EFESIOS 6

1Wawas, Señorpa sutimpi tata mamasniykichejta kasuychej, imaraykuchus kayqa cheqamin. 2-3Kaymin Diospa ñaupaj kaj kamachiynenqa maypichus uj promesa tiyan: Tataykita mamaykitawan allimpi qhawanki, allin risunampaj, kay jallp'a patapi unayta kausakunaykipaj.

4Tata mamas, qankunaqa ama wawasniykichejta phiñachiychejchu, manachayqa allinta yachachispa, kasuchikuychej, Señorpa k'amiynimpitaj uywaychej.

5Kamachis, kay jallp'a patapi uywaqesniykichejta kasuychej, manchachikuywan, kharkatitiywantaj llamp'u sonqolla, Cristota jina. 6Ama paykunaj qhawaynillankupeqa sirviychejchu, imaynatachus wakenqa runaj rikunallanta ruwanku allin qhawasqa kayta munaspa ajinaqa. Manachayqa Cristoj kamachisnin jina, tukuy sonqowan Diospa munayninta ruwaychej. 7Tukuy sonqo kasuychej Señorta jina, ama runakunata jinallachu. 8Yachankichejña sapa uj allinta ruwasqanman jina, allin kajllatataj Señormanta jap'enqa, kamachipis mana kamachipis kachun.

9Qankunapis kamachejkuna, kikillantataj kamachisniykichejwan allinta kausakuychej, ama paykunata manchachispa. Yachaychej, qankunatapis paykunatapis janaj pacha Señor kamachin, imaraykuchus payqa mana runaj rijch'aynillantachu qhawan.

Señorpi kallpachakunamanta

10Chayrayku, kallpachakuychej Señorpi, atiynimpa kallpampi. 11Diospa maqanakunasninwan, p'achawan jina p'achallikuychej; chaykunawantaj, supay urmachiyta munasojtiykichej sinch'ita sayanaykichejpaj. 12Mana kausaj runawanchu maqanakusun, manachayqa maqanakoj sayaykuna atiyniyojkunaj contranta, kay pachapi laqhayayta kamachejkunaj contranta, janaj pachapi sajra espirituspa contranta ima. 13Chayrayku Diospa tukuy maqanakunasninta jap'iychej, sajra p'unchaypi sinch'ita sayanaykichejpaj. Kayta ruwaspataj sinch'ita sayaychej.

14Sumajta sayaychej ari, ñañu wasaykichejta cheqa kajwan, chumpiwan jina mat'ita chumpikuspa. Cheqan kajwantaj, pechoquera chalecowan jina churasqas kaychej. 15Chakisniykichejmampis ujut'asta churakuychej, sonqo tiyachej evangeliota willanaykichejpaj. 16Chay tukuywanqa astawan fepa escudonta jap'iychej. Chaywantaj supaypa tukuy larwashaj wach'inasninta thasnunaykichejpaj. 17Salvación monterata umaykichejman churakuychej. Espíritoj espadanta jap'iychej; chaytaj Diospa palabran. 18Kay tukuytaqa ruwaychej sapa p'unchay, Diosmanta mañakuspa Espiritupi tukuy mañakuywan. Ama puñuspa qhawaychej, mana sayk'uspa. Mañakuychej Diospata kajkunapaj. 19Noqapajpis mañapuwaychej, simiyta kicharejtiy Dios palabranta qonawampaj; ama manchachikuspataj evangelioj pakasqa yachayninta rejsichinaypaj. 20Diosmin chay evangeliota willanaypaj kachawarqa. Chayrayku cadenaswan watasqa kani. Mañapuwaychej mana manchachikuspa paymanta maychus kasqanta parlanaypaj.

Pablo napaykun hermanosta

21Jinallataj qankuna yachanaykichejpaj, Tíquico may munasqa hermano, Señorpa llank'aynimpi allinta yanapakoj; willasonqachej, imatachus ruwashani chay tukuymanta. 22Payta kachamorqani imaynachus kashasqaykuta willasunaykichejpaj, sonqoykichejta kallpachanampaj ima.

23Dios tatamanta, Señorninchej Jesucristomantawan sonqo tiyasqa kay, munakuywan, fewantaj hermanospaj kachun. 24Diospa khuyakuynin kachun, Señorninchej Jesucristota tukuy wiñaypaj munakojkunaman.

Currently Selected:

EFESIOS 6: QCHSB

Highlight

Copy

Compare