HEBREOS 10

1Leyqa, jamoj imasmanta llanthullan kaspa, mana kay pachaj rijch'aynin kaspataj, mana atinchu chay kikin uywa wañuchisqasllatapuni sapa wata jaywaspa qayllaykojkunata allinchayta. 2Uj jinamantaqa, sichus jaywajkuna uj kutillapi llimphuchasqas kankuman karqa chayqa, chay jaywanas qhechukapunkumanña karqa, concienciankutaj juchata manaña rejsinkumanchu karqa. 3Kunanrí, kay uywa wañuchisqasta jaywaspaqa, sapa wata juchamanta yuyarikunku. 4Torospa, chivospa yawarninkoqa, mana juchasta qhechuyta atinchu.

5Chayrayku Cristo kay pachaman yaykumushaspa nin: Mana uywa wañuchisqata, nitaj rikuchikuta munarqankichu. Chayman nisqaqa, noqapaj aycha cuerpota wakichipuwarqanki. 6Ruphachisqa rikuchikusta, uywa wañuchisqastapis jucharayku mana munarqankichu. 7Chaypacha nerqani: Kaypi kashani. Imaynatachus noqamanta escribisqa kashan libropi, Diosníy, munayniykita ruwaj jamuni, nispa. 8Astawan patapitaj nishan: Mana munarqankichu jucharayku uywa wañuchisqasta, rikuchikusta, ruphachisqas jaywanastapis. Chaykunaqa leyman jina jaywasqa kanku. 9Chaypacha nerqa: Kaypi kashani, Diosníy, munayniykita ruwanaypaj. Ñaupaj kajta qhechuy, qhepa kajtataj churay. 10Chay munaynimpi llimphuchasqa kanchej, Jesucristoj cuerpon wiñaypaj uj kutillata qosqa kasqanrayku.

11Ajinamanta tukuy sacerdotesqa sapa p'unchay jaywanku imatachus ruwanankuta. Sapa kutitaj chay kikin uywa wañuchisqallatapuni qospa, manataj chaykunaqa jayk'ajpis juchasta qhechuyta atinkuchu. 12Cristorí, uj kutillata wañuyninta qospa, wiñaypaj Diospa pañanman tiyaykukorqa. 13Chaymantapacha suyashan enemigosnin chakisnin uraman churasqa kanankukama. 14Payqa uj sapan rikuchikullawan ajllasqasta wiñaypaj allincharqa. 15-16Chayllamantataj Santo Espiritupis willawanchej, kay jinata nispa: Kay tratota paykunawan ruwasaj, kay p'unchaykunaj qhepanta, nin Señor: Sonqosninkuman kamachisqasniyta churasaj, yuyayninkupitaj escribisaj. 17Nillantaj: Juchasninkumanta, sajra ruwasqasninkumantapis manaña yuyarikusajchu astawanqa. 18Maypachachus juchas pampachasqas kanku chayqa, manaña rikuchiku jaywana kanchu juchasraykoqa.

Diosman qayllaykunanchej tiyan

19Chayrayku, hermanos, Jesuspa yawarninrayku aswan llimphuchasqa santuarioman tukuy sonqo yaykuyta atinchej. 20Payqa noqanchejpaj kausaj ñanta kicharerqa velonejta, chaytaj niyta munan, aychannejta. 21-22Diospa wasimpi jatun sacerdoteyoj kaspa, payman qayllaykunachej allin sonqo junt'asqawan, mana kuyurej fewan, sajra concienciamanta pichasqa sonqoswan, ch'uwa yakuwan mayllasqa jina ukhuswantaj. 23Suyayninchejpa yachachiyninta sinch'ita jap'ina, mana iskayrayaspa, Diosqa junt'anmin qonan kasqanta. 24Purajmanta yanapanakuna munakuywan, allin ruwaykunawan ima. 25Ama tantakunanchej wasita saqespa, imaynatachus wakin saqenku ajinata; astawanqa kallpachanakuspapuni, imaraykuchus jaqay p'unchay qayllaykamusqanta rikushanchejña.

26Cheqa kajta rejsispañachus munayninchejmanta ujtawan juchapi purisun chayqa, manaña kanchu juchasrayku imatapis jaywanaqa. 27Uj jinamantaqa, mancharina juicio suyayllaña, ninaj k'ajaynintaj enemigosta q'olaykonqa. 28Pillapis Moisespa leyninta qhesachajqa, iskay, chayrí kinsa rikojkunaj willasqankuwan, cheqamanta mana khuyasqa wañun. 29Mashkhatawanraj yuyankichej jasut'isqa kananta chay runa Diospa Churinta saroj, yawar tratontataj millay nej, chaypitaj llimphuchasqa karqa, khuyakoj Espiritupajtaj rimarqa? 30Yachanchejtaj pichus chayta nerqa: Noqa cheqanchasaj, kutichisajtaj. Ujtawan nillarqataj: Señor ayllunta juchasninmanta taponqa. 31Mancharinapaj jina, kausaj Diospa makisninman urmayqa!

32Chayrayku yuyarikuychej ñaupa p'unchaykunamanta, maypachachus k'anchasqaña kaspa, ancha llakiywan maqanakupi karqankichej. 33Qankunaqa, ñaraj k'amisqas, llakisqas runaj asipayanan; ñaraj qankuna jina ñak'arejkunawampis ujchasqas karqankichej. 34Presosta khuyarqankichej, kapuyniykichejta suwajtinkupis kusiywan aparqankichej, yachaspa qankunapaj aswan sumaj chayaqe kasqanta janaj pachapi, mana jayk'aj tukukuyniyoj. 35Ama ari, Diospi suyakuyniykichejta chinkachiychejchu, imaraykuchus chayqa may jatun t'inkayojmin. 36Llakiypi sinch'i sonqopuni kanaykichej tiyan, Diospa munayninta ruwaspataj, Diospa qosqayki nisqasninta jap'inaykichejpaj. 37Uj tumpitamantawan jamojqa, jamonqaña, manataj qhepakonqachu. 38Kunantaj cheqan runaqa, creesqanrayku kausanqa. Sichus qhepaman ithirinman chayqa, pay mana kusichiwanqachu. 39Noqanchejqa mana chay wañuypaj qhepaman ithirikojkunamantachu kanchej; astawanqa feniyojllapuni, almaj salvacioninta taripanapaj.

Currently Selected:

HEBREOS 10: QCHSB

Highlight

Copy

Compare