SAN MARCOS 10
10
Mana t'aqanakunamanta
(Mt 19.1-12; Lc 16.18)
1Sayarispataj Jesusqa riporqa Judea jallp'aman, Jordán mayu chimpaman. Watejmanta ashkha runas Jesusman jamullarqankutaj; paykunatapis ujtawan yachachillarqataj imaynatachus yachachej, ajinata. 2Chantá fariseos Jesusman chimpaykorqanku; payta pantachiyta munaspa taporqanku: Niwayku, atikunchu qhareqa warminmanta t'aqakunan? 3Jesustaj paykunaman kutichispa tapullarqataj: Imatataj Moisés kamachisorqachej?
4Paykunataj kuticherqanku: Moisesqa nerqa, qhari, t'aqanaku papelta warminman qopunanta, chaymantataj saqerpayananta.
5Jesustaj paykunaman nerqa: Moisesqa, chay kamachiyta escriberqa, qankuna rumi sonqos kasqaykichejrayku. 6Kay pacha qallarikushajtin, Dios ruwarqa qharita, warmita ima. 7Chayrayku qhareqa, tatanta, mamanta ima saqeponqa; warminwantaj ujlla kanqa. 8Iskayninkutaj uj aychallaña kanqanku; chayrayku manaña iskaychu kanku, ujllaña. 9Chayrayku Diospa tantasqantaqa, runa ama t'aqachunchu.
10Wasipitaj yachachisqasnin chayllamantataj taporqanku. 11Jesustaj paykunaman nerqa: Pi qharillapis, warminmanta t'aqakuspa, waj warmiwan casarajqa, qhenchachakun ñaupaj warmimpa contrampi. 12Ajinallatataj warmipis, qosanmanta t'aqakuspa waj qhariwan casaran chayqa, paypis qhenchachakullantaj.
Jesusqa wawasman makisninta churan
(Mt 19.13-15; Lc 18.15-17)
13Chaymantataj, runas Jesusman wawasta pusamorqanku llankhaykunampaj. Yachachisqasnintaj wawasta pusamojkunata k'amisharqanku. 14Chayta rikuspataj, Jesusqa phiñakorqa yachachisqasnimpaj, nerqataj: Saqeychej wawas noqaman jamojta, ama jark'aychejchu; imaraykuchus paykunajta Diospa reinonqa. 15Cheqamanta niykichej, pillapis mana wawa jina Diospa reinonta jap'enqa chayqa, mana jayk'aj yaykonqachu chayman.
16Jesusqa wawasta marq'ariykukuspa, makisninta sapa ujman churaspataj, Diosmanta mañaporqa.
Uj qhapaj runa
(Mt 19.16-30; Lc 18.18-30)
17Jesús, ñanman llojsishajtinña, uj runa usqhayllata jamorqa; Jesuspa ñaupaqenman qonqoriykukuspataj, payta taporqa: K'acha maestro, imata ruwaspataj wiñay kausayta tariyman?
18Jesustaj payman nerqa: Imaraykutaj k'acha niwankiri? Mana pipis k'achaqa kanchu, Dios sapallan k'achaqa. 19Diospa kamachisqanta yachanki: Ama qhenchachakuychu, ama runata wañuchiychu, ama suwaychu, ama llullakuspa tumpaychu, amam pitapis ch'aukiyaychu, respetaytaj tataykita, mamaykita ima.
20Runataj Jesusman kuticherqa: Maestro, kay tukuy imataqa wayna kasqaymantapacha junt'arqani.
21Chantá Jesusqa qhawarispa munakuywan nerqa: Uj imataraj ruwanayki tiyan. Rispa tukuy imasniykita vendemuy, wajchasmantaj qopuy chay qolqeta, janaj pachapitaj ashkha kapuyniyki kanqa. Chantá jamuy, cruzniykita oqharispataj qhatiway.
22Kayta uyarispataj chay runaqa, phutisqa, llakisqataj riporqa; imaraykuchus payqa ashkha kapuyniyoj karqa.
23Jesustaj muyuyninta qhawarispa, yachachisqasninta nerqa: May ñak'ayllata qhapajkunaqa Diospa reinonman yaykonqanku.
24Yachachisqasnintaj t'ukorqanku chay nisqanmanta; Jesustaj watejmanta paykunaman nillarqataj: Wawasníy, [qhapaj kayninkupi sonqonkuta churajkunapaj,] ñak'aylla Diospa reinonman yaykoyqa. 25Astawanqa, camelloraj atinman yarwej ningrinta yaykuyta, qhapaj runa Diospa reinonman yaykunanmantaqa.
26Chayta uyarispataj, yachachisqasnenqa astawanraj t'ukorqanku, ninakusharqankutaj: Chay jina kajtenqa, pitaj salvasqa kayta atinmanri?, nispa.
27Jesustaj paykunata qhawarispa nerqa: Runaspajqa, kayqa mana atikunchu, Diospajrí mana jinachu; imaraykuchus tukuy ima Diospajqa atikun.
28Chaymanta Pedro qallarerqa niyta: Noqaykoqa tukuy imaykuta saqerparispa qanta qhatimuyku.
