EFESIOS 1

Pabloj napaykuynin

1Noqa Pablo, Diospa munayninrayku Jesucristoj apostolnin kani. Kay cartata escribimuni Efeso llajtayoj Diospa ajllasqasninman, Jesucristopitaj creejkunaman. 2Dios Tatanchejpata, Señor Jesucristojtawan khuyakuynin, sonqo tiyakuynintaj qankunawan kachun.

Bendicionesta Cristonejta tarinchej

3Señorninchej Jesucristoj Diosnin Tatantaj yupaychasqa kachun. Pay, espiritunman jina tukuy bendicioneswan Cristowan bendiciwarqanchej janaj pachapi. 4Dios ajllawarqanchej Cristonejta manaraj kay pacha ruwasqa kashajtin, llimphuchasqa mana ch'ichiyoj paypa ñaupaqempi kananchejpaj. 5-6Munakuspa wiñaymantaña ajllawarqanchej, Cristonejta paypa wawasnimpaj rejsisqas kananchejpaj, cheqa munayninman jina; khuyakuynimpa jatun kayninta yupaychananchejpaj. Chaywantaj allin qhawasqa kananchejpaj, munakusqan Churimpi. 7Paypa yawarninrayku kacharichisqas kanchej. Juchasninchejta pampachan khuyakuyninrayku. 8Ajinapi Dios atipachiwarqanchej tukuy yachaypi, yuyaypi ima. 9Munayninman jina pakasqa imasta rejsichiwarqanchej, pay kikin ruwayta munarqa chayta. 10Cristopi tukuy imata tantayta munarqa, churasqa p'unchaykuna junt'akojtinku, janaj pachapi kajkunata, jinallataj kay pachapi kajkunatapis.

11Jinallataj Cristowan chayaqeta jap'erqanchej, tukuy imata ruwaj Diospa munayninman jina, wiñaymantapacha ajllawasqanchejrayku. 12Noqanchej ñaupajmantapacha Cristopi suyarqanchej, Diospa jatun kayninta yupaychananchejpaj. 13Qankunapis paynejta cheqa kaj palabrata, salvaj evangeliota ima uyarerqankichej. Paypi creespataj, Diospa qosqayki nisqan chay santo Espirituwan sellasqas karqankichej. 14Santo Espiritoqa chayaqenchejpa señan, chay rantisqa chayaqeta jap'inanchejkama, jatun kaynin yupaychasqa kanampaj.

Pablo Diosmanta yachayta mañan creejkunapaj

15-16Chayrayku, noqapis Señor Jesuspi creesqaykichejta, ajllasqa kajkunata munakusqaykichejmanta ima uyarispa, qankunarayku mana saqenichu Diosman graciasta qoyta. Paymanta mañakushaspataj qankunamanta yuyarikunipuni. 17Señorninchej Jesucristoj Diosnin, atiyniyoj Tata yachaymanta sut'inchaymantawan espirituta qankunaman qosuchun, payta allinta rejsinaykichejpaj. 18Yuyayniykichejpa ñawisninta k'anchaspa, yachanaykichejpaj ima suyaymanchus wajyasqas kasqaykichejta; mayqentajchus janaj pachapi qhapaj kaynimpa chayaqen ajllasqaspaj kasqanta. 19-20Mayqentajchus noqanchej creejkunapaj karqa chay atiynimpa jatun kaynin. Chay atiytaqa Dios rikucherqa runasman jina manchay atiywan, kallpawantaj, Cristota wañusqasmanta kausarichimuspa, janaj pachapi pañanman tiyaykucherqa. 21Payta churarqa tukuy kurajkunaj, atiyniyojkunaj, kallpayojkunaj, kamachejkunaj patanman ima. Churallarqataj tukuy rejsisqa sutimantapis astawan, chantá mana kay pachallapichu, manachayqa jamoj p'unchaykunapipis. 22Dios tukuy imata Cristoj chakisnin uraman churarqa, tukuy imapi iglesiapi uma kanampaj. 23Iglesiaqa Cristoj cuerpon, paypa junt'a kaynintaj, tukuy imapi junt'ashan.

Currently Selected:

EFESIOS 1: QCHSB

Highlight

Copy

Compare