EFESIOS 2

Diospa munakuyninrayku salvasqas kanchej

1Dios kausayta qosorqachej, pantaykunapi, juchasniykichejpi ima wañusqas kashajtiykichej. 2Chaykunapi qankunaqa ñaupajta purej kankichej, kay pachaj kamachisqanman jina kausaspa. Wayrapi kamachejpa atiyninman jina kausaj kankichej; chay espiritoqa kunan Diosta mana kasojkunata kamachishan. 3Chaykuna ukhupi tukuyninchej, chay p'unchaykunapi aychanchejpa sajra munaynimpi purej kanchej, aychaj munayninta, yuyaypa munayninta ima ruwaspa. Ajinata ruwaspa, noqanchejpis phiñakuywan jasut'inapaj jina karqanchej, chay wajkuna jina. 4Diosqa khuyakuypi qhapaj kaspa munakuwarqanchej chay jatun munakuyninwan. 5Juchasninchejpi wañusqasraj kashajtinchej, Diosqa Cristowan khuska kausayta qowarqanchej. Diospa khuyakuyninrayku salvasqas kankichej. 6Diosqa Cristo Jesustawan khuskata kausarichiwarqanchej, ajinallatataj janaj pachapi paywan tiyachiwarqanchej. 7Kayta ruwarqa, jamoj p'unchaykunapi qhapaj khuyakuyninta, munakuynintawan noqanchejpaj Cristo Jesuspi rikuchinampaj. 8Diospa khuyakuyninnejta ferayku salvasqas kankichej. Kaytaj mana qankunamantachu jamun, manachayqa Diospa regalon. 9Manataj ruwasqasraykuchu ama pipis jatunchakunampaj. 10Diospa ruwasqanmin kanchej. Chaytaqa Cristo Jesuspi ruwawarqanchej allinkunata ruwananchejpaj. Chaykunataqa Dios wakicherqa ñaupajmantaña, chaykunapi purinanchejpaj.

Creejkunaqa ujlla kanku Cristopi

11Chayrayku qankuna aychaman jina gentiles kasqaykichejta yuyarikuychej, unayqa mana circuncidasqas sutichasqas kasqaykichejtawan. Ajinata sutichasorqachej makiwan aychapi circuncidasqas kajkuna. 12Chayrayku mana Cristoyojchu karqankichej, Israel llajtayoj kaymanta karunchasqas, Diospa qosqayki nisqan tratotapis mana rejsispa; mana suyayniyoj, mana Diosniyojtaj kay pachapi karqankichej. 13-14Kunanqa Cristo Jesuspi kashankichej, pikunachus ñaupajta karunchasqas karqankichej. Paypa yawarninraykutaj qayllachisqasña kankichej, imaraykuchus Cristomin sonqo tiyakuyniykichej. Chantá, gentilesmanta, judiosmantawan uj ayllullata ruwarqa, chay t'aqanachej chaupi perqata urmachispa. 15Cristo kikin aychapi chejninakuyta chinkacherqa, leypa kamachisqasninta ruwanapaj churasqasta ima. Pay kikin iskaynin laya runasta mosoj runaman tukucherqa. Ajinapi paykuna ukhupi sonqo samakuyta churaspa. 16Cristo cruzpi wañuyninwan iskaynin ayllusta, ujllaman tukuchispa, Dioswan allinyacherqa, chejninakuyninkuta chinkachispa.

17Pay jamorqa willaj mosoj willanasta allin kausakuymanta qankuna karupi kashajkunaman, pikunachus qayllapi kashajkunamampis. 18Paynejta judiospis, mana judiospis uj Espiritunejta Dios Tataman yaykusunchej. 19Ajinapi manaña waj llajtayoj jinachu kankichej, nitaj wajyarisqa jinachu; manachayqa uj llajtayojllaña kankichej ajllasqaswan, Diospa wasimpitaj wawasnin kankichej. 20Qankuna apostolespa, profetaspa wakichisqanku patapi sayachisqas kankichej; chay kuraj kaj rumitaj kikin Jesucristo. 21Paypi chay sumaj ruwasqa waseqa wiñashan, Señornejta sumaj llimphuchasqa templo kanampaj. 22Ajinallatataj qankunapis Cristowan khuska wasichasqas kankichej, Dios qankunapi Espiritunejta tiyakunampaj.

Currently Selected:

EFESIOS 2: QCHSB

Highlight

Copy

Compare