FILIPENSES 2

Cristoqa k'umuykukusqanrayku oqharisqa karqa

1-2Chayrayku, sichus Cristopi tiyan ima sonqochakuypis, Espíritoj ujchakuynimpis, tukuy sonqo munakuypis, ima khuyakuypis chayqa, kusikuywan sonqoyta junt'aykuchiychej; uj sonqolla kaspa uj kikin munakuywan, ujchakuspa uj yuyaylla kaspa imapipis. 3Ama imatapis ruwaychejchu churanakuspaqa, nitaj may yachayniyojman tukuspa, astawanqa llamp'u sonqowan sapa ujtaj qhawachun ujkunata, paymanta aswan kurajkunata jina. 4Amataj mayqempis paypa kajllata qhawachunchu, astawanqa sapa uj wajkunapajpis allin kajta qhawachun.

5Qankunapipis kachun, imaynatachus Cristo Jesuspi kay yuyay karqa, chay jinallataj. 6Cristoqa Dios kashaspapis, payqa mana munarqachu Diosta jina qhawanankuta. 7Pay kikin, Dios kayninta lluch'ukuspa, uj kamachi jina jamorqa runaman rijch'asqa. 8Runa kaspataj, k'umuykukorqa; paytaj kasukoj kaspa wañuyman rerqa, cruzpi chakatasqa wañumoj. 9-11Chayrayku Diosqa payta anchatapuni jatuncharqa, uj sutitataj qorqa tukuy sutismanta astawan sumaj sutita, Jesuspa sutimpi qonqorikunankupaj tukuy janaj pachapi kajkuna, kay pachapi kajkunapis, ukhu pachapi kajkunapis; tukuy runastaj ninankupaj Jesucristo Señor kasqanta, Dios Tata yupaychasqa kanampaj.

Cristianosqa k'anchay kanku kay pachapeqa

12Munakusqasníy, imaynatachus qankuna kasuwajpuni kankichej chaypi kashajtiy; chantá mana chaypi kashajtillaychu, astawanqa karupi kashajtiypis kasuwankichej. Chayrayku kunanqa astawan llank'aychej salvacionniykichejpi Diosta manchachikuspa. 13Diosqa qosunkichej allin munayta, ruwaytataj sumaj munayninman jina.

14-15Tukuy imata ruwaychej ama rimanakuspa, nitaj phiñanakuspa, ama k'amina kanaykichejpaj. Diospa wawasnin kaychej mana ch'ichiyoj, juchasapa sajra miraypa chaupimpi. Qankunaqa lliphipishankichej qoyllurkuna jina kay laqhayaj pachapi. 16Diospa wiñay kausaj palabranmanta jap'ikuychej, Cristoj p'unchaynin jamojtin, noqa kusikunaypaj, imaraykuchus mana qhasipajchu purerqani, nitaj qhasipajchu llank'arqani. 17Yawarniy jich'asqa kanman chayqa ofrendasniykichej pataman, feniykichejpa patanmampis chayqa, chaymanta kusikuni jatun kusiywan tukuyniykichejwan khuska. 18Jinallatataj qankunapis kusikuychej noqawan khuska.

Timoteowan Epafroditowan kachamusqas kanku

19Señor Jesús munanqa chayqa, suyashani usqhayta kachamuyta Timoteota qankunaman, noqapis kusikunaypaj imaynachus kasqaykichejmanta yachaspa. 20Manataj pipis kanchu pay jina qankunamanta yuyarikojqa; imaraykuchus tukuy sonqo qankunamanta watukun. 21Tukuy mask'anku ari paykunajllata, manataj Cristo Jesuspa kajtaqa. 22Chaywampis, qankuna yachankichej imaynatachus Timoteo rejsichikusqanta qankunawan; jinallataj imaynatachus uj chureqa tatanta yanapan, ajinata payqa noqawan evangeliomanta willaspa. 23Kunanqa suyashani payta kachamunaypaj qankunaman, imaynachus rinawanta yachaytawankama jamunampaj. 24Kunanqa Señorpi suyashani noqa kikiy usqhayta jamuyta qankunata watukoj.

25Kachamunaypuni karqa hermano Epafroditota. Payqa yanapawajniy, noqawan khuskataj maqanakupi ima kaj. Payta qankuna kachamuwarqankichej yanapanawampaj tukuy pisichikuyniypi. 26Payqa maytapuni munarqa tukuyniykichejta rikuyta; llakikorqataj yachaspa qankuna uyarisqaykichejta pay onqosqa kasqanta. 27Arí, cheqamanta onqosqa karqa, yaqhapuni wañorqa. Chaywampis Dios payta khuyarqa, manataj payllatachu, noqatapis khuyallawarqataj, ama astawan llakisqa kanaypaj llakiyniy patai. 28Chayrayku usqhayta kachamushani qankuna kusikunaykichejpaj ujtawan payta rikuspa, noqapis amaña chaykama llakisqa kanaypaj. 29Wajyarikuychej payta tukuy kusikuywan, Señorpi pay jina kajkunatapis sumajta qhawaychej tukuy imapi. 30Wañusharqaña Cristoj ruwayninrayku, noqaraykutaj kausaynintaj churarqa. Wañuy patapiña karqa yanapanawampaj, imaraykuchus mana qankunaqa karupi kaspa yanapawayta aterqankichejchu.

Currently Selected:

FILIPENSES 2: QCHSB

Highlight

Copy

Compare