SAN MARCOS 9

1Chaymanta Jesús nillarqataj: Sut'inta niykichej. Wakin kaypi kajkunamanta mana wañuyta rikonqankuchu, Diospa reinonta manchay atiywan jamushajta rikunankukama.

Jesús waj jinaman tukorqa

(Mt 17.1-13; Lc 9.28-36)

2Sojta p'unchayninmantaj, Jesús pusarqa Pedrota, Santiagota, Juantawan uj jatun orqoman. Chaypitaj Jesús, ñaupaqenkupi waj jinaman tukorqa. 3P'achasnintaj k'ancharispa yuraj rit'iman tukorqa; manataj pipis kay mundopi chay jina yurajta t'ajsayta atinmanchu. 4Chaymantaj Elías, Moiseswan rikhurimorqanku, Jesuswantaj parlasharqanku. 5Chaypacha Pedroqa Jesusman nerqa: Maestro walej kaypi kasqanchejqa. Kunanqa ruwasqayku kinsa ch'ujllasta; ujta qampaj, ujta Moisespaj, ujtataj Eliaspaj.

6Pedroqa mana yacharqachu imatachus parlasqanta, imaraykuchus mancharisqas kasharqanku. 7Chay jinallaman phuyu rikhurimuspa paykunata llanthuykorqa. Diostaj phuyu ukhumanta nimorqa: Kaymin munasqa Chureyqa, payta uyariychej. 8Ujtawan muyuyninkuta qhawarispataj, manaña chay ujkunata rikorqankuchu, manachayqa Jesús sapallantaña.

9Orqomanta uraykamushajtinku, Jesús yachachisqasninta kamacherqa, ama pimampis chay rikusqankuta willanankuta, Runaj Churin wañusqasmanta kausarimpunankama. 10Yachachisqasnenqa, kay nisqanta sonqonkupi waqaycharqanku, tapunakorqankutaj imachus wañusqasmanta kausarimuy kasqanta. 11Chaymantataj Jesusta taporqanku: Imaraykutaj leymanta yachachejkuna ninku Eliasraj ñaupajta jamunan kasqanta?

12Jesustaj paykunaman kuticherqa: Cheqamanta, Eliasqa ñaupajta jamuspa, tukuy imata maychus kasqanman churanqa. Manachu Escriturapi nishan Runaj Churin mayta ñak'arinanta, qhesachasqataj kananta? 13Noqa kayta niykichej, Eliasqa jamorqaña, runastaj imatachus munasqankuta payta ruwarqanku; paymanta Escriturapi nisqanman jina.

Jesús thañichin supayniyoj ch'itita

(Mt 17.14-21; Lc 9.37-43)

14Jesustaj chayamorqa maypichus yachachisqasnin kasharqanku chayman, rikorqataj muyuynimpi ashkha runata, leymanta yachachejkunatataj yachachisqasninwan churanakushajta. 15Chay kikimpacha, runasqa Jesusta rikuspa t'ukorqanku; usqhayta rispataj napaykorqanku. 16Jesustaj yachachisqasninta taporqa: Imamanta paykunawan churanakushankichej?

17Ujtaj runa chaupimanta nimorqa: Maestro, wawayta pusamorqayki, imaraykuchus payqa opaychej supayniyoj kashan. 18Maynejllapipis ujta kay supay jap'in chayqa, pampaman wijch'un, wawataj kirusninta k'ararakuspa phosoqota ajtumun; chay jawataj tulluyapushan. Yachachisqasniykita nerqani chay supayta qharqonankuta, manataj aterqankuchu.

19Jesustaj paykunaman kuticherqa: Ay, mana creey atej runas! Mayk'ajkamataj qankunawan kasaj? Mayk'ajkamataj aguantasqaykichejri? Chay ch'itita pusamuwaychej.

20Pusamorqankutaj ch'itita. Supaytaj, Jesusta rikuytawan, chay kikimpi sinch'ita thalarqa ch'itita; paytaj pampaman urmaspa, kayman jaqayman sunt'iykacharqa, phosoqota ajtumuspa. 21Jesustaj ch'itej tatanta taporqa: Mashkha unaytañataj onqonri?, nispa.

Paytaj kuticherqa: Wawamantapacha. 22Sapa kuti wawayta supayqa, ninaman, yakumantaj wijch'uykun wañuchiyta munaspa. Qan imata ruwayta atiwaj chayqa, khuyariwayku, yanapariwaykutaj.

23Jesustaj nerqa: Arí, sichus creeyta atiwaj chayqa, tukuy ima atikun creejpajqa.

24Kikimpachataj, ch'itej tatanqa qhaparispa nerqa: Creeni. Yanapaway ari, astawan creenaypaj.

25Runas k'iskikamojta rikuspataj, Jesusqa k'amerqa millay supayta, nispa: Opa joq'ara supay. Noqa kamachiyki: Llojsiy ch'itimanta. Ama ujtawan payman kutiykuychu.