29-30Jesustaj nerqa: Cheqamanta qankunaman niykichej. Pillapis noqarayku, evangelioraykutaj saqerparinman wasinta, wauqesninta, tatanta, mamanta, wawasninta, jallp'asninta ima chayqa, chay runaqa pachaj kutikama kunan p'unchaypi jap'inan tiyan: Wasista, wauqesta, panasta, mamasta, wawasta, jallp'asta ima, jinapis qhatiykachasqallataj kanqa. Qhepantataj jaqay p'unchay jamojtin, wiñay kausayta jap'enqa. 31Ñaupajpi kajkunaqa qhepakonqanku; qhepapi kajkunataj ñaupajpi rikhurenqanku.
Wañunanmanta Jesús ujtawan willan
(Mt 20.17-19; Lc 18.31-34)
32Jerusalenman wicharisharqanku, Jesustaj ñaupaqenkuta risharqa; paykunataj t'ukuspa, mancharisqastaj qhepanta risharqanku. Chantá chunka iskayniyoj yachachisqasninta wajnejman wajyaspa, willayta qallarerqa, imaschus paypaj kananmanta. 33Nerqataj: Kunanqa Jerusalén llajtaman wicharishanchej, chaypitaj Runaj Churin, kuraj sacerdotespa, leymanta yachachejkunaj makisninman ima urmanqa, paykunataj juchachanqanku wañuchinankupaj, gentilesmantaj jap'ichenqanku. 34Chay runasrí, payta asipayanqanku, jasut'enqanku, thoqaykonqanku, wañuchenqankutaj. Kinsa p'unchayninmantaj kausarimponqa.
Santiagowan Juanwan mañakunku
(Mt 20.20-28)
35Chaypacha Zebedeoj churisnin, Santiagowan Juanwan Jesusman qayllaykorqanku: Maestro, mañakusqaykuta munaykuman uyarinawaykuta, nispa.
36Paytaj nerqa: Imatataj munankichej ruwapunayta?
37Paykunataj kuticherqanku: Janaj pacha k'anchayniykipi kashajtiyki, munaykuman tiyachinawaykuta, ujniykuta pañaykiman, ujniykutataj lloq'eykiman.
38Jesustaj paykunaman nerqa: Mana yachankichejchu imatachus mañakusqaykichejta. Atiwajchejchu ujyayta noqaj ujyanay vasomanta? Bautizakuwajchejtajchu, mayqen bautismowanchus noqa bautizakuni chaywan?
39Paykunataj kuticherqanku: Arí atiyku chayta ruwaytaqa.
Jesustaj paykunaman nillarqataj: Cheqamanta atinkichej ujyanaymanta ujyayta; mayqen bautismowanchus bautizakuni chaywan bautizakuytapis. 40Pañaypi, lloq'eypitaj qankunata tiyachinayqa, mana noqaj munayniychu. Dioslla chaytaqa qoyta atin, pikunapajchus wakichin chaykunaman.
41Chunka yachachisqasnintaj, chay mañakusqankuta uyarispa phiñakorqanku Santiagopaj Juampajwan. 42Jesustaj yachachisqasninta wajyaspa nerqa: Yachankichej jina, llajtasta kamachejkunaqa atiyninkuta rikuchispa runasta llakichinku. Ajinallatataj kamachisninkupis atiyninkuta rikuchinku runasman. 43Qankuna ukhupirí, mana jinachu kanqa; mayqenchari aswan atiyniyoj kayta munan chayqa, kamachiykichej kanan tiyan.
44Pillapis atiyniyoj kayta munajqa, tukuyniykichejpa kamachin kanan tiyan.
45Runaj Churenqa mana sirvichikojchu jamorqa, astawanqa runata sirvej jamorqa, kausaynintataj qoj, ashkha runa salvasqa kanampaj.
Ciego Bartimeota Jesús qhawarichin
(Mt 20.29-34; Lc 18.35-43)
46Chantá Jericoman jamorqanku; chaymanta Jesús yachachisqasninwan llojsishajtinkutaj, ashkha runaswan ima, ciego Bartimeo, Timeoj wawan, tiyakusharqa ñan patapi mañakuspa. 47Bartimeotaj, Jesús nazareno jamushasqanta uyarispa, qhapariyta qallarerqa: Jesús, Davidpa Churin, khuyariway ari!, nispa.
48Ashkhastaj k'amisharqanku, ch'inyananta munaspa. Paytaj astawan sinch'ita qhaparisharqa: Jesús, Davidpa Churin, khuyariway ari!, nispa.
49Jesustaj sayaykuspa wajyacherqa; paykunataj wajyarqanku ciegota: Sonqochakuy, jatariy. Jesús wajyasunki, nispa.
50Bartimeotaj ponchonta wijch'uspa, sayariytawan Jesusman chimparqa. 51Jesustaj kutichispa nerqa: Imatataj munanki ruwapusunayta?
Ciegotaj Jesusman nerqa: Maestro, qhawariyta munani.
52Jesustaj payman nerqa: Ripuy, thañisqaña kanki creesqaykirayku.
Kikimpachataj ciegoqa qhawarerqa, Jesuswantaj ñanta rerqa.
Currently Selected:
SAN MARCOS 10: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
