HEBREOS 8

Jesusqa mosoj tratomanta kutikojnin

1Kunanqa, tukuy nisqanchejmanta kaymin ñaupajqa: Chay jina kuraj sacerdote tiyapuwanchej payqa janaj pachapi jatun Diospa tiyanampa pañanman, tiyaykukorqa. 2Payqa llimphu kaj imasta jaywan, jaqay cheqa kaj tabernáculo nisqa wasipi. Chaytataj Señor sayaricherqa, mana runachu.

3Tukuy kuraj sacerdoteqa rikuchikusta, uywa wañuchisqastawan jaywanampaj churasqa. Chayrayku paypis ima jaywanayojpuni kanan tiyan. 4Chayrayku, kay jallp'apichus pay kashanman chayqa, mana sacerdotepischu kanman, sacerdotes kashajtinkuraj rikuchikusta jaywanankupaj, leyman jina. 5Paykunaqa uj rijch'aylla, llanthu jinalla kanku janaj pacha imasmanta. Chayrayku Dios nerqa Moisesman, tabernaculota wakichinan kashajtin: Orqopi rikucherqayki chay rijch'ayman jina tukuy imata ruway, nispa. 6Chay jawa, kunanqa Jesuspata aswan sumaj ruwanan tiyapun; imaraykuchus payqa allinyachej, aswan sumaj tratomanta, aswan sumachaj Diospa qosqayki nisqasnimpi churasqa.

7Ñaupa kaj tratochus allin kanman karqa chayqa, mana waj tratotajchu churakunman karqa. 8-9Chayrayku paykunata k'amispa nin: Qhawaychej, p'unchaykuna jamushanku, Señor nin: Maypachachus Israel aylluwan, Judá aylluwan ima uj mosoj tratota ruwasaj; mana tatasninkuwan ruwarqani jinatachu, maypachachus jaqay p'unchaypi Egipto jallp'amanta orqhomorqani makinkumanta aysaspa. Paykunataj mana tratoypi sayarqankuchu. Chayrayku noqapis paykunata qhesacharqani, nin Señorqa. 10Ajinamanta, kay tratota Israel aylluwan ruwasaj, jaqay p'unchaykunaj qhepanta, Señor nin: Yuyayninkuman kamachisqasniyta churasaj, sonqosninkupitaj escribisaj. Paykunaj Diosninku kasaj, paykunataj noqaj aylluy kanqanku. 11Manaña pipis runa masinta yachachenqañachu, nitaj wauqentapis nenqachu: Señorta rejsiy, imaraykuchus tukuy rejsiwanqanku, sullk'amantapacha kurajninkukama. 12Mana allin ruwasqasninkumanta khuyasaj, juchasninkumantapis manaña astawan yuyarikusajchu. 13Mosoj trato nispa, Diosqa mauk'ayachinña ñaupaj kajta. Unayniyojqa mauk'ayapun, chinkariynintaj qayllapiña kashan.

Currently Selected:

HEBREOS 8: QCHSB

Highlight

Copy

Compare