26Supaytaj, sinch'ita qhaparispa, ch'itita ujtawan manchayta thalaspa llojserqa; ch'ititaj wañusqa jina wijch'ukorqa. Chay jawataj ashkhas nisharqanku: Wañupunña. 27Jesustaj, ch'itita makinmanta jap'ispa aysarerqa, paytaj sayarerqa.

28Wasi ukhuman Jesús yaykojtintaj, yachachisqasnin sapallampi taporqanku: Imaraykutaj noqayku mana aterqaykuchu chay supayta qharqoyta?

29Jesustaj kuticherqa: Mana imawan atisunmanchu kay laya supayta qharqoyta, manachus Diosmanta mañakusunman [ayunaspa] chayqa.

Jesús ujtawan willan wañunanmanta

(Mt 17.22-23; Lc 9.43-45)

30Chaymanta llojsispataj, Galilea jallp'anejta rerqanku; Jesustaj mana pipis yachananta munarqachu. 31Payqa yachachisqasninman yachachispa nisharqa: Runaj Churenqa, runaspa makisninman urmanqa, paykunataj wañuchenqanku; kinsa p'unchayninmantaj wañusqamanta kausarimponqa.

32Paykunataj mana entienderqankuchu kay nisqanta; manchachikorqankutaj tapuyta.

Pitaj aswan kuraj runari?

(Mt 18.1-5; Lc 9.46-48)

33Chay qhepata Capernaumman Jesús chayamorqa; wasipitaj yachachisqasninta taporqa: Imamantataj ñampi churanakusharqankichej?

34Paykunataj ch'inlla karqanku; imaraykuchus ñampi churanakorqanku mayqenninkuchus kuraj kananmanta. 35Jesustaj tiyakushaspa, chunka iskayniyoj yachachisqasninta wajyaspa nerqa: Pillapis ñaupajpi kayta munajqa, tukuypa qhepampi kanan tiyan, tukuypa kamachintaj.

36-37Jesustaj uj wawata oqharispa, yachachisqasnimpa chaupinman sayaykucherqa, marq'ariykukuspataj paykunaman nerqa: Pillapis sutiypi kay wawata jina jap'ikojqa, noqata jap'ikuwan. Pichus noqata jap'ikuwajrí, mana noqallatachu jap'ikuwan, astawanqa pichus kachamuwajta.

Mana contranchejpi kajqa noqanchejman kutisqa

(Lc 9.49-50; Mt 10.42)

38Juantaj nerqa Jesusman: Maestro, uj runata rikuyku, sutiykipi supaykunata qharqoshajta. Paytaj mana noqanchejwanchu. Noqaykutaj kamacherqayku ama qharqonanta; imaraykuchus payqa, mana noqanchejwanchu kashan.

39Jesustaj nerqa: Ama jark'aychejchu. Pillapis sutiypi milagrota ruwajqa, mana noqapaj sajrata rimanmanchu. 40Mana contranchejpi kajqa, noqanchejwan. 41Pillapis sutiypi uj vaso yakullatapis jaywarisunkichejman, Cristojta kasqaykichejrayku chayqa; cheqamanta niykichej, t'inkanta jap'ikaponqa.

Ama juchaman urmanamanta

(Mt 18.6-9; Lc 17.1-2)

42Jesús nillarqataj: Pillapis noqapi creej wawasta juchaman urmachinman chayqa; allin kanman, chay urmachej runaj kunkanman molino rumita warkhuykuspa qochaman wijch'uykunaqa. 43Sichus makiyki juchaman urmachisunkiman chayqa, khuchurpayay; allin kanqa, uj makiyojlla kausayman yaykunaykeqa; manataj allinchu kanman, iskaynin makisniyoj infiernoman, mana thasnukoj ninaman yaykunaykeqa. [ 44Chaypeqa khurusninku mana wañunkuchu, nitaj jayk'ajpis nina larway thasnukunchu.] 45Sichus chakiyki juchaman misk'achisunki chayqa, khuchurpariy; allin kanman, ch'ulla chakiyojlla kausayman yaykunaykeqa; manataj allinchu kanman, iskaynin chakisniykiwan infiernoman wijch'usqa kanaykeqa. [ 46Chaypeqa khurusninku mana wañunkuchu, nitaj jayk'ajpis nina larway thasnukunchu.] 47-48Sichus ñawiyki juchaman urmachisunkiman chayqa, orqhorpariy; allin qampaj kanqa, uj ñawiyojlla Diospa reinonman yaykunaykeqa; manataj allinchu kanman iskaynin ñawisniyoj, infiernoman wijch'uykusqa kanaykeqa, maypichus khurusninku mana wañunkuchu, nitaj jayk'ajpis nina larway thasnukunchu.

49Sapa ujninku ninawan allinchasqas kanqanku; [imaynatachus wañuchisqa uywa Diosman jaywanapaj kachinchakun, ajinata.] 50Sumajmin kacheqa. Kachitajchus q'aymayanman chayqa, imawantaj kachinchawajchej? Qankunapis kachinchasqas jina kaychej; ujkuna ujkunawantaj allinta kausakuychej.

Currently Selected:

SAN MARCOS 9: QCHSB

Highlight

Copy

Compare