EFESIOS 3

Pablo evangeliota gentilesman willan

1Chayrayku noqa Pablo, qankuna gentilesrayku Cristo Jesuspa preson kani. 2Qankuna uyarerqankichejña, Diospa khuyakuyninmanta qankunawan llank'anaypaj kamachisqa kasqayta. 3Dios pakasqa kaj imasninmanta sut'inchawarqa, yachachiwarqataj, imaynatachus ñaupajta pisita escribimorqaykichejña. 4Chayta leespa yachayta atinkichej, Cristoj pakasqa imasninta rejsisqayta. 5Chay pakasqa kajqa mana rikuchisqachu karqa, waj miraykunapi runaj churisninman. Kunanrí Espiritunejta sut'inchan ajllasqa apostolesninman, profetasman ima. 6Gentilkunaqa, chay kikin chayaqellatataj jap'enqanku judioswan ujllaña kaspa. Diospa qosqayki nisqantapis Cristo Jesuspi jap'illanqankutaj evangelionejta.

7Chay evangeliota willanaypajtaj noqa churasqa karqani, mana chaypaj jina kashajtiypis. Chaytarí ruwarqa Dios atiyninman jina. 8Diospa tukuy ajllasqasninmanta aswan juch'uy kashajtiypis, Diosqa atiyta qowarqa, Cristoj qhapaj kapuyninta mana rejsiy atina evangeliota gentilesman willanaypaj. 9Wiñaymantapacha Diospi pakasqa imasta, tukuyman sut'inchanaypaj atiyta qowarqa; chay tukuy imastataj pay ruwarqa. 10Diospa tukuy imaymana yachaynin, kunan rejsichisqa kachun iglesiasnejta kamachejkunaman, janaj pachapi atiyniyojkunamampis. 11Kayta Dios ruwarqa wiñay munayninman jina, Cristo Jesús Señorninchejpi ruwasqa kanampaj. 12Diosman qayllanapuni tukuy sonqo Cristopi creespa. 13Chayrayku mañakuykichej, qankunarayku ñak'arisqaymanta ama manchariychejchu, imaraykuchus kaykunaqa qankunapaj uj sumaj kusiy.

Cristoj munakuynin

14Chayrayku [Señorninchej Jesucristoj] Tatampa ñaupaqempi qonqorikuni. 15Tukuy ayllu paymanta jap'in sutita janaj pachapi jinallataj kay pachapipis. 16Janaj pacha qhapaj kayninman jina qosunkichej atiyta, Santo Espiritunejta kallpachasqas kanaykichejpaj. 17Creesqaykichejrayku Cristo sonqoykichejpi tiyakuchun, munakuypi sumaj saphinchasqas sayanaykichejpaj. 18Tukuy ajllasqaswan khuska sumajta unanchayta atinaykichejpaj, may jinachus Cristoj munakuynin kasqanta, kinrayninman, sayt'unman, ukhuman, pataman ima. 19Chantapis Cristoj munakuynintapis rejsinaykichejpaj, mayqenchus tukuy runakunaj yuyayninta atipan Diospa junt'a kayninwan, junt'asqas kanaykichejpaj.

20Diosqa tukuy imata ruwayta atin, mañakusqanchejmantapis aswan ashkhataraj, jinallataj yuyaychakusqanchejmantapis noqanchejpi atiynin kasqanman jina. 21Diosqa yupaychasqa kachun, iglesiapi Cristo Jesuspi, tukuy runaj miraynimpi wiñaypa wiñaynintinkama. Amén.

Currently Selected:

EFESIOS 3: QCHSB

Highlight

Copy

Compare