupi kashankichej imaynatachus noqatapis rikuwarqankichej maqanakojta, kunampis noqapi uyarishankichej maqanakushallasqaytapuni.

Currently Selected:

FILIPENSES 1: QCHSB

Highlight

Copy

Compare