HEBREOS 9

Diosta yupaychana wasi

1Cheqamanta, ñaupa tratojtaqa cultomanta kamachisqasnin tiyaporqa, kay pachapitaj templon. 2Tabernáculo waseqa, kay jinamanta ruwasqa karqa: ñaupaj kajpi k'anchachi karqa, mesa, rikuchiku t'antaspiwan. Chay cheqatataj, lugar santo nispa suticharqanku. 3Iskay kaj warkhusqa veloj qhepantataj, Santísimo nej kanku. 4Chaypitaj qorimanta incienso q'osñichina karqa. Diospa ruwasqan trato cajontaj nisqaj cajonintaj qoriwan tukuynejmanta forrasqa, ukhumpitaj uj juch'uy qori wich'i karqa Maná nisqa t'antayoj. Chaypi kallarqataj Aarompa taunan. Chaytaj t'ikarqa. Kallarqataj p'alta rumispi escribisqa ley ima. 5Chay patampitaj querubinespa k'anchaynin qhataykusharqa, chay jaywana cheqata. Chaykunamantaqa sapa ujninkumanta kunanqa mana parlana atikunchu.

6Kay imas chay jina wakichisqas kajtinkutaj, ñaupaj kajman sacerdotes yaykullaj kanku, culto ruwaykunata junt'anankupaj. 7Iskay kajmanrí, jatun sacerdotella uj kutita sapa wata yawarwan yaykoj, mana yawarwanqa mana. Chaytataj paypa juchasninrayku, runaspa juchasninraykutaj jaywaj. 8-9Kaywan Santo Espiritoqa yachacherqa, ñan manaraj kicharisqachu kasqanta, Santísimo nisqaman yaykunapaj, ñaupaj kaj tabernáculo sayashajtillanraj. Chay tabernaculoqa, uj rijch'ay jinalla karqa jaqay tiempopajqa, imaraykuchus chay rikuchikusqa, uywa wañuchisqas ima, mana atejchu kanku jaywajpa conciencianta allinchayta. 10Chaykunaqa mikhunasllapi, ujyanasllapi, mayllakunasllapi, aycha jawa churasqas karqanku, allinchay tiempo jamunankama.

11Chantá, Cristo jamojtinña, aswan allin imas jamojkunamanta sacerdote kaspa, aswan kuraj, aswan sumaj santuarionejta, mana makiswan wakichisqanejtachu. Kay niyta munan, mana kay pachapi ruwasqa santuarionejtachu. 12Manataj chivospa, nitaj waka uñaspa yawarninnejtachu, pay kikimpa yawarninnejta, uj kutillata llimphuchasqa jatun santuarioman yaykorqa, wiñaypaj salvacionta wakichispa. 13-14Sichus chivospa, torospa yawarnin, waka uñaj ushphantajchus millay runakunaman ch'ajchusqa kaspa llimphuchan, aycha ch'uwachasqa kanampaj chayqa; may jinatawanrajchus Cristoj yawarnin, pichus wiñay Espiritunejta Diosman mana juchayoj qokuspa, concienciaykichejta llimphuchanqa, kausaj Diospa munayninta ruwanaykichejpaj.

15Ajinamanta, payqa mosoj tratomanta allinyachej, wañuyninta churasqanraykutaj, ñaupaj trato urapi juchas kajkunata pampachan; wajyasqastaj Dios qosaj nisqanta chayaqepaj wiñaypaj jap'inku. 16Maypichari testamento ruwasqa kajtenqa, testamentota ruwajqa wañunanraj tiyan. 17Runaj wañuyninwampuni testamentoqa junt'akun. Uj jinamantaqa, testamento mana atiyniyojchu, testamentota ruwaj kausashajtillanrajqa. 18Chayrayku, ñaupaj trato churakunampajpis, yawarpuni jich'akorqa. 19Maypachachus Moisés tukuy llajtaman tukuy kamachiykunata leerqa, chaypacha uña wakaspa yawarninta, chivospa yawarnintapis jap'ispa, yakuwan, puka millmawan, hisopowantaj ch'ajchorqa, kikin librota, tukuynin runasmanwan. 20Nerqataj: Kaymin yawar tratoqa, mayqenmantachus Dios kamachisorqachej. 21Ajinallatataj, Diosman tabernaculopi jaywana vasostapis yawarwan ch'ajchorqa. 22Leyman jinataj, yaqha tukuy ima yawarwan pichakun. Yawar mana jich'akojtintaj, mana juchapis pampachakunchu.

Cristoj wañuynin juchata qhechun

23Allimpuni karqa janaj pacha imaspa rijch'aynenqa, ajina llimphuchasqa kanan. Kikin janaj pachakunataj, aswan sumaj jaywanastaraj munan kay wañuchisqasmanta nisqaqa. 24Cristoqa, mana yaykorqachu runaj makinwan ruwasqa santuarioman. Chayqa cheqa kajpa rijch'aynillan karqa. Payqa kikin janaj pachamampuni yaykorqa; Diospa ñaupaqenman qayllaykuspa noqanchejpa allinninchejrayku. 25Manataj sapa kutichu wañorqa, imaynatachus kuraj sacerdote, sapa wata wajpa yawarninwan aswan llimphu santuarioman yaykoj, ajinata. 26Uj jinamantaqa sapa kutichari, kay jallp'aj qallariyninmantaña pay ñak'arinman karqa; manataj payqa ajinatachu. Kunan uj kutillata, kay p'unchaykunaj tukukuynimpi rikhurimorqa juchata qhechunampaj, pay kikimpa yawarninwan. 27Imaynatachus runaspaj, uj kutilla wañunanku churasqa kashan; chaymantataj, juiciota taripananku tiyan. 28Ajinallatataj Cristopis uj kutillata qosqa karqa wañunampaj, ashkha runaspa juchasninkuta apanampaj. Iskay kaj jamuynimpitaj, juchamanta t'aqasqa rikhurimonqa, payta suyajkunaman salvacionta qonampaj.

Currently Selected:

HEBREOS 9: QCHSB

Highlight

Copy

Compare